ជាតិ
អង្គការសុខភាពសត្វពិភពលោក រកឃើញសត្វបក្សីផ្ទុកមេរោគផ្ដាសាយបក្សីនៅផ្សារដូនកែវ តែអាជ្ញាធរកម្ពុជាបដិសេធ
×![]()
ភ្នំពេញ៖ករណីជំងឺផ្តាសាយបក្សីប្រភេទ H5N6 ត្រូវបានគេរាយការណ៍ថា បានផ្ទុះឡើងនៅក្នុងក្រុងដូនកែវ ខេត្តតាកែវ។ អង្គការសុខភាពសត្វពិភពលោក (OIE) បានបញ្ជាក់បែបនេះដោយដកស្រង់របាយការណ៍ក្រសួងកសិកម្មកម្ពុជាថ្ងៃ ១៨ ខែមេសា។
អង្គការសុខភាពសត្វពិភពលោកដែលមានទីស្នាក់ការនៅក្រុងបារីសបានដកស្រង់របាយការណ៍របស់អគ្គនាយកដ្ឋានសុខភាពសត្វ និងផលិតកម្មសត្វថា មេរោគផ្តាសាយបក្សីប្រភេទ H5N6 នេះត្រូវបានរកឃើញនៅក្នុងចំណោមសត្វមាន់ទាដែលដាក់លក់នៅក្នុងផ្សារដូនកែវ។
«មេរោគផ្តាសាយបក្សីប្រភេទ H5N6 ត្រូវបានរកឃើញក្នុងសត្វបក្សីក្នុងផ្សារដូនកែវ សង្កាត់រការក្រៅ ក្រុងដូនកែវ ខេត្តតាកែវ តាមរយៈការត្រួតពិនិត្យរបស់វិទ្យាស្ថានប៉ាស្ទ័រកម្ពុជា និងអង្គការស្បៀង និងកសិកម្មនៃអង្គការសហប្រជាជាតិ»។ អង្គការសុខភាពសត្វខាងលើបញ្ជាក់ដូច្នេះ។
តែយ៉ាងណាលោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ បានប្រាប់សារព័ត៌មានថ្មីៗថា ករណីផ្ដាសាយបក្សីខាងលើនេះ ខាងក្រសួង និងអាជ្ញាធរពាក់ព័ន្ធ បានទប់ស្កាត់ដោះស្រាយរួចរាល់ហើយ។ ដូច្នេះវាគ្មានការផ្ទុះរីករាលដាលអ្វីឡើយ។
កន្លងមកនាយកដ្ឋានប្រយុទ្ធប្រឆាំងនឹងជំងឺឆ្លង បានអំពាវនាវឲ្យពលរដ្ឋ កុំយកសត្វមាន់ ទា និងសត្វបក្សីឈឺ ឬងាប់ មកចម្អិនជាអាហារ ឬលក់បន្តឡើយ។ ជាពិសេសមុនបរិភោគសត្វបក្សីទាំងនោះ ពលរដ្ឋត្រូវចម្អិនឲ្យឆ្អិនល្អជានិច្ច ហើយមានករណីសង្ស័យថាមានសត្វផ្ទុកវីរុសផ្តាសាយបក្សី ត្រូវរាយការណ៍ជាបន្ទាន់ទៅមន្ត្រីជំនាញផងដែរ។
សូមបញ្ជាក់ថា វីរុសជំងឺផ្ដាសាយបក្សី ជាធម្មតាចរាចរនៅចំណោមសត្វបក្សី ដែលមានវីរុសនេះរួមមាន H5N1, H5N6, H7N3, H7N7,H7N9 និងH9N2 ដែលអាចចម្លងទៅមនុស្ស និងនាំឲ្យមានជំងឺផ្ដាសាយបក្សីដែរ៕
Tag:
ផ្ដាសាយបក្សី
H5N6
© រក្សាសិទ្ធិដោយ thmeythmey.com
