ពលរដ្ឋ-ភ្ញៀវអន្តរជាតិចាយ ៥០០លានដុល្លារក្នុងចូលឆ្នាំ តាមតំបន់ទេសចរណ៍ និងទីតាំងសង្ក្រាន្ត

ជាតិ

សេដ្ឋកិច្ច

ពលរដ្ឋ-ភ្ញៀវអន្តរជាតិចាយ ៥០០លានដុល្លារក្នុងចូលឆ្នាំ តាមតំបន់ទេសចរណ៍ និងទីតាំងសង្ក្រាន្ត

19, Apr 2019 , 9:19 pm

រូបភាព

លោក ថោង ខុន រដ្ឋមន្រ្តីក្រសួងទេសចរណ៍(រូបពីក្រសួង)

ដោយ:

ភ្នំពេញ៖ នាឱកាសពិធីបុណ្យចូលឆ្នាំខ្មែរ ដែលទើបកន្លងផុតថ្មីៗ កម្ពុជាមានចលនាដើរកម្សាន្តតាមព្រឹត្តិការណ៍សង្ក្រាន្ត និងតំបន់ទេសចរណ៍សំខាន់ៗ ៥,៧លាននាក់ ដែលគិតជាទឹកប្រាក់ចំណាយរួមប្រហែល ៥០០លានដុល្លារអាមេរិក។ នេះបើតាមរដ្ឋមន្ត្រីក្រសួងទេសចរណ៍។

តួលេខពីក្រសួងទេសចរណ៍បង្ហាញថា ដោយគិតតែទីកន្លែងប្រារព្ធព្រឹត្តិការណ៍សង្ក្រាន្ត និងរមណីយដ្ឋានសំខាន់ៗ កម្ពុជាទទួលបានចំនួនដើរកម្សាន្តរបស់ភ្ញៀវក្នុងស្រុក និងអន្តរជាតិប្រមាណ ៥,៧លាននាក់ កើនឡើង ៧០ភាគរយ ធៀបនឹងឆ្នាំមុន។ តួលេខនេះត្រូវបានគណនាសម្រាប់រយៈពេល៤ថ្ងៃ គិតចាប់ពីថ្ងៃទី១៤ ដល់ថ្ងៃទី១៧ខែមេសា។

ផ្អែកលើចំនួនអ្នកដើរកម្សាន្តខាងលើនេះ រដ្ឋមន្ត្រីក្រសួងទេសចរណ៍លោក ថោង ខុន បានប៉ាន់ស្មានថា ទឹកប្រាក់ចាយវាយផ្សេងៗទៅលើថ្លៃធ្វើដំណើរ ស្នាក់នៅ ចំណីអាហារជាដើម មានប្រមាណ ៥០០លានដុល្លារ។ លោក ថោង ខុន ត្រូវបានទូរទស្សន៍BTV ស្រង់សំដីនៅថ្ងៃទី១៩ខែមេសាយ៉ាងដូច្នេះថា៖«គិតជាមធ្យមម្នាក់ៗចាយខ្ទង់៣០ម៉ឺន ទៅ៤០ម៉ឺនរៀល ហើយគិតទៅ ៥,៧លាននាក់ គឺចាយប្រហែល ៥០០លានដុល្លារ»។

នេះជាចំណូលចូលក្នុងចរន្តសេដ្ឋកិច្ចជាតិ។ នៅមុនពិធីចូលឆ្នាំនេះដែរ ប្រធានសមាគមទីភ្នាក់ងារទេសចរណ៍កម្ពុជា(CATA) អ្នកស្រី ឆាយ ស៊ីវលីន តាមរយៈសារព័ត៌មានថ្មីៗ បានអំពាវនាវឲ្យពលរដ្ឋចាប់អារម្មណ៍ដើរកម្សាន្តក្នុងស្រុក ដែលមិនត្រឹមតែបានសប្បាយនឹងភាពសម្បូរបែបនៃសម្បត្តិធម្មជាតិ វប្បធម៍របស់ជាតិប៉ុណ្ណោះទេ តែបានចូលរួមអភិវឌ្ឍន៍សេដ្ឋកិច្ចជាតិផងដែរ ប្រសើរជាងដើរកម្សាន្តទៅក្រៅប្រទេសក្នុងឱកាសនោះ។ អ្នកស្រីឲ្យដឹងថា ការចាយវាយទាំងនោះនឹងផ្ដល់ប្រាក់ចំណូលដល់ប្រជាជនតាមតំបន់ទេសចរណ៍នីមួយៗ ហើយក៏បានរួមចំណែកអភិវឌ្ឍន៍រមណីយដ្ឋានទេសចរណ៍ផងដែរ។