ជាតិ
បទយកការណ៍ / បទសម្ភាសន៍
២៥ខេត្ត/រាជធានី
×![]()
កោះកុង (ជីផាត)៖ ចុងភៅព្រៃ ជាចុងភៅដែលចម្អិនអាហារក្នុងព្រៃ សម្រាប់ឲ្យភ្ញៀវទេសចរទទួលទាននៅពេលធ្វើដំណើរផ្សងព្រេង។ សេវាកម្មចុងភៅព្រៃនេះ មាននៅក្នុងសហគមន៍អេកូទេសចរណ៍ជីផាត ដែលស្ថិតនៅក្នុងឃុំជីផាត ស្រុកថ្មបាំង ខេត្តកោះកុង។ បើតាមលោក ទុយ វណ្ណៈ មគ្គទេសក៍ទេសចរ ចុងភៅព្រៃនេះ ធ្វើម្ហូបតាមរដូវកាលដែលសម្បូររុក្ខជាតិនិងបន្លែដុះនៅក្នុងព្រៃ។ ជាពិសេសចុងភៅព្រៃ ស្គាល់រុក្ខជាតិជាច្រើននៅក្នុងព្រៃដែលអាចយកមកធ្វើម្ហូបបាន។
ក្នុងសហគមន៍អេកូទេសចរណ៍ជីផាត មានបម្រើសេវាកម្មជាច្រើនដល់ភ្ញៀវទេសចរជាតិ និងអន្តរជាតិ ទាំងសេវានាំភ្ញៀវ និងស្នាក់នៅ ហើយក្នុងនោះក៏មានសេវាកម្មចុងភៅធ្វើម្ហូបនៅក្នុងព្រៃ ដែលប្រជាសហគមន៍នៅទីនោះហៅថា «ចុងភៅព្រៃ»។ ក្នុងបទសម្ភាសជាមួយក្រុមការងារកម្មវិធី «Mercedes-Benz និងកំណប់អាថ៌កំបាំង» លោក ទុយ វណ្ណៈ បញ្ជាក់ថា៖ «នៅពេលដែលភ្ញៀវទេសចរ មានគម្រោងស្នាក់នៅក្នុងព្រៃ នោះនឹងមានចុងភៅព្រៃទៅជាមួយ ដើម្បីចម្អិនម្ហូបអាហារឲ្យពួកគាត់។ ចុងភៅព្រៃ អាចផ្សំបន្លែធម្មជាតិ និងរុក្ខជាតិមួយចំនួនដែលដុះនៅក្នុងព្រៃយកមកធ្វើជាម្ហូប។ ហើយរដូវណាដែលសម្បូរត្រីវិញ ចុងភៅព្រៃនឹងនាំភ្ញៀវទៅស្ទូចត្រីយកមកអាំងហូប»។
ដើម្បីជ្រាបច្បាស់ពីតួនាទីចុងភៅព្រៃ សូមអញ្ជើញទស្សនាបទសម្ភាសរវាងលោក គី សុខលីម អ្នកសារព័ត៌មាន ThmeyThmey ជាមួយលោក ទុយ វណ្ណៈ មគ្គទេសក៍ទេសចរក្នុងសហគមន៍អេកូទេសចរណ៍ជីផាតដូចតទៅ៖
សូមបញ្ជាក់ថា កម្មវិធី «Mercedes-Benz និងកំណប់អាថ៌កំបាំង» ផ្តួចផ្តើមឡើងដោយក្រុមហ៊ុន Star Auto Cambodia សហការជាមួយសារព័ត៌មានអេឡិចត្រូនិក ThmeyThmey.com និង Fresh News និងគាំទ្រដោយក្រសួងទេចរណ៍ ដើម្បីចូលរួមលើកកម្ពស់វិស័យទេសចរណ៍នៅទូទាំងកម្ពុជា ស្វែងរក និងគាស់កកាយតំបន់ទេសចរណ៍ ដែលគេមិនសូវស្គាល់តំបន់ទេសចរណ៍សក្តានុពល ដែលត្រូវគេមើលរំលង, ពង្រីកសក្តានុពលតំបន់ទេសចរណ៍ដែលមានស្រាប់ឲ្យកាន់តែមានសកម្មភាពរស់រវើក និងផ្សព្វផ្សាយតំបន់ទេសចរណ៍ទាំងនោះឲ្យកាត់តែល្បីល្បាញមួយកម្រិតទៀត៕
Tag:
កោះកុង
ជីផាត
ចុងភៅព្រៃ
«Mercedes-Benz និងកំណប់អាថ៌កំបាំង»
© រក្សាសិទ្ធិដោយ thmeythmey.com
