អន្តរជាតិ
ក្សត្រថៃចេញក្រមសីលធម៌តឹងរ៉ឹងជំរុញមន្ត្រីរាជការឲ្យស្ម័គ្រស្មោះនឹងជាតិ និងទុកប្រយោជន៍រដ្ឋជាធំ
×![]()
ក្រមប្រតិបត្តិដ៏តឹងរ៉ឹងបំផុតមួយសម្រាប់មន្ត្រីរាជការថៃអនុវត្តឲ្យខ្ជាប់ខ្ជួន បានចូលជាធរមាននៅថ្ងៃទី ១៧ ខែមេសា ឆ្នាំ២០១៩ ។ ច្បាប់ស្តង់ដារក្រមសីលធម៌ នឹងដាក់ឲ្យអនុវត្តនៅស្ទើរគ្រប់ភ្នាក់ងាររដ្ឋទាំងអស់ និងស្ថិតក្រោមការឃ្លាំមើលរបស់គណៈកម្មាធិការត្រួតពិនិត្យមួយ ដែលមាននាយករដ្ឋមន្ត្រីជាប្រមុខ។ គណៈកម្មាធិការនេះ មានកាតព្វកិច្ចធានាឲ្យបានថា មន្ត្រីទាំងនោះ ប្រព្រឹត្តកិច្ចការនានាដោយអនុលោមតាមគោលការណ៍ដែលរៀបចំឡើងដោយច្បាប់នេះ។
ក្នុងកថាខណ្ឌ ៥ នៃច្បាប់ស្តង់ដារក្រមសីលធម៌ដែលបានចុះក្នុងសៀវភៅរាជកិច្ច មន្ត្រីរាជការដែលស្ថិតក្រោមអំណាចច្បាប់ថ្មី ត្រូវប្រកាន់ខ្ជាប់នូវក្រមសីលធម៌ជាច្រើន ពិសេសត្រូវស្ម័គ្រស្មោះនឹងជាតិ សាសនា រាជាធិបតេយ្យ និងរបបប្រជាធិបតេយ្យ ដោយមានមហាក្សត្រជាប្រមុខរដ្ឋ។ លើសពីនោះ មន្ត្រីទាំងអស់ ក៏ត្រូវតែធ្វើតែអំពើល្អ មានទំនួលខុសត្រូវលើរាល់ភារកិច្ច និងផ្ដល់អាទិភាពលើផលប្រយោជន៍រួមច្រើនជាងផលប្រយោជន៍ផ្ទាល់ខ្លួន ព្រមទាំងរក្សាកេរ្តិ៍ឈ្មោះដ៏ល្អប្រពៃរបស់អង្គភាព។
ដោយឡែក កថាខណ្ឌ ៣ នៃច្បាប់នេះ ចែងថា ច្បាប់ស្តីពីក្រមប្រតិបត្តិដ៏តឹងរ៉ឹងនេះ ដាក់ឲ្យអនុវត្តគ្រប់ក្រសួង នាយកដ្ឋាន រដ្ឋបាលមូលដ្ឋាន និងសហគ្រាសរដ្ឋទាំងអស់។ ប៉ុន្តែ ច្បាប់នេះ លើកលែងការអនុវត្តចំពោះ ការិយាល័យរបស់សភា តុលាការ និងភ្នាក់ងាររបស់រដ្ឋាភិបាលនានា ដែលធ្វើប្រតិបត្តិការដោយឯករាជ្យ។
បើតាមសារព័ត៌មានថៃ Khaosod គណៈកម្មាធិការមួយមានសមាជិក១២នាក់ដែលដឹកនាំផ្ទាល់ដោយនាយករដ្ឋមន្ត្រីថៃ នឹងត្រូវបានបង្កើតឡើងដើម្បីត្រួតពិនិត្យលើភ្នាក់ងាររដ្ឋនានាជុំវិញស្តង់ដារក្រមសីលធម៌ដែលបានលើកឡើង លើកកម្ពស់គុណតម្លៃសីលធម៌ ដោះស្រាយជម្លោះដោយប្រើច្បាប់ និងផ្តល់យោបល់ឲ្យរដ្ឋាភិបាលលើបញ្ហាពាក់ព័ន្ធ។
យ៉ាងណាមិញ គេពុំឃើញមាន ការលើកឡើងពីកម្រិតនៃការដាក់ទោសទណ្ឌក្នុងច្បាប់ស្តីក្រមប្រតិបត្តិនេះឡើយ។ បុព្វកថានៃច្បាប់នេះ គូសបញ្ជាក់ថា ស្តេច Vajiralongkorn បានសម្រេចចុះព្រះហស្ថលេខាអនុម័តច្បាប់នេះ ដោយទទួលបានការផ្តល់យោបល់ពីសភាជាតិ ក្រោយទ្រង់បានចេញព្រះរាជក្រឹតបង្គាប់ឲ្យមានការតាក់តែងច្បាប់ ដើម្បីគ្រប់គ្រងលើស្តង់ដារក្រមសីលធម៌៕
Tag:
ថៃ
មហាក្សត្រ
មន្ត្រីរាជការ
© រក្សាសិទ្ធិដោយ thmeythmey.com
