ជាតិ
សង្គមជាតិ
នៅផ្ទះគ្មានភ្លើង ក្មេងប៉េរូម្នាក់ធ្វើកិច្ចការសាលាដោយពឹងអំពូលភ្លើងតាមផ្លូវ
× នៅប៉េរូ ក្មេងប្រុសអាយុ១២ឆ្នាំម្នាក់ ត្រូវបង្ខំចិត្តទៅធ្វើកិច្ចការសាលារបស់ខ្លួនតាមចិញ្ចើមផ្លូវ ដោយសារតែឪពុកម្តាយគ្មានលទ្ធភាពគ្រប់គ្រាន់ក្នុងការបង់ថ្លៃអគ្គិសនីចូលផ្ទះ។ សកម្មភាពរបស់ក្មេងប្រុសនោះត្រូវបានថតដោយកាមេរ៉ាសុវត្ថិភាព (CCTV) ហើយបានក្លាយជាប្រធានបទនៃការពិភាក្សាពេញបណ្តាញសង្គម។ អាជ្ញាធរមូលដ្ឋានក៏រអៀសខ្លួនផងដែរ ក្រោយឃើញទិដ្ឋភាពបែបនេះ។
Victor Martin Angulo Cordoba រស់នៅក្រុង Moche ប្រទេសប៉េរូ ខំប្រឹងប្រែងធ្វើកិច្ចការសាលារបស់ខ្លួន ដោយពឹងផ្អែកលើពន្លឺអំពូលភ្លើងនៅតាមផ្លូវ។ យោងតាមការផ្សាយរបស់ Panamericana TV. កុមារវ័យ១២ឆ្នាំរូបនេះ មិនអាចធ្វើលំហាត់នៅផ្ទះរបស់ខ្លួនបាននោះឡើយ ដោយសារតែគ្មានពន្លឺអគ្គិសនី។
គ្រួសាររបស់កុមារ Victor ស្ថិតក្នុងចំណោមគ្រួសារជាច្រើនដែលគ្មានលទ្ធទិញកុងទ័រអគ្គិសនី និងសេវាកម្មអគ្គិសនីចូលផ្ទះ ដោយសារតែតម្លៃខ្ពស់។ រៀននៅថ្នាក់ទី៦ កុមារ Victor តែងតែទទួលបានលទ្ធផលល្អក្នុងការសិក្សា ហើយគេមិនដែលខកខានធ្វើកិច្ចការសាលាម្តងណានោះឡើយ ដោយតែងតែពឹងផ្អែកចិញ្ចើមថ្នល់ និងអំពូលភ្លើងសាធារណៈនៅពេលយប់។
ជាកូនពៅក្នុងគ្រួសារដែលមានកូនបីនាក់ Victor បានអះអាងប្រាប់អ្នកសារព័ត៌មានក្នុងតំបន់ថា គេចង់ក្លាយជាមន្ត្រីប៉ូលិសម្នាក់នាពេលអនាគត ព្រោះចង់ចូលរួមលុបបំបាត់អំពើពុករលួយក្នុងប្រទេសប៉េរូទាំងមូល។
ម្តាយរបស់ Victor បានអះអាងថា គាត់គ្មានលទ្ធភាពបង់ថ្លៃភ្លើងឡើយ ប៉ុន្តែនៅផ្ទះកូនគាត់អាចប្រើទៀនបាន។ ទោះបីជាយ៉ាងណាក៏ដោយ Victor ជាញឹកញាប់ ចូលចិត្តធ្វើកិច្ចការសាលានៅតាមចិញ្ចើមផ្លូវ ដោយពឹងលើអំពូលសាធារណៈ។
ក្រោយការផ្សាយរូបភាព និងវីដេអូស្តីពីសកម្មភាពរបស់ Victor លោក Arturo Fernadez Bazan ដែលជាចៅហ្វាយក្រុង Moche បានទៅដល់ផ្ទះរបស់កុមាររូបនេះ។
ជាមួយនឹងការអណិតអាសូរ លោក Arturo បានជួយឧបត្ថម្ភសម្ភារសិក្សា ហើយថែមទាំងជួយតបណ្តាញភ្លើងចូលផ្ទះរបស់ Victor ថែមទៀត។ លោក Arturo រ៉ាប់រងការចេញថ្លៃអគ្គិសនី ដែលធ្វើឲ្យ Victor មិនចាំបាច់ប្រញាប់បញ្ចប់កិច្ចការនៅក្នុងបណ្ណាល័យរបស់សាលា ឬអង្គុយធ្វើនៅតាមចិញ្ចើមផ្លូវទៀតនោះឡើយ៕
© រក្សាសិទ្ធិដោយ thmeythmey.com