ជាតិ
សេដ្ឋកិច្ច
៥ឆ្នាំចុងក្រោយ ចំណូលពន្ធកើនឡើង៣ដង
× ភ្នំពេញ៖ រយៈពេលពេល៥ឆ្នាំចុងក្រោយនេះ ចំណូលពន្ធមានការកើនឡើង៣ដង បើធៀបទៅនឹងឆ្នាំ២០១៣ ដែលគ្រានោះរដ្ឋប្រមូលពន្ធ បានតែ៨៨១លានដុល្លារប៉ុណ្ណោះ។ នេះបើតាមការចុះផ្សាយរបស់ទីភ្នាក់ងារសារព័ត៌មានជាតិ AKP។
លោក គុណ ញឹម ជាអគ្គនាយកនៃអគ្គនាយដ្ឋានគយ និងរដ្ឋាករ បាននិយាយថា ការប្រមូលថវិកាជាតិឆ្នាំ២០១៨ ប្រមាណ២៥០០លានដុល្លារ ដែលជាឆ្នាំដែលប្រមូលពន្ធបានខ្ពស់បំផុត បើប្រៀបធៀបជាមួយបណ្ដាឆ្នាំនានា ក្នុងពេលចុងក្រោយនេះ។ តួលេខនេះ បង្ហាញពីការកើនឡើងប្រមាណ៣២ភាគរយ បើធៀបនឹងឆ្នាំ២០១៧ ហើយកើនឡើង៣ដង បើធៀបនឹងឆ្នាំ២០១៣។
រូបភាពពីទីភ្នាក់ងារសារព័ត៌មានកម្ពុជាAKP
បើតាមលោក គុណ ញឹម ប្រភពពន្ធអាករសំខាន់ៗ ដែលប្រមូលបានគឺ ពន្ធគយឬពន្ធនាំចូល ដែលមានការកើនឡើង២០ភាគរយ, ពន្ធអាករលើតម្លៃបន្ថែម(VAT)កើនឡើងជាង៣០ភាគរយ និងពន្ធអាករពិសេសលើទំនិញមួយចំនួន៣៥ភាគរយ។ អគ្គនាយកដ្ឋានគយ និងរដ្ឋាករកម្ពុជា បានបែងចែងមុខទំនិញ សម្រាប់ងាយស្រួលក្នុងការតាមដានក្នុងការគ្រប់គ្រងប្រភពចំណូលដែលប្រមូលបានជាបីក្រុម រួមមានទី១ គឺក្រុមយានយន្ត និងគ្រឿងចក្រ ហើយក្រុមនេះបានចំណូលខ្ពស់ជាងគេ ក្នុងឆ្នាំ២០១៨ គឹបានចំណូលប្រមាណ៤៦ភាគរយនៃចំណូលសរុប។ ក្រុមទី២ គឺទំនិញចម្រុះ រួមមានទាំងគ្រឿងសំណង់ ដែលប្រមូលចំណូលបានជាង៣៦ភាគរយ នៃចំណូលសរុបក្នុងឆ្នាំ២០១៨។ ក្រុមទី៣ គឺប្រេងឥន្ធនៈនិងថាមពល ដែលមានចំណូលសរុប១៩ភាគរយ។
កត្តាដែលធ្វើឲ្យអគ្គនាយកដ្ឋានគយ និងរដ្ឋាករប្រមូលចំណូលពន្ធកើនឡើង គឺស្ថិរភាពនយោបាយ ដែលបង្កឲ្យលក្ខខណ្ឌដំណើរការពាណិជ្ជកម្ម រួមជាមួយការវិនិយោគ មានដំណើរការល្អប្រសើរ។ ទន្ទឹមនឹងនេះ លោក គុណ ញឹម ក៏បញ្ជាក់ពីតួនាទីនិងភារកិច្ចស្នូលនៃអគ្គនាយកដ្ឋានគយនិងរដ្ឋាករកម្ពុជា បីចំនុចសំខាន់ៗ គឺទី១ ការប្រមូលពន្ធអាករពីពាណិជ្ជកម្មអន្តជាតិ គឺការនាំចេញនាំចូល ដើម្បីប្រមូលថវិការជាតិ។ ទី២ ជាការផ្ដល់កិច្ចសម្រួលពាណិជ្ជកម្ម ដើម្បីជំរុញដល់ការធ្វើពាណិជ្ជកម្មនិងការវិនិយោគនៅកម្ពុជា និងទី៣ ការទប់ស្កាត់ និងបង្ក្រាបបទល្មើសការគេចពន្ធជាដើម៕
Tag:
ចំណូលពន្ធ
សេដ្ឋកិច្ច
© រក្សាសិទ្ធិដោយ thmeythmey.com