ជាតិ
សង្គមជាតិ
ក្រសួងសុខាភិបាលព្រមានបិទគណនីហ្វេសប៊ុកចំនួនពីរដែលលក់គ្រឿងសម្អាងគ្មានការអនុញ្ញាតត្រឹមត្រូវ
× ភ្នំពេញ៖ ក្រោយពីពិនិត្យឃើញថា ផលិតផលគ្រឿងសម្អាងដែលបានផ្សព្វផ្សាយលក់ដោយម្ចាស់គណនីហ្វេសប៊ុកឈ្មោះ ប៊ូ សាអែម និង Zey Neang មិនមានចុះត្រួតពិនិត្យគុណភាព និងគ្មានច្បាប់អនុញ្ញាតត្រឹមត្រូវ ក្រសួងសុខាភិបាលបានសម្រេចហាមឃាត់ម្ចាស់គណនីខាងលើមិនឲ្យបន្តការផ្សាយលក់បន្តទៀតឡើយ។ ការហាមឃាត់នេះ គឺដោយសារតែក្រសួងមិនចង់ឲ្យពលរដ្ឋខាតប្រាក់កាស និងប៉ះពាល់ដល់សុខភាព។
ក្រសួងសុខាភិបាលបានព្រមានបិទគណនីហ្វេសប៊ុកឈ្មោះថា ប៊ូ សាអែម និង Zey Neang ដោយសារ ម្ចាស់គណនីទាំងពីរនេះ ផ្សាយលក់គ្រឿងសម្អាងដូចជា ឈុតព្យាបាលមុខ NNP សាប៊ូកំទេចមាស Swiss Gold,ឡេការពារកម្តៅថ្ងៃ NNP UV 60,ឈុតព្យាបាលសក់ NNP, ឡេលាបស្បែក Dr.White body lotion,ឡេលាបក្លៀក Dr.White armpit night cream, Dr.white armpit scrub, ឡេលាបក្លៀក Dr.White armpit day cream, ឡេលាបមុខ Dr.white skincare និងផលិតផលគ្រឿងសម្អាងដទៃ។ ផលិតផលទាំងនោះ សុទ្ធតែមិនមានការអនុញ្ញាត និងត្រួតពិនិត្យត្រឹមត្រូវ។
ដើម្បីជៀសផុតការខាតបង់ប្រាក់កាស និងប៉ះពាល់ដល់សុខភាព ឬឈានដល់ការបាត់បង់ជីវិត ក្រសួងសុខាភិបាល បានអំពាវនាវឲ្យពលរដ្ឋឈប់ប្រើប្រាស់គ្រឿងសម្អាងរបស់ម្ចាស់គណនីទាំងនោះ។ «ក្រសួងសុខាភិបាលតម្រូវឲ្យម្ចាស់គណនីនេះបញ្ឈប់ការផ្សព្វផ្សាយ ការនាំចូល លក់ ចែកចាយ និងប្រមូលផលិតផលមកវិញដើម្បីកំទេចចោល។ ប្រសិនបើនៅតែឃើញម្ចាស់គណនីទាំងពីរនេះផ្សព្វផ្សាយបន្តទៀត ក្រសួងសុខាភិបាល នឹងចាត់វិធានការតាមច្បាប់ស្តីពីវិសោធនកម្មច្បាប់ស្តីពីការគ្រប់គ្រងឱសថជាធរមាន»។ នេះជាការបញ្ជាក់របស់ក្រសួង។
ក្រសួងសុខាភិបាលបានបញ្ជាក់ថា ប្រសិនបើពលរដ្ឋបានជួបប្រទះឃើញជនណាដែលផ្សព្វផ្សាយលក់ផលិតគ្រឿងសម្អាងដូចខាងលើនេះ ត្រូវរាយការណ៍ និងផ្តល់ព័ត៌មានទៅនាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសម្អាងជាបន្ទាន់ផងដែរ៕
Tag:
ក្រសួងសុខាភិបាល
ហ្វេសប៊ុក
គ្រឿងសម្អាង
សុខភាព
© រក្សាសិទ្ធិដោយ thmeythmey.com