កីឡាអន្តរជាតិ
អន្តរជាតិ
Ronaldo ជាកីឡាករដំបូងដែលឈ្នះពានលីគកំពូលនៅអង់គ្លេស អេស្ប៉ាញ និងអ៊ីតាលី Ronaldo អបអរក្រោយ Juventus មានពិន្ទុគ្រប់គ្រាន់សម្រាប់តំណែងជើងឯក Serie A។ រូបថត AFP
× មិនមែន១០០ភាគរយ គឺ១០០០ភាគរយឯណោះ ចំពោះការតាំងចិត្តរបស់ Cristiano Ronaldo បន្តលេងឲ្យ Juventus។ ខ្សែប្រយុទ្ធព័រទុយហ្គាល់រូបនេះ បានអះអាងបន្ទាប់ពីសេះបង្កង់ មានពិន្ទុគ្រប់គ្រាន់សម្រាប់តំណែងជើងឯក Serie A ៨លើកជាប់ៗគ្នា ក្រោយឈ្នះ Fiorentina ២-១។
ជំនួបនៅលើទឹក Allianz Stadium ក្រុមភ្ញៀវ Fiorentina មានគ្រាប់បាល់នាំមុខ១គ្រាប់ ក្រោយប្រកួតបាន៦នាទី ដែលសម្រេចបានដោយ Nikola Milenkovic មុនពេលដែល Alex Sandro តាមស្មើ ១-១ ឲ្យ Juventus នៅនាទី៣៧។
ទីបំផុត សេះបង្កង់ទទួលបាន៣ពិន្ទុពីការប្រកួត តាមរយៈការភ្លាត់ស្នៀតធ្វើឲ្យចូលទីខ្លួនឯងរបស់ខ្សែការពារ German Pezzella នៅនាទី៥៣។ ជ័យជម្នះនេះ នាំឲ្យ Juventus ឈ្នះពាន Serie A ដោយស្វ័យប្រវត្តិ ហើយមានរហូតដល់ទៅ២០ពិន្ទុលើស Napoli ខណៈពួកគេនៅសល់ការប្រកួត៥លើកទៀត មុនបញ្ចប់រដូវកាល។
ទោះបីជានៅតែរងការខកចិត្ត ក្រោយ Juventus ក្រោមការដឹកនាំរបស់ លោក Massimiliano Allegriធ្លាក់ពាន Champions League ដោយសារ Ajax ក៏ដោយ ប៉ុន្តែ Ronaldo អះអាងថា គេពិតជារីករាយដែលបានឈ្នះពាននៅអ៊ីតាលី នាការបង្ហាញខ្លួននៅរដូវកាលដំបូង ហើយត្រៀមខ្លួនយ៉ាងល្អសម្រាប់ពានអឺរ៉ុបនៅឆ្នាំក្រោយ។
ការឈ្នះពាន Serie A លើកទី៣៥ របស់ Juventus នាំឲ្យ Ronaldo ក្លាយជាកីឡាករដំបូងដែលឈ្នះពានជើងឯកនៅលីគកំពូលរបស់អង់គ្លេស អេស្ប៉ាញ និងអ៊ីតាលី។ ខ្សែប្រយុទ្ធអាយុ៣៤ឆ្នាំ និងជាម្ចាស់ពាន Ballon d’Or ៥លើករូបនេះ បានផ្ទេរពី Real Madrid កាលពីរដូវកាលមុន ហើយបានស៊ុតបាល់បញ្ចូលទីសរុប២៦គ្រាប់ ក្នុងនោះ១៩គ្រាប់ក្នុងលីគ។
សរុបជារួម Ronaldo ឈ្នះពានអាជីពចំនួន២៨ ក្នុងនោះលីគកំពូល៦លើក (Manchester United ៣លើក Real Madrid ២លើក និង Juventus ១លើក) Champions League ៥លើក (១លើកជាមួយ Manchester United និង៤លើកជាមួយ Real Madrid) រួមទាំងការឈ្នះពាន Euro ឆ្នាំ២០១៦ ជាមួយក្រុមជម្រើសជាតិព័រទុយហ្គាល់ផងដែរ៕
Tag:
បាល់ទាត់
Ronaldo
Serie A
© រក្សាសិទ្ធិដោយ thmeythmey.com