ONE Championship
កីឡាជាតិ
ជាតិ
ONE៖ ហ៊ុន ច័ន្ទរាជ្យ និយាយអ្វីខ្លះមុនជំនួបរវាង នៅ ស្រីពៅ ទល់នឹង Priscilla ?
×![]()
អត្ថបទ៖ ស៊ីធី
ការប្រកួតរវាងកីឡាការិនីម្ចាស់ផ្ទះ Priscilla Hertati Lumban Gaol និង កីឡាការិនិជម្រើសជាតិកម្ពុជា នៅ ស្រីពៅ កាន់តែខិតជិតមកដល់ហើយនៅសង្វៀន ONE: FOR HONOR នាថ្ងៃទី៣ ខែឧសភា ឆ្នាំ ២០១៩ ខាងមុខនៅប្រទេស ឥណ្ឌូណេស៊ី។
គ្រូបង្វឹក ហ៊ុន ច័ន្ទរាជ្យ ប្រចាំក្លិប Cambodian Top Team ដែលត្រូវដឹកនាំ នៅ ស្រីពៅ ទៅកាន់ការប្រកួតបានរៀបរាប់ពីចំណុចខ្លាំង និងខ្សោយមួយចំនួនរវាងកូនក្រុម និងគូប្រជែង។
លោក ហ៊ុន ច័ន្ទរាជ្យ សង្កត់ធ្ងន់ថា ៖« Priscilla គេមានបទពិសោធន៍ច្រើនដល់ ៩ ដងនៅសង្វៀន One Championship និង កម្លាំងខ្លាំងជាងកីឡាការិនីថៃ Riga ដែល ស្រីពៅ បំបាក់រួចហើយនោះ។ កម្លាំងកាច់ បោក ក្លេរគេខ្លាំង ដូច្នេះ យើងត្រូវការពារកុំឲ្យគេក្លេរបាន និង បោកបាន»។
អគ្គលេខាធិការសហព័ន្ធកីឡាយុទ្ធគុនចម្រុះកម្ពុជារូបនេះទទួលស្គាល់ដែរថា ចំណុចខ្សោយ ស្រីពៅ នៅត្រង់ក្លេរ គាប កាច់ និង បោក ដែលត្រូវតែបន្ថែមចំណុចនេះ។ បែបណាក្ដីគ្រូបង្វឹកគុនចម្រុះដដែលនេះ សង្ឃឹមថា ស្រីពៅ នឹងហ្វឹកហាត់ផ្នែកកម្លាំង ក្បាច់ក្លេរ-ចាប់ និង ក្បាច់ការពារកុំឲ្យគេផ្ដួលបាន។ លោកនៅតែមានជំនឿ លើ ស្រីពៅ ថានឹងធ្វើបានល្អ ព្រោះកីឡាការិនិជម្រើសជាតិរូបនេះខំហ្វឹកហាត់ត្រៀមរហូតមក ហើយ អំឡុងពេលចូលឆ្នាំថ្មីប្រពៃណីជាតិក៏បន្តហ្វឹកហាត់ខ្លាំងក្លាដូចគ្នា។
លោកបន្ថែមទៀតថា កូនសិស្សរបស់ខ្លួននឹងធ្វើឲ្យការប្រកួតស្រួចស្រាល់ ហើយទស្សនិកជនច្បាស់ជាចង់តាមដានជាក់ជាមិនខាន។ ថ្មីៗនេះ កីឡាការិនីជួរមុខនៅកម្ពុជា បានចេញទៅហ្វឹកហាត់ជាមួយក្រុមកីឡាករប្រដាល់ជម្រើសជាតិនៅប្រទេសថៃ កាលថ្ងៃអង្គារ រហូតដល់ថ្ងៃទី ២៧ មេសា ទើបត្រលប់មកវិញ ដែលជាការពង្រឹងសមត្ថភាព មុនចេញទៅប្រកួតនៅ ឥណ្ឌូណេស៊ី នាដើមខែ ឧសភា ខាងមុខ។
កីឡាការិនីវ័យ ២៤ រូបនេះក៏បានប្រាប់ឲ្យដឹងនាពេលកន្លងទៅផងដែរថា គេប្រឹងហាត់ក្បាច់គាប ក្លេរ និង ផ្ដួលឲ្យបានល្អប្រសើរព្រោះនៅខ្សោយត្រង់ចំណុចនេះ។ ប៉ុន្តែអ្វីដែលជាចំណុចល្អនោះ ស្រីពៅ មិនឲ្យ Priscilla ផ្ដួលបានងាយៗឡើយដើម្បីបង្ការគ្រោះថ្នាក់។ ប្អូនស្រីរបស់ នៅ ស៊ីថា នឹងនៅតែរក្សាជំហរវ៉ៃប្រយោល និង វ៉ៃដោះខ្លួនការពារមិនអាចឲ្យដៃគូចូលកៀកពេកបានទេ។
គួរដឹងដែរថា កីឡាការិនី Priscilla Hertati Lumban Gaol មានវ័យ ៣០ ឆ្នាំ ជាតារាប្រចាំសង្វៀន One Championship តាំងពីឆ្នាំ ២០១៧ មក។ Priscilla ប្រកួតលើសង្វៀនកម្រិតពិភពលោកនេះបានចំនួន ៩ ដង ដែលក្នុងនោះឈ្នះ ៥ ដង និង ចាញ់ ៤ ដង។ ការប្រកួតចុងក្រោយ Priscilla ចាញ់ពិន្ទុកីឡាការិនីឥណ្ឌា Puja Tomar ទាំងមិនអស់ចិត្តដោយមានទឹកភ្នែកស្រក់ក្រោយការប្រកាសលទ្ធផល។ រីឯ នៅ ស្រី ដែលជា កីឡាការិនីឆ្នើមប្រចាំសង្វៀន World Lethwei Championship នៅប្រទេសមីយ៉ាន់ម៉ា នាឆ្នាំកន្លងទៅ ទើបតែឡើងសង្វៀន One Championship បានម្ដងគត់ពេលយកឈ្នះកីឡាការិនីថៃ Rika Ishige កាលពីពាក់កណ្ដាលខែ កុម្ភៈ ឆ្នាំ ២០១៩នៅប្រទេសថៃ៕
Tag:
នៅ ស្រីពៅ
MMA
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
