អន្តរជាតិ
រូបភាព៖ UNDP
×![]()
អ្នកជំនាញអង្គការសហប្រជាជាតិ ក្រើនរម្លឹកឲ្យមានការចាប់អារម្មណ៍ខ្លាំងទៅលើការកើនឡើងនៃកម្រិតបំណុលរបស់ប្រទេសក្រីក្រ ឬប្រទេសមានការអភិវឌ្ឍតិចតួចបំផុតលើពិភពលោក។ សេចក្តីថ្លែងការណ៍របស់អ្នកជំនាញ ធ្វើឡើងស្របជាមួយនឹងការព្រមានរបស់អង្គការរូបិយវត្ថុអន្តរជាតិ ដែលព្រួយបារម្ភដូចគ្នាផងថា ប្រទេសទាំងនេះ អាចធ្លាក់ចូលក្នុងវិបត្តិបំណុលដកខ្លួនមិនរួច។
តាមរយៈកិច្ចប្រជុំស្តីពីការពង្រឹងភាពផុយស្រួយ នៃបំណុលរបស់ប្រទេសមានការអភិវឌ្ឍតិចតួចបំផុតរបស់ពិភពលោកនាពេលថ្មីៗនេះ ប្រធានគ្រប់គ្រងកម្មវិធីអភិវឌ្ឍអង្គការសហប្រជាជាតិ (UNDP) លោក Achim Steiner បានទទួលស្គាល់ថា បំណុល គឺជាប្រភពដ៏សំខាន់មួយនៃការអភិវឌ្ឍរបស់ក្រុមប្រទេសក្រីក្រ ក៏ប៉ុន្តែលោក អះអាងផងដែរថាទំនោរចុងក្រោយរបស់បំណុល ក៏ស្ថិតដល់ដំណាក់កាលព្រួយបារម្ភមួយផងដែរ។
តាមសេចក្តីថ្លែងការណ៍ដែលចុះផ្សាយដោយគេហទំព័រ UNDP លោក Achim Steiner បានកំណត់សម្គាល់ថា កម្រិតនៃបំណុលជាសកលបច្ចុប្បន្ន បានកើនឡើងគួរព្រួយបារម្ភ និងលើសពីស្ថានភាពវិបត្តិបំណុលក្នុងអំឡុងទសវត្សរ៍១៩៨០ទៅទៀត។ លោក មានការព្រួយបារម្ភខ្លាំងបំផុតចំពោះប្រទេសក្រីក្រ ឬប្រទេសមានការអភិវឌ្ឍតិចតួចបំផុតលើពិពភលោក។
តាមមន្ត្រីជាន់ខ្ពស់របស់អង្គការសហប្រជាជាតិរូបនេះ ផ្នែកមួយនៃកំណើនគួរឲ្យព្រួយបារម្ភនៃបំណុលនេះ គឺដោយសារកម្ចីរបស់រដ្ឋាភិបាលក្នុងគោលដៅបង្កើន ការវិនិយោគសាធារណៈ ជាពិសេសនោះលើការអភិវឌ្ឍធនធានមនុស្សតែម្តង។ លោក សង្កត់ធ្ងន់ថា ខណៈពេលដែលស្ថានភាពសេដ្ឋកិច្ច និងហិរញ្ញវត្ថុសកល កាន់តែមានការប្រែប្រួលខ្លាំង ប្រទេសក្រីក្រមួយចំនួន នឹងត្រូវជួយហនិភ័យខ្ពស់នៃអន្ទាក់បំណុល ពោលគឺប្រទេសទាំងនោះ អាចនឹងត្រូវវណ្ឌក ដោយសារតែបំណុលនោះតែម្តង។
សម្រាប់លោក ការខិតខំប្រែងប្រែង និងការជ្រោមជ្រែងជាលក្ខណៈសមូហភាព គឺជាកត្តាសំខាន់ណាស់ក្នុងស្ថានភាពនេះ។ លោក បានទទូចឲ្យប្រទេសក្រីក្រ ត្រូវមានគោលនយោបាយគ្រប់ជ្រុងជ្រោយ និងកម្មវិធីគាំទ្រច្បាស់លាស់ដើម្បីធានាពីភាពកាន់តែល្អប្រសើរនៃការគ្រប់គ្រងបំណុល និងការអភិវឌ្ឍក្នុងលក្ខណៈម៉ាក្រូទៀត។
លោក ក៏បានអះអាងពីការប្តេជាចិត្តរបស់កម្មវិធីអភិវឌ្ឍរបស់អង្គការសហប្រជាជាតិក្នុងការបន្តការងាររឹងមាំ ជាមួយនឹងរដ្ឋាភិបាល អង្គការអន្តរជាតិ ភ្នាក់ងារអង្គការសហប្រជាជាតិ វិស័យឯកជន និងអ្នកពាក់ព័ន្ធនានា ដើម្បីនាំយកការអភិវឌ្ឍ និងដើម្បីជួយសម្រាលបន្ទុកបំណុលរបស់ប្រទេសក្រីក្របំផុតរបស់ពិភពលោកផងដែរ៕
Tag:
បំណុល
UN
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
