អន្តរជាតិ
ក្រោយទទួលភ្លើងខៀវ វៀតណាមនាំចេញផ្លែស្វាយជំហានដំបូងចូលផ្សារអាមេរិក រូបភាព៖ Vnexpress
× វៀតណាម បាននាំចេញស្វាយជំហានដំបូងចំនួន ៨ តោនទៅកាន់ទីផ្សារអាមេរិក ក្រោយពីទទួលភ្លើងខៀវពីភាគីអាមេរិក។ វៀតណាម បានទទួលសិទ្ធិក្នុងការនាំចេញផ្លែស្វាយទៅកាន់អាមេរិកនេះ បន្ទាប់ពីភាគីទាំងពីរបានចរចាគ្នាអស់រយៈពេលមួយទសវត្សរ៍។
ផ្លែស្វាយរាប់តោន ដែលដឹកជញ្ជូនតាមនាវាពីខេត្ត Dong Thap ក្នុងតំបន់ដីសណ្តរទន្លេមេគង្គ កាលពីថ្ងៃព្រហស្បតិ៍ទី ១៨ ខែមេសា ត្រូវបានផ្តល់ Barcode ដើម្បីត្រួតពិនិត្យប្រភពដើមនៃទំនិញ ដោយភ្នាក់ងារត្រួតពិនិត្យសុខភាពសត្វ និងផ្លែឈើអាមេរិក។ នេះបើតាមការចុះផ្សាយរបស់សារព័ត៌មាន Vietnam Express ។
ផ្លែស្វាយទាំងនេះ ត្រូវបានដាំដុះដោយពុំប្រើប្រាស់សារធាតុគីមីការពារណាមួយ ដើម្បីឲ្យត្រូវតាមស្តង់ដារអនាម័យ និងគុណភាពរបស់អាមេរិក។ ខេត្ត Dong Thap ដែលស្ថិតនៅភាគខាងត្បូងប្រទេសវៀតណាមក្នុងតំបន់ដីសណ្តរទន្លេមេគង្គ មានផ្ទៃដីដាំដុះផ្លែស្វាយចំនួន ៩៣០០ ហិកតា និងទទួលទិន្នផលផ្លែស្វាយប្រមាណ ១២៧ ០០០តោនក្នុងមួយឆ្នាំៗ។
កាលពីខែកុម្ភៈកន្លងទៅ សហរដ្ឋអាមេរិក បានផ្តល់ភ្លើងខៀវដល់វៀតណាមក្នុងការមានសិទ្ធិនាំចេញផ្លែស្វាយទៅកាន់ទីផ្សារដ៏ធំរបស់ខ្លួន ក្រោយចរចាអស់ពេល១០ឆ្នាំ។ នេះ គឺជាសមទ្ធិផលធំមួយរបស់វៀតណាម ក្នុងការស្វែងរកទីផ្សារដ៏ធំបំផុតមួយ ខណៈទីផ្សារអាមេរិក មិនងាយទទួលយកការនាំចូលពីបរទេសនោះ។
ផ្លែស្វាយ គឺផ្លែឈើស្រស់ទីប្រាំហើយ ដែលទទួលបានអាជ្ញាបណ្ណ និងសិទ្ធិផ្លូវការក្នុងការនាំចេញទៅកាន់ទីផ្សារអាមេរិក បន្ទាប់ពី ផ្លែស្រកានាគ ផ្លែសាវម៉ាវ ផ្លែមៀន ផ្លែគូលែន និងផ្លែម្ខុត។ សហរដ្ឋអាមេរិក គឺអតិថិជនដែលបញ្ជាទិញផលិតផលកសិកម្មធំបំផុតលំដាប់ទីបួនរបស់វៀតណាម កាលពីឆ្នាំ២០១៨ ដែលស្មើនឹង ១០,៧ភាគរយ នៃការនាំចេញសរុប តាមពីក្រោយចិន សហភាពអឹរ៉ុប និងអាស៊ាន។
បើតាម Vietnam Express ផលិតកម្មផ្លែស្វាយប្រមាណ៩៦ភាគរយរបស់វៀតណាម ត្រូវបានចែកចាយ និងទទួលទាននៅក្នុងស្រុក។ ហើយមកត្រឹមពេលនេះ វៀតណាម បាននាំចេញផ្លែស្វាយទៅកាន់៤០ប្រទេសរួចហើយ ក្នុងនោះរួមមានកូរ៉េខាងត្បូង, ជប៉ុន, សិង្ហបុរី , អូស្ត្រាលី, អូស្ត្រាលី, នូវែលសេឡង់, ចិន និងថៃ ជាដើម៕
Tag:
វៀតណាម
សហរដ្ឋអាមេរិក
ពាណិជ្ជកម្ម
ស្វាយ
© រក្សាសិទ្ធិដោយ thmeythmey.com