ជាតិ
២៥ខេត្ត/រាជធានី
អ្នកភូមិនាំគ្នាធ្វើត្រសក់ចាវ, ជ្រក់មមាញ, ខ្ទឹមត្រាំ…លក់ឲ្យទេសចរដែលទៅលេងសួនផ្កាឈូករ័ត្ន
× ត្បូងឃ្មុំ៖ សួនផ្កាឈូករ័ត្ន នៅក្នុងខេត្តត្បូងឃ្មុំ បានទាក់ទាញទេសចរទីជិតឆ្ងាយ ទៅកម្សាន្តជា ហូរហែ។ មិនត្រឹមតែជាទីតាំងទេសចរណ៍ដ៏ទាក់ទាញ ប៉ុណ្ណោះទេ សួនផ្កាឈូករ័ត្ន បានជំរុញឲ្យអ្នកភូមិនាំគ្នាធ្វើ ត្រសក់ចាវ, ជ្រក់មមាញ, ខ្ទឹមត្រាំ, ម្ទេសត្រាំ និងពោតស្ងោរជាដើម លក់ឲ្យ ទេសចរ ដែលទៅលេងកម្សាន្តនៅសួនផ្កាឈូករ័ត្ននេះ។
សួនផ្កាឈូករ័ត្ន និងផ្កាស្បៃរឿងដែលស្ថិតនៅភូមិជីរោទិ៍ក្រោមទី២ ឃុំជីរោទិ៍ទី១ ស្រុកត្បូងឃ្មុំ ខេត្តត្បូងឃ្មុំ បានក្លាយជាទីតាំងទេសចរណ៍ដ៏ទាក់ទាញមួយ សម្រាប់ខេត្តថ្មីនេះ។ ជារៀងរាល់ថ្ងៃ សួនផ្កាដែលត្រូបានដាំដុះលើផ្ទៃដីប្រមាណ៥ហិកតានេះ បានទាក់ទាញទេសចរពីទីជិត ទីឆ្ងាយ និងតាមបណ្តាខេត្តនានាផង ឲ្យចូលទស្សនា និងថតរូប ឥតដែលដាច់ឡើយ។
សួនផ្កាឈូករ័ត្ន មិនត្រឹមតែជាកន្លែងកម្សាន្តសម្រាប់ទេសចរប៉ុណ្ណោះទេ ប៉ុន្តែវាក៏បានបង្កើតនូវមុខរបរលក់ដូរបន្ថែម ដល់ប្រជាពលរដ្ឋនៅក្នុងភូមិដែរ។ រយៈពេលប្រមាណ២ឆ្នាំហើយ ដែលប្រជាពលរដ្ឋនៅក្នុងភូមិ ពិសេសអ្នកដែលមានផ្ទះនៅតាមបណ្តោយផ្លូវ ទៅកាន់សួនឈូករ័ត្នតែម្តង បាននាំគ្នាធ្វើត្រសក់ចាវ, ជ្រក់មមាញ, ខ្ទឹមត្រាំ, ម្ទេសត្រាំ និងពោតស្ងោរជាដើម ដើម្បីលក់ឲ្យទេសចរ។ ចំនួនអ្នកលក់ ក៏កើនឡើងព្រោងព្រាតផងដែរ។
កញ្ញា មួយទាង ជាអ្នកលក់មួយរូប បានប្រាប់ThmeyThmey25 ថា កញ្ញា អាចលក់ដាច់បានច្រើន នៅថ្ងៃចុងសប្តាហ៍ និងបុណ្យទានម្តងម្កាល។ ជាមធ្យម មួយទាង អាចលក់ ត្រសក់ចាវ, ម្ទេសត្រាំ,ខ្ទឹមត្រាំ និងមមាញជ្រក់ បានចន្លោះពី ៥ ទៅ៧ក្រឡ អាស្រ័យទៅលើចំនួនភ្ញៀវ។ បើតាមអ្នកលក់ដដែល ត្រសក់ត្រាំ,ខ្ទឹមត្រាំ មួយក្រឡតូចតម្លៃ៦ពាន់រៀល,មមាញជ្រក់ក្រឡធំ តម្លៃ៧ពាន់ ទៅ៨ពាន់រៀល។
អ្នកស្រី ឡាយ សុខ យ៉េង ដែលទើបតែប្រកបរបរនេះថ្មីថ្មោងនោះ មានសម្តែងក្តីសប្បាយ ដោយសារតែអ្នកស្រី អាចទទួលបានចំណូលបន្ថែម ដើម្បីដោះស្រាយជីវភាព។ ក្រៅតែពីធ្វើ ធ្វើត្រសក់ត្រាំ,ជ្រក់ខ្ទឹម អ្នកស្រីក៏បានប្រមូលទិញដំណាំហូបផ្លែមួយចំនួនទៀតដែលមាននៅក្នុងភូមិ មកលក់ដែរ។
អ្នកភូមិម្នាក់ទៀតនេះ ក៏ទទួលបានចំណូលបន្ថែមពីការលក់ត្រសក់ចាវត្រាំដែរ។ ទើបតែលក់បានប្រហែល១ខែ អ្នកស្រី ទឺម វ៉ា បានប្រាប់ThmeyThmey25 ថា ពីដំបូងអ្នកស្រីធ្វើត្រឹមតែ ១០គីឡូត្រសក់តែប៉ុំណ្ណោះក្នុងមួយថ្ងៃ តែសព្វថ្ងៃអ្នកស្រីបង្កើនដល់១០០គីឡូក្រាម ដោយសារមានកំណើនភ្ញៀវទេសចរ និងមានមកទិញច្រើនជាងមុន។
លោក ប៉ត សុផល ដែលជាម្ចាស់ចម្ការផ្កាឈូករ័ត្ន ថ្លែងប្រាប់ ThmeyThmey25 លោកពិតរីករាយខ្លាំងណាស់ នៅពេលដែលចំនួនភ្ញៀវទេសចរចូលមកទស្សនាសួនផ្កាយ៉ាងច្រើនកុះករ។
កំណើនទេសចរ ក៏បានរួមចំណែកចែកភាគលាភដល់អ្នកភូមិដែរ។ នេះជាការបន្ថែមរបស់លោក សុផល ដោយលោកបានបន្តថា នៅដើមខែមេសាកន្លងទៅ មានរថយន្តជាង៣០០គ្រឿង និងម៉ូតូជាង៤០០គ្រឿង បានចូលទៅទស្សនាចម្ការផ្ការបស់ខ្លួន ក្នុងមួយថ្ងៃៗ៕
Tag:
ត្រសក់ត្រាំ
ឈូករ័ត្ន
មុខរបរ
ត្បូងឃ្មុំ
ThmeyThmey25
© រក្សាសិទ្ធិដោយ thmeythmey.com