កីឡាករកម្ពុជា៨រូបត្រូវប្រជែងជាមួយថៃ ដណ្តើមថវិកា១ម៉ឺនដុល្លារ នៅភីអិនអិន

កីឡាជាតិ

ជាតិ

កីឡាករកម្ពុជា៨រូបត្រូវប្រជែងជាមួយថៃ ដណ្តើមថវិកា១ម៉ឺនដុល្លារ នៅភីអិនអិន

22, Apr 2019 , 8:29 am

រូបភាព

កីឡាករកម្ពុជាទាំង៨នាក់ដែលត្រូវប្រជែងជាមួយថៃ

ដោយ:

កីឡាករជើងខ្លាំងរបស់កម្ពុជា៨រូប នឹងត្រូវប្រជែងជាមួយកីឡាករថៃ៨រូបផ្សេងទៀត ដើម្បីដណ្តើមខ្សែក្រវាត់មាសនិងថវិកា១ម៉ឺនដុល្លារក្នុងកម្មវិធីប្រដាល់របស់ស្ថានីយទូរទស្សន៍ភីអិនអិន ដែលនឹងបើករជ្ជកាលថ្មីឡើងវិញនៅអំឡុងខែឧសភា ឆ្នាំ២០១៩ខាងមុខ។ លោក ស្រ៊ឺ ស្រេង (សំណព្វ) ប្រធានផ្នែកព័ត៌មានកីឡារបស់ភីអិនអិនអះអាងថា សមាសភាពកីឡាករថៃ ដែលត្រូវប្រជែងជាមួយកីឡាករកម្ពុជាសុទ្ធសឹងជាកីឡាករមានសមត្ថភាពខ្ពស់ ដែលអាចធ្វើឲ្យការប្រកួតកាន់តែមានភាពស្វិតស្វាញ។

ក្រោយផ្អាកអស់រយៈពេលជាង១ឆ្នាំ កម្មវិធីប្រកួតប្រដាល់របស់ស្ថានីយទូរទស្សន៍ភីអិនអិន នឹងបើករជ្ជកាលថ្មីរបស់ខ្លួនឡើងវិញនៅអំឡុងខែឧសភា ឆ្នាំ២០១៩ខាងមុខនេះ។ រជ្ជកាលថ្មីនេះ នឹងមានការផ្លាស់ប្តូររូបមន្តប្រកួតមួយចំនួន ដែលធ្វើឲ្យមានការទាក់ទាញ ប្លែក និងមានភាពស្វិតស្វាញជាងមុន។

ជាមួយការបើករជ្ជកាលថ្មីនេះ ភីអិនអិនបានជ្រើសរើសកីឡាករកម្ពុជាចំនួន៨រូបរួមមាន ឃឹម ឌីម៉ា, ឡៅ ចិត្រា, កូយ ឡាយ, លន បញ្ញា, សុខ សាវិន, សារឿន ចន្ទ, ឡុង ជិន, និង ធន មករា ដោយពួកគេត្រូវប្រជែងជាមួយកីឡាករថៃ៨រូបផ្សេងទៀត។ តែយ៉ាងណាសមាសភាពកីឡាករថៃទាំង៨រូប មិនទាន់ត្រូវបានបង្ហាញមុខនៅឡើយទេ។ តែលោក ស្រ៊ឺ ស្រេង ប្រធានផ្នែកព័ត៌មានកីឡារបស់ភីអិនអិនអះអាងថា ពួកគេមានសមត្ថភាពខ្ពស់ និងភាគច្រើនមិនធ្លាប់មកប្រកួតនៅកម្ពុជាឡើយ។

«យើងប្រើភាសាថាខ្លាំងតែម្តងក៏មិនបានដែរ តែយើងនឹងព្យាយាមរកកីឡាករថៃណាដែលថ្មីៗមិនសូវមកវាយនៅខ្មែរ ហើយមានសមត្ថភាពប្រហាក់ប្រហែលកីឡាករខ្មែរយើង។ និយាយរួមធ្វើយ៉ាងម៉េចវាយឲ្យល្អមើល តាំងពីទឹកទី១ដល់ទឹកទី៥»។ នេះជាការអះអាងរបស់លោក ស្រ៊ឺ ស្រេង។

សម្រាប់ការប្រកួតប្រើរូបមន្តចាញ់ធ្លាក់ ពោលគឺកីឡាករកម្ពុជាទាំង៨រូបត្រូវប៉ះជាមួយកីឡាករថៃរៀងៗខ្លួន ហើយអ្នកឈ្នះនឹងឡើងទៅប្រកួតវគ្គបន្ត ហើយរូបមន្តនេះ នឹងអនុវត្តរហូតដល់វគ្គផ្តាច់ព្រ័ត្រ។ មុនឈានដល់ប្រកួតដណ្តើយកខ្សែក្រវាត់មាស និងថវិកា១ម៉ឺនដុល្លារ គឺកីឡាករទាំងនេះត្រូវប្រជែងគ្នាដណ្តើមយកខ្សែក្រវាត់ប្រចាំខែជាមុនសិន។ ហើយម្ចាស់ឯកប្រចាំខែនីមួយៗនឹងឡើងទៅប្រកួតវគ្គពាក់កណ្តាលផ្តាច់ព្រ័ត្រ និងផ្តាច់ព្រ័ត្រតែម្តង។ នេះបើតាមការបញ្ចាក់របស់លោក សំណព្វ។

តាមរយៈការផ្លាស់ប្តូររូបមន្តប្រកួត និងការបង្កើនប្រាក់រង្វាន់លើកទឹកចិត្ត ប្រធានផ្នែកព័ត៌មានកីឡារូបនេះជឿជាក់ថា កីឡាករនឹងវាយឲ្យអស់ពីសមត្ថភាព ដែលធ្វើឲ្យការប្រកួតកាន់តែមានភាពតានតឹងនិងស្វិតស្វាញ។ សម្រាប់ លោក ការធ្វើបែបនេះមិនប្រាកដថាកីឡាករកម្ពុជាជាអ្នកគ្រងជើងឯក១០០ភាគរយនោះទេ ពោលគឺអាចកីឡាករកម្ពុជាប៉ះកម្ពុជា ឬថៃប៉ះថៃនៅវគ្គផ្តាច់ព្រ័ត្រក៏មានដែរ។

សម្រាប់ការប្រកួតកីឡាប្រដាល់គុនខ្មែរដណ្តើមខ្សែក្រវាត់ ISI Palm ទម្ងន់៦០គីឡូក្រាមអមជាមួយថវិកា១ម៉ឺនដុល្លាររបស់ភីអិនអិន នឹងចាប់ផ្តើមប្រកួតនៅថ្ងៃទី១២ ខែឧសភា ឆ្នាំ២០១៩ ដោយក្នុងមួយសប្តាហ៍មានការប្រកួតចំនួន៤គូ គឺប្រកួតមិត្តភាពអន្តរជាតិ៣ និងគូដណ្តើមខ្សែក្រវាត់១គូ៕