ការសិក្សាមួយនៅស្វីស៖ រោមឆ្កែ ផ្ទុកបាក់តេរី តិចជាងពុកចង្ការរបស់មនុស្ស

អន្តរជាតិ

ការសិក្សាមួយនៅស្វីស៖ រោមឆ្កែ ផ្ទុកបាក់តេរី តិចជាងពុកចង្ការរបស់មនុស្ស

21, Apr 2019 , 6:29 pm

រូបភាព

ដោយ: ធីតា

ពុកចម្ការរបស់មនុស្សជាប្រភពនៃបាក់តេរី ដែលប្រឈមកើតជំងឺជាច្រើន។ នេះបើតាមការសិក្សារបស់ក្រុមអ្នកជំនាញនៅគ្លីនិក Hisladen ក្រុងហ្សួរិច ប្រទេសស្វីស ដោយប្រៀបធៀបឃើញផងដែរថា រោមរបស់សត្វសុនខ មានហានីភ័យចំពោះសុខភាពតិចជាង។

ក្រុមអ្នកសិក្សា បានយកសំណាកពុកចង្ការរបស់មនុស្សប្រុសចំនួន១៨នាក់ អាយុចន្លោះពី១៨ ទៅ៧៦ឆ្នាំ ទៅប្រៀបរោមឆ្កែ ៣០ក្បាល។ លទ្ធផលបានបង្ហាញថា ពុកចម្ការរបស់មនុស្សទាំងអស់សុទ្ធតែមានមេរោគ ក្នុងនោះ ៧នាក់ ឈានដល់ការប្រឈមផ្នែកសុខភាព។ ចំណែកសុនខវិញ មាន២៣ក្នុងចំណោម៣០ក្បាលដែលមានបាក់តេរី ប៉ុន្តែមិនមានកម្រិតដូចពុកចម្ការរបស់មនុស្សឡើយ។

លោក Andreas Gutzeit ដែលស្ថិតក្នុងចំណោមអ្នកដឹកនាំការសិក្សា បានអះអាងថា គោលដៅសំខាន់ ក្រុមអ្នកសិក្សាចង់ដឹងពីកម្រិតនៃការឆ្លងមេរោគ តាមរយៈទំនាក់ទំនងរវាងមនុស្ស និងសត្វ។ «តាមលទ្ធផលមូលដ្ឋាននៃការសិក្សានេះ យើងបែរជារកឃើញថា រោមឆ្កែត្រូវបានចាត់ទុកថា ស្អាតជាង ប្រើប្រៀបធៀបទៅនឹងពុកចម្ការរបស់មនុស្ស»។ នេះជាការអះអាងរបស់លោក Gutzeit។

លទ្ធផលបែបនេះ មិនបានធ្វើឲ្យអ្នកមានពុកមាត់ និងពុកចង្ការសប្បាយចិត្តនោះឡើយ។ ពួកគេទទួលស្គាល់ថា អ្នកខ្លះពិតជាមិនបានយកចិត្តទុកដាក់សម្អាតពុកចម្ការរបស់ខ្លួន ប៉ុន្តែក៏មិនរហូតទៅដល់អន់ជាងរោមសត្វឆ្កែនោះដែរ។

លោក Keith Flett ដែលជាអ្នកចូលទុកពុកចង្ការម្នាក់បាននិយាយប្រាប់ Daily Mail ថា អ្នកខ្លះមិនសូវសម្អាតពុកចម្ការរបស់ខ្លួន ដោយសារតែមានការរើសអើងនៅកន្លែងការងារ។ ប៉ុន្តែលោកចង់ឃើញការសិក្សាឲ្យបានស៊ីជម្រៅ មុននឹងសន្និដ្ឋានថា ពុកចង្ការមនុស្សគ្មានអនាម័យ។

កាលពីដើមឡើយ អ្នកមានពុកមាត់ និងពុកចង្ការវែងៗ ត្រូវបានចាត់ទុកជាអ្នកសិក្សាខ្ពង់ខ្ពស់ ជាអ្នកប្រាជ្ញ និងក្លៀវក្លា ប៉ុន្តែសម័យកាលបច្ចុប្បន្ន ការទុកពុកមាត់ ឬពុកចង្ការភាគច្រើន ជាផ្នែកមួយនៃការតុបតែងខ្លួន៕