ជាតិ
សម្ដេច ហ៊ុន សែន ស្នើឲ្យលោក ប្រាយុទ្ធ ចន្ទអូចា បើកច្រកព្រំដែន៤បន្ថែមទៀត ដើម្បីជំរុញទំហំពាណិជ្ជកម្ម
× ភ្នំពេញ៖ ពីពិធីចាក់បេតុងតភ្ជាប់មុខតំណស្ពានមិត្តភាពកម្ពុជា-ថៃ (ស្ទឹងបត់-បានណងអៀន) នៅព្រឹកថ្ងៃទី២២ មេសា សម្ដេចនាយករដ្ឋមន្ត្រី ហ៊ុន សែន បានស្នើឲ្យលោក ប្រាយុទ្ធ ចន្ទអូចា ពិចារណាបើកច្រកព្រំដែន៤បន្ថែមទៀត ដើម្បីជំរុញទំហំពាណិជ្ជកម្មរវាងប្រទេសទាំងពីរ។
មុនឡើងថ្លែងសន្ទរកថា ប្រមុខរដ្ឋាភិបាលទាំងពីរ បានដើរត្រួតពិនិត្យលើសំណង់ស្ពាន និងការដ្ឋានសាងសង់អគារច្រកទ្វារព្រំដែនអន្តរជាតិស្ទឹងបត់នោះ សម្ដេច ហ៊ុន សែន ក៏ឆ្លៀតឱកាសប្រាប់ទៅលោក ប្រាយុទ្ធ ពីបំណងចង់បើកច្រកព្រំដែនបន្ថែមទៀត ក្នុងការទាញយកផលប្រយោជន៍សេដ្ឋកិច្ចគ្នាទៅវិញទៅមក។
ច្រកព្រំដែន ដែលសម្ដេច ហ៊ុន សែន ស្នើប្រមុខរដ្ឋាភិបាលថៃ បើកដំណើរការនោះរួមមានច្រកអានសេស ខេត្តព្រះវិហារ -និងច្រកអានម៉ា ខេត្តឧប៊ុន ប្រទេសថៃ ។ច្រកភ្នំដី ក្នុងខេត្តបាត់ដំបង និងច្រកខោឌីន ក្នុងខេត្តស្រះកែវ ។ ច្រកថ្មដារ ក្នុងខេត្តពោធិ៍សាត់ និងច្រកថាសេន ក្នុងខេត្តស្រះកែវ និងច្រករបៀងជប់គគី ក្នុងខេត្តឧត្តរមានជ័យ និងខេត្តបូរីរ៉ាំ ។
តែយ៉ាងណាសំណើរបស់សម្ដេច ហ៊ុន សែន មិនទាន់មានការឆ្លើយតបបែបណាពីនាយករដ្ឋមន្ត្រីថៃ លោក ប្រាយុទ្ធ ចន្ទអូចា នៅឡើយទេ។
គួរបញ្ជាក់ថា បច្ចុប្បន្នទំហំពាណិជ្ជកម្មកម្ពុជា-ថៃ មានជាង៧ពាន់លានដុល្លារអាមេរិក ដោយក្នុងនោះថៃនាំចូលមកកម្ពុជា មានទំហំជាង៦ពាន់លានដុល្លារ ខណៈកម្ពុជានាំចេញទៅថៃប្រមាណ១ពាន់លានដុល្លារប៉ុណ្ណោះ។ ផលិតផល ដែលកម្ពុជា នាំចេញទៅថៃ ភាគច្រើនជាកសិផល រួមមានដូចជា ពោត ដំឡូងមី សណ្តែកជាដើម។ ចំណែកថៃនាំចូលមកកម្ពុជាវិញ មានដូចជា គ្រឿងចក្រ ឧបករណ៍អេឡិចត្រូនិច ប្រេងឥន្ធនៈ សម្ភារៈសំណង់ គ្រឿងឧបភោគបរិភោគ គ្រឿងសម្អាង សម្ភារៈប្រើប្រាស់ក្នុងផ្ទះជាដើម។ រដ្ឋាភិបាលប្រទេសទាំងពីរ ក៏គ្រោងពង្រីកទំហំពាណិជ្ជកម្មឲ្យកើនឡើងដល់១៥ពាន់លានដុល្លារ នៅឆ្នាំ២០២០ទៀតផង៕
Tag:
ហ៊ុន សែន
ប្រាយុទ្ធ ចន្ទអូចា
សេដ្ឋកិច្ច
© រក្សាសិទ្ធិដោយ thmeythmey.com