Tesla ទៅចិនស៊ើបអង្កេតវីដេអូបង្ហាញពីការផ្ទុះឆេះរថយន្តខ្លួននៅចំណតក្នុងក្រុងសៀងហៃ

រថយន្ត

អន្តរជាតិ

22, Apr 2019 , 8:19 pm

រូបភាព

ដោយ:

ក្រុមហ៊ុនផលិតរថយន្តអគ្គិសនីអាមេរិក Tesla Inc បានឲ្យដឹងថា ខ្លួនបានបញ្ជូនក្រុមអ្នកជំនាញមួយក្រុមទៅស៊ើបអង្កេតវីដេអូមួយ ដែលបង្ហោះលើបណ្តាញសង្គមចិន។ ក្នុងវីដេអូនេះ បានបង្ហាញពីទិដ្ឋភាពរថយន្ត Tesla ម៉ូដែល S ផ្ទុះឆេះឡើងនៅចំណតយានយន្តមួយកន្លែងក្នុងទីក្រុង សៀងហៃ។

វីដេអូ ដែលមានរយៈពេលត្រឹម ២៣វិនាទីមួយ ត្រូវបានចែករំលែកយ៉ាងច្រើនលើបណ្តាញសង្គម Weibo របស់ចិន ស្រដៀងនឹង Twitter ដោយអមជាមួយនឹង #"Tesla self-ignites" ។ ភ្លាមៗ វីដេអូនេះ ក្លាយជាប្រធានបទក្តៅគគុកមួយ ដែលមានអ្នកចូលមើលច្រើនដល់ទៅ ៥លានដង។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters ។

យោងតាមវីដេអូនេះ រថយន្ត Tesla ម៉ូដែល S មួយគ្រឿង ចាប់ផ្តើមហុយផ្សែងខ្មៅចេញពីផ្នែកខាងក្រោមរបស់វា មុននឹងផ្ទុះ និងឆេះទៅជាអណ្តាតភ្លើង ហើយធ្វើឲ្យខូចខាតឡាននៅជុំវិញនោះផងដែរ។ សម្រាប់ពេលវេលា ដែលបង្ហាញនៅលើវីដេអូនោះ ហេតុការណ៍បានកើតឡើងកាលពីល្ងាចថ្ងៃអាទិត្យទី ២១ ខែមេសា។

Good or bad, negative or positive I will post anything about Tesla or EVs in China. This happened today in Shanghai, China 1st generation Tesla Model S caught Fire underground car park.#Tesla #TeslaChina #ModelS #Fire #China #Shanghai #特斯拉 #中国 $TSLA pic.twitter.com/HOwMcvulV1
— Jay in Shanghai (@ShanghaiJayin) April 21, 2019

សរសេរលើគណនី Weibo ផ្លូវការរបស់ខ្លួន ក្រុមហ៊ុន Tesla លើកឡើងថា បន្ទាប់ពីដឹងពីហេតុការណ៍ផ្ទុះនៅក្នុងក្រុងសៀងហៃនេះ ក្រុមហ៊ុនបានបញ្ជូនក្រុមការងារភ្លាមៗទៅកាន់កន្លែងកើតហេតុ។ ខណៈពេលនេះ ក្រុមហ៊ុន ក៏ទាក់ទងទៅកាន់នាយកដ្ឋានពាក់ព័ន្ធ ដើម្បីរកមូលហេតុនៃការផ្ទុះឆេះនេះ។ យ៉ាងណាមិញ ដោយផ្អែកលើព័ត៌មានបច្ចុប្បន្ន ការផ្ទុះនេះ ពុំមានបង្កឲ្យមនុស្សណាម្នាក់រងរបួសអ្វីឡើយ។

សូមបញ្ជាក់ថា ចាប់តាំងពីឆ្នាំ២០១៣ មក រថយន្តអគ្គិសនី Tesla យ៉ាងហោចណាស់ ១៤គ្រឿង បានផ្ទុះឆេះឡើង ជាពិសេស កើតឡើងក្រោយពីជួបគ្រោះថ្នាក់ចរាចរណ៍រួច។ ក្រុមហ៊ុននេះ ធ្លាប់អះអាងថា រថយន្តអគ្គិសនី Tesla ម៉ូដែល EVs របស់ខ្លួន មិនងាយនឹងបង្កជាការឆាបឆេះល្អជាងរថយន្តប្រើឥន្ធនៈនានា ដល់ជាង១០ដងឯណោះ។ នេះបើយោងតាមការដកពិសោធន៍លើរថយន្តជាង ៥០ម៉ឺនគ្រឿងរបស់ខ្លួន ដែលបានបើកបរក្នុងចម្ងាយផ្លូវរាប់លានគីឡូម៉ែត្រមកហើយនោះ៕