អន្តរជាតិ
សាកលវិទ្យាល័យស្កុតឡែន ដកសញ្ញាបត្រកិត្តិយសពីក្សត្រព្រុយណេ ព្រោះច្បាប់ប្រឆាំងអ្នកស្រលាញ់ភេទដូចគ្នា
× សាកលវិទ្យាល័យដ៏ល្បីល្បាញមួយរបស់ស្កុតឡែន បានសម្រេចបញ្ចប់សុពលភាពសញ្ញាបត្រកិតិ្តយសរបស់ព្រះមហាក្សត្រព្រុយណេ Hassanal Bolkiah។ សេចក្តីសម្រេចរបស់សាកលវិទ្យាល័យមួយនេះ ធ្វើឡើងដើម្បីឆ្លើយតបនឹងការចេញច្បាប់ថ្មីតឹងរ៉ឺងប្រឆាំងនឹង«អ្នកស្រលាញ់ភេទដូចគ្នា»របស់ព្រះមហាក្សត្រព្រុយណេកាលពីពេលថ្មីៗនេះ។
អស់រយៈពេលជិតពីរសប្តាហ៍សម្រាប់ការពិនិត្យលើច្បាប់ប្រឆាំងនឹងអ្នកស្រលាញ់ភេទដូចគ្នារបស់ព្រុយណេ សាកលវិទ្យាល័យ Aberdeen របស់ស្កុតឡែន បានសម្រេចជាផ្លូវការក្នុងការមោឃភាពសញ្ញាបត្រកិត្តិយសរបស់ព្រះមហាក្សត្រព្រុយណេ Hassanal Bolkiah ដែលសាកលវិទ្យាល័យបានផ្តល់តាំងពីឆ្នាំ១៩៩៥មកនោះ។ នេះបើយោងតាមការចុះផ្សាយរបស់សារព័ត៌មាន BBC នៅថ្ងៃ១៧ មេសាកន្លងទៅ។
តាមសេចក្តីប្រកាសព័ត៌មានរបស់សាកលវិទ្យាល័យ Aberdeen គិតចាប់ពីការប្រកាសដាក់ឲ្យប្រើប្រាស់ច្បាប់ប្រឆាំងអ្នកស្រលាញ់ភេទដូចគ្នាសនេះមក មានភាពប្រទាំងប្រទើសអន្តរជាតិខ្លាំង ហើយជាលទ្ធផលសាកលវិទ្យាល័យតាមរយៈការបោះឆ្នោតដោយមានការចូលរួមពីសមាជិកព្រឹសទ្ធភា, ក្រុមប្រឹក្សាសាកលវិទ្យាល័យ និងគណៈកម្មាធិការវាយតម្លៃសញ្ញាបត្រកិត្តិយស សម្រេចមោឃភាពសញ្ញាបត្ររបស់ប្រមុខរដ្ឋព្រុយណេជាផ្លូវការ។
សេចក្តីប្រកាស បានបន្តថា សាកលវិទ្យាល័យ មានមោទកភាព ក្នុងការបង្កើតមូលនិធិក្នុងការផ្តល់កិត្តិយសសម្រាប់អ្នកដែលផ្តល់ភាពស្មោះត្រង់ក្នុងការផ្តល់សេវាទៅកាន់អ្នកដទៃ ក៏ប៉ុន្តែការដាក់ឲ្យប្រើប្រាស់ច្បាប់ប្រឆាំងអ្នកស្រលាញ់ភេទដូចគ្នា គឺជារឿងមួយដ៏គួរឲ្យសោកស្តាយ ហើយបានប្រាសចាកទៅនឹងគុណតម្លៃ និងការប្តេជ្ញាចិត្តរបស់សាកលវិទ្យាល័យ។
គួររម្លឹកថា នៅថ្ងៃ៣ មេសាកន្លងទៅ ព្រះមហាក្សត្រព្រុយណេ បានប្រកាសឲ្យប្រើប្រាស់ក្រមព្រហ្មទណ្ឌថ្មី ដែលមានចែងពីការដាក់ទោសយ៉ាងធ្ងន់ធ្ងរដែលភាគច្រើនជាបទល្មើសផ្ទុយពីសាសនាឥស្លាម។ ក្នុងនោះ ក៏រាប់បញ្ចូលទាំងទោសបញ្ញត្តិប្រឆាំងនឹងអ្នកស្រលាញ់ភេទដូចគ្នាផងដែរ។
ជាក់ស្តែងតាមបញ្ញត្តិនៃក្រមព្រហ្មទណ្ឌថ្មីនេះ ការរួមភេទរវាងបុរសនិងបុរស នឹងត្រូវប្រហារជីវិតដោយការគប់ដុំថ្ម ដូចគ្នានឹងទោសសហាយស្មន់ដែរ។ ចំណែកការរួមភេទរវាងស្ត្រី និងស្ត្រី មិនមែនជាទោសស្លាប់ឡើយ តែត្រូវជាប់ពន្ធនាគារដល់ទៅ១០ឆ្នាំ ឬក៏ត្រូវវាយ៤០រំពាត់៕
© រក្សាសិទ្ធិដោយ thmeythmey.com