ជាតិ
សេដ្ឋកិច្ច
អំបិលកំពតជាង១០០តោនត្រូវនាំចេញទៅកាន់ទីផ្សារអឺរ៉ុបនៅចុងខែមេសានេះ
× ភ្នំពេញ៖ ក្រុមហ៊ុនខ្មែរ Confirel នឹងនាំចេញអំបិល១០៨តោនទៅកាន់ទីផ្សារនៅក្នុងប្រទេសបារាំងនៅចុងខែមេសាឆ្នាំ២០១៩នេះ។ ការនាំចេញនេះ បានធ្វើឡើងបន្ទាប់ពីអតិថិជននៅក្នុងប្រទេសបារាំងត្រូវការអំបិលដែលផលិតដោយដៃជាលក្ខណៈប្រពៃណីនៅក្នុងប្រទេសកម្ពុជា ជាពិសេស អំបិលនៅក្នុងខេត្តកំពត។ គុណភាពអំបិលរបស់ខ្មែរនៅក្នុងខេត្តកំពតបានឆ្លើយតបយ៉ាងត្រឹមត្រូវបំផុតទៅនឹងលក្ខខណ្ឌរបស់សហគមន៍ស្រែអំបិលនៅឃុំ ហ្គេរ៉ង់ នៃប្រទេសបារាំងដែលមាន ឈ្មោះថា Les Salines de Guérande។ នេះបើតាមការបញ្ជាក់របស់ក្រុមហ៊ុនខ្មែរ Confirel នៅថ្ងៃចន្ទទី២២ខែមេសា ។
អំបិល១០៨តោននឹងត្រៀមចេញពីកំពង់ផែខេត្តព្រះសីហនុនៃប្រទេសកម្ពុជា ទៅកាន់ទីផ្សារនៃប្រទេសបារាំងនៅថ្ងៃទី២៨ខែមេសាខាងមុខនេះហើយ។ នេះ គឺជាការអះអាងបញ្ជាក់របស់តំណាងក្រុមហ៊ុន Confirel នៅរាជាធានីភ្នំពេញ។ ក្រុមហ៊ុន Confirel និង សហគមន៍ស្រែអំបិលនៅឃុំ ហ្គេរ៉ង់ នៃប្រទេសបារាំងដែលមានឈ្មោះថា Les Salines de Guérande បានសិក្សាលទ្ធភាពនៃការនាំចេញអំបិលរួមគ្នាអស់រយៈពេលជាច្រើនខែមកហើយមុននឹងឈានមកដល់ពេលវេលានៃការនាំចេញទៅកាន់ទីផ្សារនៃប្រទេសបារាំងនៅចុងខែមេសានេះ។ នេះ គឺជាដំណឹងដ៏ល្អមួយក្នុងដំណើរឆ្ពោះទៅជួយដល់ទីផ្សារអំបិលខ្មែរមួយកម្រិតទៀត។
សហគមន៍ស្រែអំបិល ហ្គេរ៉ង់ បារាំង ដែលមានកម្មករ២០០នាក់ លក់ផលិតផលអំបិលរបស់ខ្លួនក្រោមស្លាកសម្គាល់ម៉ាក Le Guérandais។ សហគមន៍នេះមានគម្រោងពង្រីកមុខទំនិញ និងបង្កើតប្រភេទអំបិលមួយទៀត ដើម្បីធ្វើពាណិជ្ជកម្មអំបិលមកពីប្រទេសផ្សេងៗនៅលើពិភពលោក។ អំបិល ហ្គេរ៉ង់ ដែលត្រូវបានគេទទួលស្គាល់ថា ជាអំបិលមួយប្រភេទក្នុងចំណោមអំបិលដែលមានគុណភាពល្អដាច់គេនៅលើពិភពលោក ហើយអំបិលនេះ ត្រូវបានគេណែនាំ និងប្រើដោយចុងភៅលំដាប់ផ្កាយខ្ពស់ៗនៅលើឆាកអន្តរជាតិ។ តាមរយៈភាពល្បីល្បាញរបស់អំបិល ហ្គេរ៉ង់, អំបិល កំពត ក៏នឹងក្លាយទៅជាអំបិលល្បីល្បាញមួយផងដែរនៅលើឆាកអន្តរជាតិ។
អំបិល ហ្គេរ៉ង់ ដែលផលិតនៅក្នុងប្រទេសបារាំងជាលក្ខណៈប្រពៃណីធ្វើដោយដៃ និងអំបិលបានមកពីដៃគូនៅក្រៅប្រទេសដូចជាអំបិលខេត្តកំពតកម្ពុជា គឺជាសុទ្ធសឹងជាអំបិលដែលគុណភាពរបស់វាត្រូវបានធានាជាលក្ខណៈអន្តរជាតិ។ អំបិលរបស់សមាគមន៍ ហ្គេរ៉ង់ ត្រូវបាននាំចេញទៅកាន់ទីផ្សារអន្តរជាតិចំនួន៥៥ប្រទេស៕
Tag:
Confirel
កសិកម្ម
អំបិល
© រក្សាសិទ្ធិដោយ thmeythmey.com