ជាតិ
សេដ្ឋកិច្ច
អចលនទ្រព្យ
រដ្ឋាភិបាលគ្រោងសាងសង់ព្រលានយន្តហោះលើដីជាង ៣០០ហិកតានៅមណ្ឌលគិរី
× ភ្នំពេញ៖ ក្រៅពីភ្នំពេញ ខេត្តព្រះសីហនុ សៀមរាប និងខេត្តកោះកុង រដ្ឋាភិបាលមានផែនការសាងសង់ព្រលានយន្តហោះមួយទៀតនៅខេត្តមណ្ឌលគិរីនៃភាគឦសានប្រទេសកម្ពុជា ដើម្បីជំរុញវិស័យទេសចរណ៍នៃទីតាំងដ៏មានសក្ដានុពលមួយនេះ។
លោក ថោង ខុន រដ្ឋមន្ត្រីក្រសួងទេសចរណ៍ កាលពីពេលថ្មីៗបានបង្ហើបពីគម្រោងសាងសង់ព្រលានយន្តហោះខ្នាតតូចមួយនៅខេត្តមណ្ឌលគិរី បន្ទាប់ពីលោកបានចូលរួមកិច្ចប្រជុំរបស់គណៈកម្មការគោលនយោបាយសេដ្ឋកិច្ច និងហិរញ្ញវត្ថុស្ដីពីគោលនយោបាយអភិវឌ្ឍន៍វិស័យទេសចរណ៍ ដែលរៀបចំឡើងនៅថ្ងៃទី១៨ខែមេសា។
បើតាមលោក ស៊ិន ចាន់សេរីវត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិល រដ្ឋាភិបាលបានឲ្យរដ្ឋបាលខេត្តបម្រុងដីជាង ៣៤០ហិកតារួចហើយសម្រាប់គម្រោងមួយនេះ។ លោកថ្លែងដូច្នេះថា៖«យើងបានធ្វើលិខិតទៅតាមរយៈគណៈរដ្ឋមន្ត្រី សុំបម្រុងទុកដីលើទីតាំងដែលយើងបានឯកភាពគ្នាក្នុងទំហំជាង ៣៤០ហិកតា»។ អ្នកនាំពាក្យរូបនេះសុំមិនបញ្ជាក់ពីទីតាំងច្បាស់លាស់នៃគម្រោងនេះទេ ដោយខ្លាចភាពជ្រួលច្របល់ទីផ្សារដីធ្លី។ លោកប្រាប់ថា ទំហំដីអាចនឹងធំជាងនេះ ខណៈស្ថាប័នជំនាញរបស់រដ្ឋាភិបាលកំពុងស្នើឲ្យបម្រុងដីបន្ថែមលើសនេះ។
លោក ស៊ិន ចាន់សេរីវត្ថា មិនទាន់អាចប្រាប់ពីពេលវេលាសាងសង់ព្រលានមួយនេះបាននោះទេដោយរង់ចាំការសិក្សាគម្រោង។ លោកនិយាយដូច្នេះថា«បន្ទាប់ពីក្រសួងទេសចរណ៍ធ្វើផែនការមេ (Master Plan) អភិវឌ្ឍន៍វិស័យទេសចរណ៍នៅខេត្តមណ្ឌលគិរី ថាកន្លែងណាត្រូវធ្វើអ្វី រួចហើយ យើងនឹងសិក្សាលម្អិតមកទៀតពីការសាងសង់ព្រលានយន្តហោះនៅទីនោះ ហើយត្រូវភ្ជាប់ទីតាំងព្រលានទៅនឹងអ្វីខ្លះ»។
បើតាមក្រសួងទេសចរណ៍ ការសិក្សាផែនការមេអភិវឌ្ឍន៍ទេសចរណ៍នៅមណ្ឌលគិរីនឹងត្រូវប្រើពេលវេលា៦ខែ។ ក្រសួងអះអាងថាខេត្តមណ្ឌលគិរីមានសក្ដានុពលអេកូទេសចរណ៍ដ៏ល្អពិសិដ្ឋ និងមានអាកាសធាតុអំណោយទានសម្រាប់ដាំបន្លែ និងផ្កាសម្រាប់ផ្គត់ផ្គង់ទីផ្សារក្នុងស្រុកផងដែរ។
គម្រោងសាងសង់អាកាសយានដ្ឋានថ្មីនេះ អាចនឹងត្រូវចំណាយថវិការាប់សិបលានដុល្លារ។ លោក ស៊ីន ចាន់សិរីវុត្ថា ថ្លែងដូច្នេះថា៖«បើយើងធ្វើខ្នាត 4C ចំណាយខ្ទង់មិនក្រោម៥០លានដុល្លារ ឬអាច៦០លាន ទៅ១០០លានដុល្លារ»។ លោកបន្ថែមថា រដ្ឋាភិបាលមានជម្រើសពីរ គឺអាចវិនិយោគដោយខ្លួនឯង ដែលអាចខ្ចីលុយពីក្រៅប្រទេសជាដើម ឬមួយស្វែងរកដៃគូបោះទុនពីវិស័យឯកជន៕
Tag:
ព្រលានយន្តហោះមណ្ឌលគិរី
© រក្សាសិទ្ធិដោយ thmeythmey.com