អន្តរជាតិ
លោក ស៊ី ចុះមូលដ្ឋានជំរុញការលុបបំបាត់ភាពក្រីក្រពីសង្គមចិនឲ្យបានត្រឹមឆ្នាំ២០២០ រូបភាព៖ CGTN
× មេដឹកនាំកំពូលចិន លោក ស៊ី ជិនភីង នៅក្នុងសប្តាហ៍នេះបានបំពេញទស្សនកិច្ចតាមមូលដ្ឋានភាគខាងត្បូងនៃប្រទេសដើម្បីពិនិត្យ និងជំរុញការអនុវត្តការងារក្នុងការលុបបំបាត់ភាពក្រីក្រ និងកែប្រែស្ថានភាពប្រជាជន និងតំបន់ទូទាំងប្រទេសរបស់ចិនឲ្យមានការអភិវឌ្ឍ ។ មេដឹកនាំកំពូលរូបនេះ បានសន្យា និងប្តេជ្ញាជាមួយនឹងប្រជាជនក្នុងការសម្រេចឲ្យបានផែនការជាតិមួយនេះឲ្យបានត្រឹមឆ្នាំ២០២០។
ខណៈដែលពេលកំណត់ចុងក្រោយនៃផែនការកែប្រែស្ថានភាពប្រជាជន និងតំបន់ក្រីក្រីឲ្យមានភាពសុខដុម លោក ស៊ី ជិនភីង ប្រធានាធិបតី និងជាអគ្គលេខាធិការបក្សកុម្មុយនីស្តចិន មិនត្រឹមតែដាស់តឿនឲ្យមន្ត្រីគ្រប់លំដាប់ថ្នាក់បន្តខិតខំប្រឹងប្រែងប៉ុណ្ណោះនោះទេ តែលោក បានចុះមូលដ្ឋានដោយផ្ទាល់ដើម្បីជម្រុញការងារសម្រេចបានដោយប្រសិទ្ធភាព និងទាន់ពេលទៀតផង។
តាមការចុះផ្សាយរបស់ភ្នាក់ងារព័ត៌មានចិន Xinhua អំឡុងពេលចុះជួបប្រជាជនតាមមូលដ្ឋាន លោកប្រធានាធិបតី ស៊ី បានថ្លែងថា ឆ្នាំ២០១៩ នេះ គឺជាឆ្នាំដ៏សំខាន់បំផុតមួយនៃបេសកកម្មលើកស្ទួយស្ថានភាពប្រជាជនមួយនេះ ក៏ប៉ុន្តែលោក ក៏បានអះអាងជាមួយគ្នាផងដែរថា លោក នឹងដឹកនាំកិច្ចការដោយមិនរាថយ និងថែមទាំងមានទំនុកចិត្តថា នឹងអាចសម្រេចបានស្របតាមផែនការកំណត់។
ខណៈពណ៌នាការលុបបំបាត់ភាពក្រីក្រដូចជាទៅនឹងការប្រយុទ្ធក្នុងសមរភូមិ បុរសខ្លាំងរបស់ចិនរូបនេះ បានក្រើនរម្លឹកដល់អ្នកពាក់ព័ន្ធទាំងអស់ឲ្យប្រឹងប្រែងឲ្យអស់ពីសមត្ថភាព និងមិនត្រូវបញ្ឈប់ការងារនេះបានឡើយ ពោលគឺត្រូវតែបន្តប្រយុទ្ធរហូតទាល់តែបានជ័យជម្នះពេញលេញនៅក្នុងសមរភូមិមួយនេះ។
គួរជម្រាបបន្តិចថា ក្នុងនាមជាប្រទេសដែលប្រជាជនច្រើនបំផុតរបស់ពិភពលោក ចិន បានមានផែនការជម្រុញការអភិវឌ្ឍសេដ្ឋកិច្ចរបស់ខ្លួន ក្រោមមូលបទចម្បងមួយ គឺធ្វើឲ្យជីវភាពរស់នៅរបស់ប្រជាជនមានភាពល្អប្រសើរឡើង។ ហើយដើម្បីសម្រេចនេះ ចិន មានផែនការអនុវត្តគោលនយោបាយលុបបំបាត់ភាពក្រីក្រ និងធ្វើឲ្យប្រទេសចិន ក្លាយជាសង្គមដ៏ចម្រុងចម្រើន។
អ្វីដែលគួរឲ្យកត់សម្គាល់នោះ ដើម្បីសម្រេចបានគោលដៅនេះ ចិន បានកំណត់យកឆ្នាំ២០២០ ជាថេរវេលាចុងក្រោយនៃការលុបបំបាត់ភាពក្រីក្រ និងតំបន់ក្រីក្រ ជាពិសេសតំបន់ដែលដាច់ស្រយាលពីគេ។ បើតាម Xinhua ក្នុងរយៈពេល៤ទសវត្សរ៍មកនេះ មានប្រជាជនចិនជាង៧០០លាននាក់ហើយ បានរួចផុតពីបន្ទាត់នៃភាពក្រីក្រ ដែលស្តែងឡើងតាមរយៈចំណូលរបស់ប្រជាជនម្នាក់ៗ កើនឡើង ២៥ ដង បើធៀបគិតចាប់ពីឆ្នាំ១៩៧៨ ដល់ឆ្នាំ២០១៨៕
© រក្សាសិទ្ធិដោយ thmeythmey.com