ជាតិ
នយោបាយជាតិ
តុលាការ កាត់ក្តីលោក សម រង្ស៊ី ពីបទញុះញង់កងទ័ពនិងប្រមាថព្រះមហាក្សត្រ
× សាលាដំបូងរាជធានីភ្នំពេញ បានលើកយកបទល្មើសពីររបស់លោក សម រង្ស៊ី មេដឹកនាំក្រុមប្រឆាំង គឺបទញុះញង់កងទ័ពមិនឲ្យស្តាប់បញ្ជានិងបទប្រមាថព្រះមហាក្សត្រ ទៅជំនុំជម្រះក្នុងពេលជាមួយគ្នាតែម្តង នៅថ្ងៃទី២២ ខែមេសា ឆ្នាំ២០១៩នេះ។ ប៉ុន្តែ ក្រោយបញ្ចប់សវនាការ ចៅក្រម ពុំបានប្រកាសសាលក្រមភ្លាមៗនោះទេ ដោយលើកទៅប្រកាសនៅថ្ងៃទី២ ខែឧសភា ឆ្នាំ២០១៩ឯណោះវិញ។
លោក សំ សុគង់ មេធាវីរបស់លោក សម រង្ស៊ី ប្រាប់សារព័ត៌មានថ្មីៗតាមទូរសព្ទយ៉ាងដូច្នេះថា «បើតាមច្បាប់ ខ្ញុំ សង្ឃឹមថា តុលាការ នឹងទម្លាក់បទចោទចេញពីកូនក្តីរបស់ខ្ញុំ។ តែបើនិយាយពីទិដ្ឋភាពនយោបាយ គាត់ ប្រហែលជាត្រូវផ្តន្ទាទោសហើយ»។
លោក សម រង្ស៊ី ដែលកំពុងរស់នៅឯក្រៅប្រទេស បានរងបទចោទញុះញង់យោធា កាលពីអំឡុងខែធ្នូ ឆ្នាំ២០១៧ និងរងបទចោទប្រមាថព្រះមហាក្សត្រ កាលអំឡុងខែកក្កដា ឆ្នាំ២០១៨។
បើសរុបទៅ លោក សម រង្ស៊ី បានរងបណ្តឹងមិនតិចជាង១០ទេ ពីសំណាក់ថ្នាក់ដឹកនាំនិងសកម្មជនគណបក្សប្រជាជនកម្ពុជា ដោយក្នុងនោះ មានបណ្តឹងខ្លះ ត្រូវបានជំនុំជម្រះរួចហើយ ហើយបណ្តឹងខ្លះទៀត កំពុងស្ថិតក្នុងចំណាត់ការរបស់តុលាការ៕
© រក្សាសិទ្ធិដោយ thmeythmey.com