ថៃ នឹងចុះកិច្ចព្រមព្រៀងផ្លូវដែកជាមួយចិននិងឡាវ

អន្តរជាតិ

ថៃ នឹងចុះកិច្ចព្រមព្រៀងផ្លូវដែកជាមួយចិននិងឡាវ

24, Apr 2019 , 9:29 am

រូបភាព

រូបភាព៖ China Daily

ដោយ:

ថៃ នឹងចុះហត្ថលេខាលើអនុស្សារណៈស្តីពីកិច្ចសហប្រតិបត្តិការ (MoC) ជាមួយចិន និងឡាវ សម្រាប់គម្រោងបណ្តាញផ្លូវដែកមួយក្នុងគោលដៅបំពេញមហិច្ឆតាតភ្ជាប់តំបន់របស់ខ្លួន។ កិច្ចព្រមព្រៀងនេះ នឹងត្រូវចុះហត្ថលេខាអំឡុងពេលទស្សនកិច្ចរបស់លោកនាយករដ្ឋមន្ត្រីថៃ ប្រាយុទ្ធ ចន្ទអូចា នៅប៉េកាំងក្នុងសប្តាហ៍នេះ ដើម្បីចូលរួម «វេទិកាខ្សែក្រវាត់ និងវិថី» លើកទីពីរ។

រដ្ឋមន្ត្រីដឹកជញ្ជូនថៃ លោក Arkhom Termpittayapaisith នឹងចុះហត្ថលេខាលើកិច្ចព្រមព្រៀងនេះជាមួយសមភាគីឡាវ លោក Bounchanh Sinthavong និងអនុប្រធានគណៈកម្មការកំណែទម្រង់និងអភិវឌ្ឍន៍ជាតិរបស់ចិន លោក Hu Zucai នាថ្ងៃទី ២៥ ខែមេសា នៅក្រៅកិច្ចប្រជុំកំពូលដែលធ្វើនៅរដ្ឋធានីប៉េកាំង។ នេះបើតាមការបញ្ជាក់របស់ក្រសួងការបរទេសថៃ នៅថ្ងៃទី២២ មេសាដែលផ្សាយដោយសារព័ត៌មាន The Nation ។

អនុស្សារណៈនេះ នឹងលម្អិតពីផែនការសម្រាប់ប្រទេសទាំងបីនេះ ពាក់ព័ន្ធនឹងបណ្តាញផ្លូវដែកតភ្ជាប់ពីភាគខាងត្បូងនៃប្រទេសចិន កាត់តាមឡាវទៅកាន់ថៃ។ ត្រង់ចំណុចនេះ នាយកនៃនាយកដ្ឋានទទួលបន្ទុកកិច្ចការសេដ្ឋកិច្ចអន្តរជាតិរបស់ក្រសួងការបរទេសថៃ លោកស្រី Vilawan Mangklatanakul គូសបញ្ជាក់ថា កិច្ចព្រមព្រៀងនេះ ក៏នឹងរាប់បញ្ចូលការសាងសង់ស្ពានថ្មីមួយ ឆ្លងកាត់ទន្លេមេគង្គ ដែលតភ្ជាប់ពីរដ្ឋធានីវៀងចន្ទន៍ របស់ឡាវជាមួយខេត្ត Nong Khai នៅភាគឦសាននៃប្រទេសថៃផងដែរ។

ក្រុងប៉េកាំង កំពុងបោះទុនវិនិយោគ និងជួយជ្រោមជ្រែងឡាវក្នុងការសាងសង់បណ្តាញផ្លូវដែកប្រវែង ៤០០គីឡូម៉ែត្រមួយ ដែលតភ្ជាប់ពីព្រំដែន ចិន-ឡាវ ទៅកាន់រដ្ឋធានី វៀងចន្ទន៍។ គិតមកត្រឹមពេលនេះ ការសាងសង់ផ្លូវដែកនេះ សម្រេចបានប្រមាណ៥០ភាគរយហើយ ខណៈដែលផ្លូវដែកល្បឿនលឿនប្រវែង ៣,៥គីឡូម៉ែត្ររបស់ថៃ កំពុងដំណើរការទៅមុខយ៉ាងល្អផងដែរ។

លោក ប្រាយុទ្ធ ដែលនឹងចូលរួមក្នុងវេទិកាខ្សែក្រវាត់ និងវិធីលើកទីពីរ ចាប់ពីថ្ងៃទី២៥ ដល់ទី២៧ ខែមេសា នឹងលើកឡើងពីបច្ចុប្បន្នភាពនៃផែនការមេស្តីពីការតភ្ជាប់អាស៊ានក្នុងវេទិកាដ៏ធំប្រចាំឆ្នាំនេះផងដែរក្នុងនាមជាប្រធានផ្លាស់វេនអាស៊ានក្នុងឆ្នាំ២០១៩ ។ លោកស្រី Vilawan និយាយបែបនេះ។

លើសពីនេះ គម្រោងហេដ្ឋារចនាសម្ព័ន្ធរបស់លោកប្រាយុទ្ធ ដែលស្គាល់ថា «ច្រករបៀងសេដ្ឋកិច្ចភាគខាងកើត (EEC)» ក៏នឹងត្រូវលើកឡើងក្នុងវេទិកានេះផងដែរ ដើម្បីទាក់ទាញអ្នកវិនិយោគិន ជាពិសេសពី ចិនតែម្តង។ នេះបើតាមការបញ្ជាក់របស់លោកស្រី Vilawan ដោយបន្ថែមថា គម្រោង EEC នេះ នឹងប្រែក្លាយប្រទេសថៃទៅជាមជ្ឈមណ្ឌលខ្សែសង្វាក់ផ្គត់ផ្គង់ប្រចាំតំបន់មួយ។

សូមបញ្ជាក់ថា ប្រធានធិបតីចិន លោក ស៊ី ជិនភីង បានបង្កើតគំនិតផ្តួចផ្តើមខ្សែក្រវាត់ និងវិថីក្នុងឆ្នាំ២០១៣ ក្នុងគោលដៅតភ្ជាប់ប្រទេសចិនជាមួយបណ្តាប្រទេសផ្សេងទៀត ដែលស្ថិតក្នុងតំបន់ អឺរ៉ុប អាស៊ី និងអាហ្វ្រិក តាមរយៈគម្រោងអភិវឌ្ឍហេដ្ឋារចនាសម្ព័ន្ធជាច្រើន។ មកទល់នឹងពេលនេះ ប្រទេសចំនួន ១២៤ និងអង្គការអន្តរជាតិ ២៩ បានចុះហត្ថលេខាលើកិច្ចព្រមព្រៀងស្តីពីកិច្ចសហប្រតិបត្តិការលើគំនិតផ្តួចផ្តើមនេះជាមួយចិន។ កម្ពុជា ក៏ជាសមាជិកនៃគម្រោងហេដ្ឋារចនាសម្ព័ន្ធយក្សរបស់ចិននេះផងដែរ៕