អន្តរជាតិ
កុមារ៤៥នាក់ស្ថិតក្នុងចំណោមអ្នកស្លាប់ជាង៣២០នាក់ដោយការវាយប្រហារនៅស្រីលង្កា កុមារប្រមាណ៤៥នាក់បានស្លាប់ក្នុងការវាយប្រហារនៅស្រីលង្កា។ រូបថត AFP
× កុមារយ៉ាងហោចណាស់៤៥នាក់ក្នុងចំណោមអ្នកស្លាប់ជាង៣២០នាក់ដោយសារតែការវាយប្រហារគ្រាប់បែកអត្តឃាតនៅស្រីលង្កា កាលពីថ្ងៃអាទិត្យកន្លងមក។ អង្គការយូនីសែហ្វ បានបង្ហាញពីតួលេខកុមាររងគ្រោះនេះ ពីរថ្ងៃក្រោយហេតុការណ៍ដ៏រន្ធត់ខាងលើ។
«ពេលនេះ យើងរកឃើញថា កុមារ៤៥នាក់បានស្លាប់»។ នេះជាការអះអាងរបស់លោក Christophe Boulierac នាសន្និសីទសារព័ត៌មាននៅក្រុងហ្សឺណែវ នាថ្ងៃចន្ទ ដោយបង្ហាញពីការព្រួយបារម្ភបន្ថែមចំពោះស្ថានភាពកុមារដែលរងរបួស និងកំព្រា ក្រោយការវាយប្រហារដ៏រន្ធត់។
តួលេខអ្នកស្លាប់ដោយការវាយប្រហាររហូតដល់ទៅ៨លើកនៅស្រីលង្កា គិតត្រឹមរសៀលថ្ងៃអង្គារនេះ ឡើងជាង៣២០នាក់ និងរបួសជាង៥០០នាក់។ នេះបើតាមការបញ្ជាក់របស់អ្នកនាំពាក្យប៉ូលិសស្រីលង្កា ដែលដកស្រង់ដោយ AFP មនុស្ស៤០នាក់កំពុងស្ថិតក្នុងការឃុំខ្លួនផងដែរ។
សកម្មភាពដ៏ឃោឃៅនេះ ត្រូវបានគេសង្ស័យថា ជាប់ពាក់ព័ន្ធនឹងកងកម្លាំងភេរវកម្មឈ្មោះ National Thowheelth Jama’ath ដែលព្យាយាមបង្កភាពវឹកវរនៅតាមសណ្ឋាគារ និងព្រះវិហារ នាពិធីបុណ្យ Easter Sunday នៅក្រុង Colombo។
សូមបញ្ជាក់ថា កាលពីព្រឹកថ្ងៃអាទិត្យ ការបំផ្ទុះចំនួន៦លើកបានកើតឡើងនៅសណ្ឋាគារផ្កាយប្រាំចំនួន៣ (Shangri-La, Kingsbury និង Cinnamon Grand) និងព្រះវិហារចំនួន៣ ខណៈដែលមនុស្សម្នាកំពុងប្រារព្ធពិធីបុណ្យ Easter Sunday នៅក្រុង Colombo។ ប៉ុន្មានក្រោយមក ការផ្ទុះពីរលើកទៀតបានកើតឡើង។ AFP បានដកស្រង់សម្តីរបស់អ្នកនាំពាក្យប៉ូលិសលោក Ruwan Gunasekera ដែលអះអាងថា យ៉ាងហោចណាស់ ការផ្ទុះចំនួនពីរបង្កឡើងដោយអ្នកផ្ទុកគ្រាប់បែកអត្តឃាត៕
© រក្សាសិទ្ធិដោយ thmeythmey.com