អន្តរជាតិ
ISIS ទទួលខុសត្រូវចំពោះការវាយប្រហារនៅស្រីលង្កា ដែលសម្លាប់មនុស្ស៣២០នាក់
រូប៖ AFP
×![]()
ក្រុមរដ្ឋឥស្លាម (ISIS) បានចេញមុខទទួលខុសត្រូវចំពោះហេតុការណ៍បំផ្ទុះជាច្រើនករណីលើវិហារសាសនាគ្រឹស្ត និងសណ្ឋាគារក្នុងប្រទេសស្រីលង្កា ដែលសម្លាប់មនុស្ស៣២០នាក់។ នេះយោងតាមភ្នាក់ងារព័ត៌មាន Amaq របស់ក្រុមនេះ។ 
ត្រឹម២ថ្ងៃប៉ុណ្ណោះក្រោយកើតហេតុការណ៍ដ៏អាក្រក់នៅស្រីលង្កា ដែលសម្លាប់ជាច្រើនរយនាក់ រួមមាន ជនបរទេស និងកូនក្មេងផងនោះ ក្រុមជ្រុលនិយមរដ្ឋឥស្លាម នៅថ្ងៃទី ២៣ ខែមេសា បានចេញមុខទទួលខុសត្រូវចំពោះការវាយប្រហារនេះ។
បើតាមភ្នាក់ងារព័ត៌មាន Amaq ក្រុមរដ្ឋឥស្លាមនេះ បានចេញសេចក្តីថ្លែងការណ៍មួយ អមជាមួយរូបថត និងវីដេអូ ដោយអះអាងថា «ក្រុមប្រយុទ្ធ» របស់ខ្លួន ជាអ្នកនៅពីក្រោយការវាយប្រហារនេះ។ សម្រាប់រូបថតនោះ គេឃើញមានបុរស៨នាក់ ដែលក្នុងនោះ៧នាក់បាំងមុខជិត និង៣នាក់ឃើញមានកាន់កាំបិត។ ចំណែកវីដេអូ បង្ហាញពីសកម្មភាពជនសង្ស័យម្នាក់ដើរចូលទៅក្នុងវិហារសាសនាគ្រឹស្ត St Sebastian ក្នុងទីក្រុង Negombo មុននឹងហេតុការណ៍បំផ្ទុះគ្រាប់បែកអត្តឃាតកើតឡើង។
កាលពីថ្មីៗនេះ រដ្ឋាភិបាលស្រីលង្កា ធ្លាប់បានអះអាងថា របាយការណ៍បឋមមកពីការស៊ើបអង្កេត បង្ហាញថា ការវាយប្រហារផ្ទួនៗនេះ ត្រូវបានរៀបចំឡើងដើម្បី «វាយបក» ទៅនឹងហេតុការណ៍បាញ់សម្លាប់រង្គាលនៅវិហារឥស្លាមចំនួនពីរកន្លែងក្នុងប្រទេសនូវែលសេឡង់កាលពីខែមុន។ ហេតុការណ៍នេះ បណ្តាលឲ្យមនុស្ស៥០នាក់ស្លាប់។ កន្លងទៅ អាជ្ញាធរក្រុងកូឡុំបូ ធ្លាប់បានទម្លាក់កំហុសលើក្រុមឥស្លាមជ្រុលនិយមក្នុងស្រុកដែលស្គាល់ថា National Thowheeth Jama'ath (NTJ)។
សូមបញ្ជាក់ថា ការចេញមុខទទួលខុសត្រូវរបស់ក្រុមឧទ្ទាម ISIS នេះ បានធ្វើឡើងខណៈដែលអាជ្ញាធរស្រីលង្កាទទួលសម្ពាធកាន់តែខ្លាំង ក្រោយលេចធ្លាយរបាយការណ៍មកថា ពួកគេទទួលការព្រមានជាច្រើនលើកពីភ្នាក់ងារសម្ងាត់របស់ឥណ្ឌា ជុំវិញហេតុការណ៍វាយប្រហារនេះ។
មន្ត្រីការពារជាតិស្រីលង្កាម្នាក់ ដែលសុំមិនបញ្ចេញឈ្មោះ បានប្រាប់ទីភ្នាក់ងារព័ត៌មាន Reuters ថា ការព្រមាន ត្រូវបានផ្ញើដោយមន្ត្រីឥណ្ឌាកាលពីយប់ថ្ងៃសៅរ៏ ទី២០ ខែមេសា ពោលគឺមួយថ្ងៃមុនកើតហេតុការណ៍វាយប្រហារ៕
Tag:
ស្រីលង្កា
ISIS
ភេវកម្ម
© រក្សាសិទ្ធិដោយ thmeythmey.com
