ចាប់យោធាផ្កាយ១ និងភរិយា ដោយសង្ស័យថាបោកលុយពលរដ្ឋនៅកំពង់ធំ

ជាតិ

សង្គមជាតិ

ចាប់យោធាផ្កាយ១ និងភរិយា ដោយសង្ស័យថាបោកលុយពលរដ្ឋនៅកំពង់ធំ

24, Apr 2019 , 1:40 pm

រូបភាព

ដោយ: ថ្មីៗ

ភ្នំពេញ៖ កម្លាំងកងរាជអាវុធហត្ថលើផ្ទៃប្រទេស បានចាប់យោធាផ្កាយ១ម្នាក់ឈ្មោះ លោក ឃួន សុវណ្ណ និងភរិយា កាលពីថ្ងៃទី១៣ ខែមេសា ឆ្នាំ២០១៩។ ឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស ប្រាប់សារព័ត៌មានថ្មីៗថា កម្លាំងកងរាជអាវុធហត្ថ បានបញ្ជូនអ្នកទាំង២ ទៅឲ្យព្រះរាជអាជ្ញានៃអយ្យការអមតុលាការយោធារួចហើយ ដើម្បីសាកសួរនិងចាត់ការបន្តតាមនីតិវិធី។

អ្នកនាំពាក្យរូបនេះ មិនអាចនិយាយអ្វីច្រើននោះទេ ដោយលើកហេតុផលថា សំណុំរឿងបានផុតពីដៃរបស់កងរាជអាវុធហត្ថហើយ។ ម្យ៉ាងទៀត ក៏ស្ថិតក្នុងដំណាក់កាលនៃការរក្សាការសម្ងាត់ផងដែរ។

នាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិ បានទទួលព័ត៌មានពីការចាប់លោក ឃួន សុវណ្ណ តែថា គេចាប់ដោយសាររឿងអ្វីនោះ លោក មិនបានដឹងឡើយ។

យ៉ាងណាក៏ដោយ ប្រជាពលរដ្ឋ១៨នាក់ ក្នុងស្រុកបារាយ ខេត្តកំពង់ធំ បានសរសេរឈ្មោះរបស់ពួកគេ លើក្រដាសមួយសន្លឹក ហើយបញ្ជាក់ថាពួកគេ បានចាញ់បោកលោក ឃួន សុវណ្ណ និង ភរិយា។ បើតាមក្រដាសស្នាមនោះ ប្រជាពលរដ្ឋទាំង១៨នាក់ បានបូកសរុបថវិកាចូលគ្នា មានចំនួនដល់ទៅជិត១0ម៉ឺនដុល្លារឯណោះ ដែលចាញ់បោកប្តី-ប្រពន្ធនេះ។

ប្រជាពលរដ្ឋទាំងនោះ បានចំណាយលុយទៅលើអ្នកទាំងពីរ ដើម្បីឲ្យជួយរត់ការឲ្យកូនចៅរបស់ពួកគេ បានចូលធ្វើការជានគរបាល ទាហាន និងកងរាជអាវុធហត្ថជាដើម៕