ក្រៅពីអស់តំណែង អធិការស្រុកកំពង់សៀម ដែលវ៉ៃពលរដ្ឋម្នាក់ នៅប្រឈមមុខផ្លូវច្បាប់ទៀត

ជាតិ

សង្គមជាតិ

ក្រៅពីអស់តំណែង អធិការស្រុកកំពង់សៀម ដែលវ៉ៃពលរដ្ឋម្នាក់ នៅប្រឈមមុខផ្លូវច្បាប់ទៀត

25, Apr 2019 , 3:36 pm

រូបភាព

ដោយ: ថ្មីៗ

ឧត្តមសេនីយ៍ត្រី ឯម កុសល ស្នងការខេត្តកំពង់ចាម បានសម្រេចដាក់ពិន័យលើវរសេនីយ៍ឯក ឯក ប៉ាន់ដន អធិការស្រុកកំពង់សៀម ដោយដកចេញពីតំណែងជាបណ្តោះអាសន្ន។ ការរងពិន័យនេះ គឺបន្ទាប់ពីលោក ឯក ប៉ាន់ដន វាយប្រជាពលរដ្ឋម្នាក់។

លោក ឯក ប៉ាន់ដន មិនទាន់រួចខ្លួននោះទេ បើទោះបីជាលោក រងពិន័យពីស្នងការរួចហើយក៏ដោយ។ លោក ហួត វុទ្ធី ព្រះរាជអាជ្ញានៃអយ្យការអមសាលាដំបូងខេត្តកំពង់ធំ ដែលជាអ្នកកាន់សំណុំរឿងនេះ បានប្រាប់សារព័ត៌មានថ្មីៗថា លោក កំពុងបន្តនីតិវិធី។

លោកព្រះរាជអាជ្ញា បកស្រាយថា ក្នុងដំណាក់កាលនេះ គឺជាដំណាក់កាលនៃការស៊ើបអង្កេត ដូច្នេះ លោក មិនទាន់អាចកំណត់ថា លោក ឯក ប៉ាន់ដន មានទោសឬគ្មាននោះទេ។ លោក បញ្ជាក់យ៉ាងដូច្នេះថា «បើយើងរកឃើញថាគាត់មានទោស គឺគាត់ ត្រូវទទួលទោសតាមច្បាប់»។

បច្ចុប្បន្ន លោក ឯក ប៉ាន់ដន កំពុងជាប់វិន័យនៅការិយាល័យបុគ្គលិកនៃស្នងការដ្ឋាននគរបាលខេត្តកំពង់ចាម។ វរសេនីយ៍ត្រី ពេជ្រ គឹមស៊ា ឡើងជាអធិការស្រុកកំពង់សៀមស្តីទី។

បុរសម្នាក់ឈ្មោះ ហាក់ ស៊ាងហាន បានមានស្លាកស្នាមនិងជាំសាច់ច្រើនកន្លែងលើដងខ្លួន ដោយអះអាងថា លោក ឯក ប៉ាន់ដន ជាអ្នកវាយ។ ភ្នែករបស់បុរសនោះ ក៏មានស្នាមរបួសផងដែរ។ គេ បានឃើញរូបបុរស ដែលរងអំពើហិង្សានោះ លើបណ្តាញសង្គម។

លោក ឯម កុសល មិនធ្វើអត្ថាធិប្បាយអ្វីឡើយ ដោយលោក ប្រាប់ថា កំពុងជាប់រវល់ ហើយក៏ចុចផ្តាច់ការហៅចូល។

គណនេយ្យហ្វេសប៊ុកឈ្មោះ Bun Them ដែលអះអាងថា ជាប្អូនរបស់លោក ហាក់ ស៊ាងហាន បានសរសេរថា លោក ឯក ប៉ាន់ដន វាយបងរបស់ខ្លួន ដោយសារតែទាស់សម្តីគ្នាតិចតួច៕