ប្រធានាធិបតីរុស្ស៊ី វ៉្លាឌីមៀ ពូទីន បានជួបគ្នាជាលើកដំបូងជាមួយមេដឹកនាំកូរ៉េខាងជើង គីម ជុងអ៊ុន នៅថ្ងៃទី២៥ ខែមេសានៅទីក្រុងវ៉្លាឌីវ៉ូស្តុកនៃតំបន់ចុងបូព៌ា។ ជារួម ជំនួបទល់មុខលើកទីមួយនេះ គ្មានលទ្ធផលអ្វីធំដុំឡើយ ប៉ុន្តែភាគីទាំងពីរបានផ្លាស់ប្ដូរយោបល់គ្នាលើបញ្ហានុយក្លេអ៊ែរដែលជាសំណុំរឿងក្ដៅប្រចាំឧបទ្វីបកូរ៉េ។ លោក គីម បានប្រាប់លោក ពូទីន ថា ស្ថានការណ៍ទៅពេលអនាគត គឺអាស្រ័យលើអាមេរិកផ្ទាល់។ ចំណែកលោក ពូទីន នឹងយកបញ្ហាទៅប្រាប់សមភាគីអាមេរិកឲ្យដឹងឮ។
ជំនួបលើកដំបូងរវាងប្រធានាធិបតីរុស្ស៊ី វ៉្លាឌីមៀ ពូទីន និងប្រមុខដឹកនាំកូរ៉េខាងជើង គីម ជុងអ៊ុន បានបញ្ចប់ទៅហើយដោយគ្មានកិច្ចព្រមព្រៀងអ្វីឡើយ។ អាចនិយាយបានថា ជំនួបនៅទីក្រុងវ៉្លាឌីវ៉ូស្តុកនេះ ជាការសំណេះសំណាលគ្នា និងរៀបរាប់ពីសុខទុក្ខគ្នាទៅមក ដ្បិតលោក ពូទីន មិនដែលបានជួបលោក គីម សោះឡើយតាំងពីលោក គីម ក្លាយជាមេដឹកនាំកូរ៉េខាងជើងមកនោះ។ បញ្ហានៅឧបទ្វីបកូរ៉េ ជាប្រធានបទសំខាន់ដែលត្រូវបានលើកយកមកជជែកគ្នា។
ប៉ុន្តែក្នុងជំនួបលើកទីមួយនេះ លោក គីម បានវាយប្រហារអាមេរិកខ្លាំងៗចំពោះមុខលោក ពូទីន ដែលកំពុងមិនត្រូវគ្នាជាមួយអាមេរិកដែរនោះ។ បើតាមការផ្សាយរបស់ទីភ្នាក់ងារព័ត៌មានរដ្ឋកូរ៉េខាងជើង KCNA នៅថ្ងៃទី២៦ ខែមេសា ដោយនិយាយដល់ជំនួបបរាជ័យនៅវៀតណាម មេដឹកនាំកូរ៉េខាងជើងរូបនេះបានបន្ទោសអាកប្បកិរិយារបស់ក្រុងវ៉ាស៊ិនតោនដែលធ្វើឲ្យជំនួបនោះគ្មានបានការអ្វីបន្តិច ខណៈដំណើរការចរចាដើម្បីឈានទៅការរំសាយនុយក្លេអ៊ែរក៏ជាប់គាំងទៅទៀត។
ចំពោះមុខលោក ពូទីន មេដឹកនាំកូរ៉េខាងជើងវ័យក្មេងរូបនេះបញ្ជាក់ថា ស្ថានការណ៍នៅឧបទ្វីបកូរ៉េ កំពុងនៅទ្រឹង ហើយបានមកដល់ដំណាក់កាលសំខាន់។ លោកបន្តព្រមានថា ស្ថានភាពសព្វថ្ងៃអាចវិលទៅរកចំណុចដើមវិញ នៅពេលអាមេរិកមានទង្វើដូចជំនួបនៅវៀតណាម។ សម្រាប់លោក គីម សន្តិភាព និងសន្តិសុខរបស់ឧបទ្វីបកូរ៉េ គឺពឹងផ្អែកទាំងស្រុងទៅលើអាកប្បកិរិយារបស់អាមេរិក ហើយកូរ៉េខាងជើងត្រៀមខ្លួនជាស្រេចសម្រាប់ស្ថានការណ៍ទាំងអស់។
តាមពិតទៅ នាជំនួបនៅវៀតណាម ក្នុងចំណោមភាគីទាំងពីរ ម្ខាងទាមទារច្រើន ម្ខាងទៀតហ៊ានឲ្យតិច ទើបគ្មានកិច្ចព្រមព្រៀង។ កូរ៉េខាងជើងដែលរងទណ្ឌកម្មរាប់សិបជាន់នោះ ស្នើឲ្យអាមេរិកជួយបន្ធូរបន្ថយសម្ពាធឲ្យបានច្រើនដើម្បីជាការឆ្លើយតបនឹងអ្វីដែលខ្លួនបានធ្វើកន្លងមកក្នុងដំណើការលុបបំបាត់នុយក្លេអ៊ែរ។ ប៉ុន្តែអាមេរិកវិញ មិនពេញចិត្តនឹងការប្ដេជ្ញាចិត្តរបស់កូរ៉េខាងជើងដែលចង់បិទត្រឹមរោងចក្រនុយក្លេអ៊ែរមួយកន្លែងឡើយ។ មិនត្រូវគ្នាពីលក្ខខណ្ឌនៃការធ្វើសម្បទានរបស់កូរ៉េខាងជើង ការចរចាក៏បរាជ័យតែម្ដង។
លោក ពូទីន៖ អន្តរជាតិត្រូវធានាសន្តិសុខឲ្យកូរ៉េខាងជើង
ក្រោយជំនួបលើកដំបូងជាមួយមេដឹកនាំកូរ៉េខាងជើង លោកប្រធានាធិបតី ពូទីន ប្រកាសជំហររបស់រុស្ស៊ីដែលដូចគ្នានឹងអាមេរិក គឺព្យាយាមបន្ធូរបន្ថយភាពតានតឹងនៅឧបទ្វីបកូរ៉េ និងបញ្ចៀសជម្លោះអាវុធនុយក្លេអ៊ែរ។ ប៉ុន្តែលោក ពូទីន ក៏អះអាងដែរថា កូរ៉េខាងជើងត្រូវការការធានាសន្តិសុខ និងអធិបតេយ្យរបស់ខ្លួនសិន ទើបអាចគិតគូររឿងរំសាយនុយក្លអ៊ែរ។
ជំនួបជាមួយលោក ពូទីន ជាជំនួបជាមួយមេដឹកនាំបរទេសលើកដំបូងសម្រាប់លោក គីម តាំងពីវិលត្រឡប់ពីជំនួបគ្មានបានការជាមួយលោក ត្រាំ នៅទីក្រុងហាណូយ។ ជំនួបនេះ ធ្វើឡើងបន្ទាប់ពីរុស្ស៊ីអញ្ជើញមេដឹកនាំកូរ៉េខាងជើងជាច្រើនលើករួចមក។ កាលពីឆ្នាំ២០១៨ លោក គីម ធ្វើដំណើរបានរាប់ពាន់គីឡូម៉ែត្រដើម្បីជួបជាមួយមេដឹកនាំជាច្រើនក្នុងប្រធានាធិបតីចិន ស៊ី ជិនភីង បីដង ប្រធានាធិបតីកូរ៉េខាងត្បូង មូន ចេអ៊ីន បីដង ប្រធានាធិបតីអាមេរិក ដូណាល់ ត្រាំ ពីរដង និងប្រធានាធិបតីវៀតណាមម្ដងដែរ។
ក្នុងសន្និសីទសារព័ត៌មានក្រោយជំនួបនៅសាកលវិទ្យាល័យមួយ លោក ពូទីន ប្រកាសថា នឹងយកព័ត៌មានលម្អិតនៃជំនួបនេះ ទៅប្រាប់លោក ត្រាំ ។ មេដឹកនាំរុស្ស៊ីលើកឡើងថា គ្មានព័ត៌មានសម្ងាត់អ្វីឡើយសម្រាប់ជំនួបជាមួយមេដឹកនាំកូរ៉េខាងជើង ខណៈលោក គីម ថែមទាំងផ្ដាំដោយផ្ទាល់ឲ្យលោកពាំនាំលទ្ធផលនៃជំនួបនេះទៅប្រាប់អាមេរិកទៀតផង៕