ហ្វឹកហាត់ថ្ងៃដំបូងរបស់ក្រុមជម្រើសជាតិ៖ តេក្វាន់ដូមកមិនគ្រប់ចំនួន ខណៈវាយកូនឃ្លីលើតុខ្វះម្នាក់

កីឡាជាតិ

ជាតិ

ហ្វឹកហាត់ថ្ងៃដំបូងរបស់ក្រុមជម្រើសជាតិ៖ តេក្វាន់ដូមកមិនគ្រប់ចំនួន ខណៈវាយកូនឃ្លីលើតុខ្វះម្នាក់

26, Apr 2019 , 8:19 pm

រូបភាព

សកម្មភាពហ្វឹកហាត់របស់ក្រុមកីឡាករជម្រើសជាតិ, រូបភាពពីហ្វេសប៊ុកអគ្គនាយកដ្ឋានកីឡា

ដោយ:

មន្ត្រីមជ្ឈមណ្ឌលហ្វឹកហ្វឺនកីឡានៃក្រសួងអប់រំយុវជននិងកីឡានៅព្រឹកថ្ងៃទី២៦ ខែមេសា ឆ្នាំ២០១៩នេះ បានចុះត្រួតពិនិត្យការហ្វឹកហាត់ថ្ងៃដំបូងរបស់ក្រុមកីឡាករជម្រើសឈុតធំនៅពហុកីឡដ្ឋានជាតិ។ លទ្ធផលចុះត្រួតពិនិត្យលើ៩ប្រភេទកីឡាគេសង្កេតឃើញមានកីឡាពីរប្រភេទមានកីឡាករមកហ្វឹកហាត់មិនគ្រប់គ្រាន់ និងអវត្តមានគ្រូបង្វឹក។

ក្រុមកីឡាករជម្រើសជាតិតាមប្រភេទកីឡា ដែលទទួលបានគោលការណ៍ពីក្រសួងអប់រំ យុវជននិងកីឡា បានចាប់ផ្តើមប្រមូលផ្តុំហ្វឹកហាត់ថ្ងៃដំបូងរបស់ខ្លួនហើយនៅថ្ងៃទី២៦ ខែមេសា ឆ្នាំ២០១៩នេះ។ មជ្ឈមណ្ឌលហ្វឹកហ្វឺនកីឡានៃក្រសួងអប់រំ យុវជន និងកីឡា ដែលទទួលបន្ទុកលើបញ្ហានេះ បានចាត់មន្ត្រីខ្លួនឲ្យចុះទៅត្រួតពិនិត្យការហ្វឹកហាត់ និងស្រង់វត្តមានកីឡាករនិងគ្រូបង្វឹកសម្រាប់ការប្រមូលផ្តុំថ្ងៃដំបូងនេះផងដែរ។

លទ្ធផលដែលទទួលបានក្រោយចុះត្រួតពិនិត្យលើ៩ប្រភេទកីឡារួមមានចំបាប់ យូដូ កាយសម្ព័ន្ធ កីឡារាំ អត្តពលកម្មជនពិការ ល្បុក្កតោ តេក្វាន់ដូ គុនដាវ និងវាយកូនឃ្លីលើតុ ដែលប្រមូលផ្តុំហ្វឹកហាត់នៅពហុកីឡដ្ឋានជាតិ គឺមានកីឡាពីរប្រភេទមិនគោរពពេលវេលាហ្វឹកហាត់។ ក្នុងនោះកីឡាតេក្វាន់ដូមានកីឡាករមកហ្វឹកហាត់មិនគ្រប់គ្រាន់ និងអវត្តគ្រូបង្វឹក ខណៈកីឡាវាយកូនឃ្លីលើតុខ្វះកីឡាករម្នាក់។ នេះបើយោងតាមទំព័រហ្វេសប៊ុករបស់អគ្គនាយកដ្ឋានកីឡានៃក្រសួងអប់រំយុវជននិងកីឡា។

តែយ៉ាងណា អគ្គនាយកដ្ឋានកីឡាមិនបានបញ្ជាក់លម្អិតពីមូលហេតុ នៃការអវត្តមានរបស់កីឡាករ និងគ្រូបង្វឹកខាងលើនោះទេ។ ការប្រមូលផ្តុំហ្វឹកហាត់របស់ក្រុមកីឡាករជម្រើសជាតិឈុតធំមានរយៈពេល៧ខែ ពោលគឺចាប់ពីថ្ងៃទី២៦ ខែមេសា ដល់ថ្ងៃទី២៥ ខែវិច្ឆិកា ឆ្នាំ២០១៩ ខណៈក្រុមកីឡាករថ្នាលប្រមូលផ្តុំចាប់ពីថ្ងៃទី១ ខែឧសភា ដល់ថ្ងៃទី៣១ ខែធ្នូ ឆ្នាំ២០១៩។ ការប្រមូលទាំងពីរចែកចេញជា៣ដំណាក់កាលដូចគ្នា៕