​ស៊ី ជិន​ភីង ប្តេជ្ញា​កែប្រែ​មុខមាត់​«​គម្រោង​មហិមា​ខ្សែក្រ​វាត់ និង​វិថី​» ទប់ទល់​សម្តី​ទិតៀន​ថា​ជា​អន្ទាក់​បំណុល​
អន្តរជាតិ
​ស៊ី ជិន​ភីង ប្តេជ្ញា​កែប្រែ​មុខមាត់​«​គម្រោង​មហិមា​ខ្សែក្រ​វាត់ និង​វិថី​» ទប់ទល់​សម្តី​ទិតៀន​ថា​ជា​អន្ទាក់​បំណុល​
26, Apr 2019 , 9:19 pm        
រូបភាព
ដោយ: ថ្មីៗ
​ខណៈ​ថ្លែង​ការពារ​គម្រោង​ហេដ្ឋារចនាសម្ព័ន្ធ ខ្សែក្រវាត់​មួយ​វិថី​មួយ (BRI) ប្រឆាំងនឹង​ពាក្យ​ទិតៀន ប្រធានាធិបតី​ចិន​លោក ស៊ី ជិន​ភីង ក៏​ទទួលស្គាល់​ដែរ​ថា គម្រោង​នេះ​ត្រូវមាន​តម្លាភាព និង​មាន​និរន្ត​ភាព​ហិរញវត្ថុ​ផងដែរ​។ វិធានការ​មួយចំនួន​ត្រូវបាន​មេដឹកនាំ​ចិន​រូបនេះ​ប្រកាសឡើង​ដើម្បី​សម្អាត និង​លើក​មុខមាត់​គម្រោង​រប​ស់​ខ្លួន​នៅ​វេទិកា​ប្រមូលផ្តុំ​មេដឹកនាំ​សមាជិក​ជំនួប​កំពូល​ខ្សែក្រវាត់​មួយ​វិថី​មួយ​លើក​ទី ២​នៅ​ក្រុង​ប៉េកាំង​នេះដែរ​។


 
​ថ្លែង​បើក​វេទិកា​លើក​ទី​ពីរ​នៅ​ចំពោះមុខ​អ្នកចូលរួម​ប្រហែល ៥០០០​នាក់​ក្នុងនោះ​មាន​មេដឹកនាំ​ប្រមុខរដ្ឋ និង​រដ្ឋាភិបាល​យ៉ាងតិច ៣៧ រួមជាមួយ​តំណាង​អង្គការ​អន្តរជាតិ និង​តំណាង​ជាន់ខ្ពស់​ប្រទេស​នានា​ជាង ១០០​ទូទាំង​ពិភពលោក លោក ស៊ី ជិន​ភីង​បន្ត​ការពារ​គម្រោង​ខ្សែក្រវាត់ និង​វិថី​របស់​ចិន​ជាថ្មី​។  
 
​មេដឹកនាំ​ដែលមាន​ឥទ្ធិពល​ផុត​លេខ​របស់​ចិន​នេះ​ក៏បាន​សន្យាថា នឹង​ព្យាយាម​ធ្វើយ៉ាងណា​ជំរុញ​ការកែប្រែ​រូបភាព​នៃ​គម្រោង​របស់ខ្លួន ដើម្បី​ឆ្លើយតប​នឹង​រាល់​កង្វល់ និង​ក្តីបារម្ភ​ទាំងឡាយ​ជុំវិញ​គំនិត​ផ្តួចផ្តើម​អភិវឌ្ឍ​ហេដ្ឋារចនាសម្ព័ន្ធ​ដ៏​មហិមារ​នេះ​ផងដែរ​។​
 
​អ្វីដែល​សំខាន់ លោក ស៊ី បាន​សង្កត់ធ្ងន់ថា គម្រោង​ខ្សែក្រវាត់​និង​វិថី​នេះ​មិនមែនជា​គម្រោង​ផ្តាច់មុខ​របស់​ចិន​ទេ ហើយ​លោក​ទទួលស្គាល់​ដែរ​ថា វា​ក៏​ចាំបាច់​ត្រូវមាន​តម្លាភាព ហើយក៏​ត្រូវមាន​និរន្តរភាព​ផ្នែក​ហិរញ្ញវត្ថុ​ដែរ​។ បើតាម​ទូរទស្សន៍​រដ្ឋ​ចិន CGTN លោក ស៊ី និយាយថា វា​នឹង​គ្មាន​ការយោគយល់​ឡើយ​ចំពោះ​អំពើពុករលួយ និង​អំពាវនាវ​ឲ្យ​មានការ​អនុវត្ត​ស្តង់ដារ​អន្តរជាតិ​សម្រាប់​ការដេញថ្លៃ​សាធារណៈ និង​ដំណើរការ​វាយតម្លៃ​គម្រោង​នានា​ពាក់ព័ន្ធ​នឹង​គំនិត​ផ្តួចផ្តើម​ខ្សែក្រវាត់​និង​វិថី​ដែរ​។​
 
​ការសន្យា​របស់លោក ស៊ី នៅ​ចំពោះមុខ​មេដឹកនាំ​ដែល​ចូលរួម​ក្នុង​គម្រោង​ខ្សែក្រវាត់ និង​វិថី កើតឡើង​ស្រប​ពេលដែល​គម្រោង​រប​ស់​ចិន​នេះ​បាន​ក្លាយជា​ប្រធានបទ​ក្តៅ​សម្រាប់​ការពិភាគ្សា ដោយមាន​ការចោទប្រកាន់​ដែរ​ថា គម្រោង​នេះ​ជា​អន្ទាក់​បំណុល​សម្រាប់​ប្រទេស​ដែល​ពាក់ព័ន្ធ​។ អ្នកជំនាញ​បានបង្ហាញ​ក្តីបារម្ភ​ដែរ​ថា គម្រោង​នេះ​ខ្វះខាត​តម្លាភាព​ទាក់ទិន​នឹង​គម្រោង​អភិវឌ្ឍ​, លទ្ធកម្ម​ដីធ្លី និង ការអនុវត្ត​បំណុល​ជាដើម​។  
 
​ក្នុង​វេទិកា​ដដែល ក្រៅពី​និយាយ​រឿង​តម្លាភាព លោក ស៊ី បានបញ្ជាក់​ជាថ្មី​ថា ចិន​នឹង​កែទម្រង់ និង​បន្ត​ដោះស្រាយ​បញ្ហា​ដែល​កើតមាន​ក្នុង​ទំនាក់ទំនង​ពាណិជ្ជកម្ម​ជាមួយ​ប្រទេស​ខាងក្រៅ ដើម្បី​ធានា​ការប្រកួតប្រជែង​ស្មើភាព និង​ផលប្រយោជន៍​រួម​នៃ​ពាណិជ្ជកម្ម​ទ្វេភាគី​ផងដែរ​។ ក្នុងនោះ លោក​ស៊ី ប្តេជ្ញា​អនុវត្ត​ច្បាប់​វិនិយោគ​ឲ្យ​បាន​តឹងរ៉ឹង លុបចោល​គម្រោង​ឧបត្ថម្ភ​ធន​សម្រាប់​ក្រុមហ៊ុន​ចិន និង​ធានា​ចរចា និង​ចុះ​កិច្ចព្រមព្រៀង​ពាណិជ្ជកម្ម​សេរី​ដែលមាន​ស្តងដារ​ខ្ពស់​ជាមួយ​ប្រទេស​ដទៃ​ផងដែរ​។​
 
«​យើង​ត្រូវមាន​កិច្ចសហប្រតិបត្តិការ​ដែល​មាន​ស្តង់ដា​ខ្ពស់​។ យើង​នឹង​ជ្រើស​រើសយក​បទបញ្ញត្តិ​និង​ស្តងដា​ដែល​ត្រូវបាន​ទទួលស្គាល់​ជារួម​ដើម្បី​អនុវត្ត និង​ជំរុញ​ឲ្យ​ក្រុមហ៊ុន​ដែល​ចូលរួម​អនុវត្តតាម​ច្បាប់​និង​បទបញ្ញត្តិ​អន្តរជាតិ​ក្នុងការ​អភិវឌ្ឍ​ផលិតផល ប្រតិបត្តិការ​លទ្ធកម្ម ដេញថ្លៃ និង​វាយតម្លៃ​គម្រោង​ជាដើម​» លោក ស៊ី អះអាង​ដូច្នេះ​។  
 
​សូមបញ្ជាក់ថា គំនិត​ផ្តួចផ្តើម​ខ្សែក្រវាត់​មួយ​វិថី​មួយ (BRI)  ឬ​អាច​ហៅ​បាន​ថា វិថី​សូត្រ ខ្សែក្រវាត់​សេដ្ឋកិច្ច និង គំនិត​ផ្តួចផ្តើម​ផ្លូវ​សូត្រ​សមុទ្រ​សតវត្សរ៍​ទី ២១ (The Silk Road Economic Belt and the 21st Century Maritime Road Initiative) ត្រូវបាន​ដាក់ចេញ​នៅក្នុង​ឆ្នាំ ២០១៣ ដោយ​ប្រមុខរដ្ឋ​ចិន​លោក ស៊ី ជិន​ភីង ។ គំនិត​ផ្តួចផ្តើម​នេះ​មាន​គោលដៅ​ធ្វើយ៉ាងណា​កសាង​ចំណង​សេដ្ឋកិច្ច និង​សហប្រតិបត្តិការ​តាមរយៈ​ការសាងសង់​ហេដ្ឋារចនាសម្ព័ន្ធ​ដែល​ត​ភ្ជាប់​ពី​អាស៊ី​ទៅ​អឺរ៉ុប ឆ្លង​ទៅដល់​អាហ្វ្រិក​ដោយ​វា​ផ្អែក​លើផ្លូវ​ពាណិជ្ជកម្ម​សម័យបុរាណ​៕
 

Tag:
 ​ស៊ី ជិន​ភីង​
  BRI
© រក្សាសិទ្ធិដោយ thmeythmey.com