កម្ពុជា ធ្វើសមយុទ្ធបាញ់គ្រាប់ពិត ដើម្បីពង្រឹងសមត្ថភាពកងទ័ព

ជាតិ

នយោបាយជាតិ

កម្ពុជា ធ្វើសមយុទ្ធបាញ់គ្រាប់ពិត ដើម្បីពង្រឹងសមត្ថភាពកងទ័ព

27, Apr 2019 , 6:59 pm

រូបភាព

រូបពីលោក ឈុំ សុជាត

ដោយ: ថ្មីៗ

នាយឧត្តមសេនីយ៍ លោក ឈុំ សុជាត អ្នកនាំពាក្យក្រសួងការពារជាតិ បានផ្តល់ព័ត៌មានថា កម្ពុជា នឹងរៀបចំសមយុទ្ធបាញ់គ្រាប់ពិត នៅទីលានបាញ់គ្រាប់ពិតតេជោសែនជុំគិរី ស្ថិតនៅភូមិត្រពាំងវែង ឃុំត្រពាំងវែង ស្រុកជុំគិរី ខេត្តកំពត។ សមយុទ្ធដែលមានឈ្មោះថា «ហនុមានមាស២០១៩» មានរយៈពេល៦ថ្ងៃ គឺចាប់ពីថ្ងៃទី៣ ដល់ថ្ងៃទី៨ ខែឧសភា ឆ្នាំ២០១៩។

លោក ឈុំ សុជាត សរសរលើទំព័រហ្វេសប៊ុកផ្ទាល់ខ្លួនថា «ហនុមានមាស២០១៩» ត្រូវបានធ្វើឡើង ដើម្បីពង្រឹងសមត្ថភាព ចំណេះដឹង និងជំនាញ ដល់កងទ័ពជើងគោក ក្នុងកិច្ចការពារបូរណភាពទឹកដី នាពេលបច្ចុប្បន្ននិងអនាគត។ លោក បន្តថា សមយុទ្ធនេះ ក៏ជាការវាស់ស្ទង់សមត្ថភាព ក្រោយពីធ្វើការហ្វឹកហ្វឺនតាមបណ្តាសាលានិងកងឯកភាពរួចផងដែរ ហើយមួយវិញទៀត សមយុទ្ធនេះ នឹងជួយលើកកម្ពស់សមត្ថភាព គុណភាព និងផ្តល់ចំណេះដឹងការងារសេនាធិការ ក្នុងការសហការរវាងប្រភេទទ័ពនិងទ័ពជំនាញ ទាំងពេលហ្វឹកហ្វឺន និងពេលប្រយុទ្ធ។

បើតាមអ្នកនាំពាក្យ ពិធីបើកសមយុទ្ធ នឹងប្រព្រឹត្តទៅក្រោមអធិបតីភាពរបស់ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការនៃបញ្ជាការដ្ឋានកងទ័ពជើងគោក ហើយពិធីបិទ នឹងប្រព្រឹត្តទៅក្រោមអធិបតីភាពរបស់នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ។

អ្នកនាំពាក្យ បញ្ជាក់ថា សមយុទ្ធនេះ មានកម្លាំងយោធាចូលរួមជិត១៦០០នាក់។ ដោយឡែក អាវុធយុទ្ធភណ្ឌ ដែលនឹងប្រើប្រាស់ក្នុងសមយុទ្ធនេះ មានដូចជា កាំភ្លើងធំ១៥២មម និង១២២មម កាំភ្លើង២៣មម កាំភ្លើង៣៧មម កាំភ្លើង BM21 RM70 រថក្រោះ រថពាសដែក រថយន្តពេទ្យ រថយន្តពន្លត់អគ្គិភ័យ រថយន្តដឹកជញ្ជូន និង ឧទ្ធម្ភាគចក្រ ជាដើម។

«ហនុមានមាស ២០១៩» ត្រូវបានធ្វើឡើង៣លើករួចទៅហើយ ដោយលើកទី១នៅឆ្នាំ២០១០ លើកទី២ នៅឆ្នាំ២០១៣ លើកទី៣ នៅឆ្នាំ២០១៨។ អ្នកនាំពាក្យ លើកឡើងយ៉ាងដូច្នេះថា «ការហ្វឹកហ្វឺននេះ មិនបានគំរាមកំហែងដល់នរណាឡើយ ផ្ទុយទៅវិញការហ្វឹកហ្វឺននេះ មានគោលដៅពង្រឹងសមត្ថភាពកងទ័ពបន្ថែមទៀតប៉ុណ្ណោះ»។

អ្នកនាំពាក្យ អំពាវនាវកុំឲ្យប្រជាពលរដ្ឋ ដែលរស់នៅជិតតំបន់ហ្វឹកហ្វឺននោះ មានការភ្ញាក់ផ្អើលចំពោះការបាញ់សមយុទ្ធនេះ៕