តំណាងយុវជនកម្ពុជា២០រូប កំពុងចូលរួមវេទិកាអន្តរជាតិស្ដីពីសហគ្រិនភាពជាមួយប្រទេសចំនួន១៤ នៅចិន

ជាតិ

តំណាងយុវជនកម្ពុជា២០រូប កំពុងចូលរួមវេទិកាអន្តរជាតិស្ដីពីសហគ្រិនភាពជាមួយប្រទេសចំនួន១៤ នៅចិន

29, Apr 2019 , 3:51 pm

រូបភាព

ដោយ: ញឹក ស្រីល័ក្ខ (Nhek Sreyleak)

ខេត្តសានទុង៖ ប្រតិភូកម្ពុជាចំនួន២០រូប ដែលជាយុវជនវ័យក្មេង បានចូលរួមក្នុងវេទិកាអន្តរជាតិស្ដីពីសហគ្រិនភាពយុវជន-ក្ដីសុបិននៅតាមផ្លូវសូត្រ ដែលរៀបចំអង្គការកិច្ចសហប្រតិបត្តិការក្រុងសៀងហៃ។ វេទិកាអន្តរជាតិនេះ មានយុវជនវ័យក្មេងរាប់រយនាក់មកពីប្រទេសចំនួន ១៤ ដែលប្រព្រឹត្តទៅនៅទីក្រុងឈីងដៅ ខេត្តសានទុង នៅថ្ងៃទី ២៩ មេសានេះ។

វេទិកាអន្តរជាតិស្ដីពីសហគ្រិនភាពនេះ មានការចូលរួមពីថ្នាក់ដឹកនាំយុវជននៅទូទាំងប្រទេសចិន និងថ្នាក់ដឹកនាំយុវជនដែលមកពីប្រទេសចំនួន ១៤ រួមទាំងយុវជនវ័យក្មេងរាប់រយនាក់។ ក្នុងវេទិកានេះ ប្រតិភូយុវជនកម្ពុជាដឹកនាំដោយលោក ណេប សាមុត អគ្គនាយកនៃអគ្គនាយកដ្ឋានឧស្សាហកម្មទេសចរណ៍ និងយុវជនមកពីស្ថាប័នរដ្ឋ-ឯកជន រួមទាំងអ្នកសារព័ត៌មាន ThmeyThmey។

វេទិកាអន្តរជាតិនេះ ស្ថិតក្រោមកម្មវិធីបោះជំរំយុវជនស្ដីពីទំនាក់ទំនងយុវជននៃអង្គការកិច្ចសហប្រតិបត្តិការក្រុងសៀងហៃ (SCO) ដែលប្រព្រឹត្តទៅនៅទីក្រុងឈីងដៅ ខេត្តសានទុង និងទីក្រុងប៉េកាំង ចាប់ពីថ្ងៃទី ២៥ មេសា ដល់ថ្ងៃទី២ ឧសភា។ នេះជាលើកទី៤ហើយ ដែលអង្គការកិច្ចសហប្រតិបត្តិការក្រុងសៀងហៃរៀបចំកម្មវិធីបោះជំរំនេះ ដើម្បីផ្ដល់ឱកាសដល់យុវជននានាអាចទំនាក់ទំនង និងផ្លាស់ប្ដូរគំនិតយោបល់គ្នា។

តាមរយៈវេទិកាអន្តរជាតិនេះ ប្រតិភូយុវជនដែលមកពីប្រទេសមួយចំនួន បានថ្លែងសុន្ទរកថាគន្លឹះក្នុងប្រធានបទ ការតភ្ជាប់ និងការអភិវឌ្ឍរួមគ្នាក្នុងតំបន់ SCO រួមទាំងបដិវត្តន៍ឧស្សាហកម្មថ្មី និងឱកាសទំនាក់ទំនងជាលក្ខណៈអន្តរជាតិ។ វេទិកាអន្តរជាតិនេះ ជំរុញសកម្មភាពរបស់សហគ្រិនវ័យក្មេង ដោយបណ្ដុះបណ្ដាលសហគ្រិនវ័យក្មេង និងការកសាងសហគ្រិនភាពជាលក្ខណៈប្រព័ន្ធ។ ជាមួយគ្នានេះ អង្គការយុវជន និងសហគ្រិនវ័យក្មេង នឹងអាចចាប់យកឱកាសរវាងយុវជន តាមរយៈគម្រោង «ខ្សែក្រវាត់មួយផ្លូវមួយ»។

សូមបញ្ជាក់ថា ក្នុងកម្មវិធីបោះជំរំយុវជនស្ដីពីទំនាក់ទំនងយុវជននៃអង្គការកិច្ចសហប្រតិបត្តិការក្រុងសៀងហៃលើកទី៤ រៀបចំឡើងដើម្បីផ្សព្វផ្សាយពីស្មារតីសៀងហៃ និងការអភិវឌ្ឍរួមគ្នា ដោយផ្លាស់ប្ដូរកិច្ចសហប្រតិបត្តិរវាងសហគ្រិនវ័យក្មេង និងស្ថាប័នដែលធ្វើការទាក់ទងនឹងសហគ្រិនភាពរបស់ប្រទេសសមាជិក Shanghai Cooperation Organization Youth Campus (SCO)។ ប្រតិភូយុវជនចំនួន ១៤ប្រទេស រួមទាំងប្រទេសដែលជាសមាជិក SCO នឹងចូលរួមជាអ្នកសង្កេតការណ៍ និងជាដៃគូ ដែលពិភាក្សាគ្នាលើប្រធានបទផ្សេងៗផងដែរ។

ប្រទេសដែលចូលរួមក្នុងកម្មវិធីនេះ រួមមាន៖ ចិន, កម្ពុជា, ឥណ្ឌា,កាហ្សាក់ស្ថាន, រុស្ស៊ី, កៀហ្ស៊ីស៊ីស្ថាន, ប៉ាគីស្ថាន, តាហ្ស៊ីគីស្ថាន, អ៊ូសបេគីស្ថាន, អាហ្វហ្គានីស្ថាន, បេឡារុស, អ៊ីរ៉ង់ និងម៉ុងហ្គោលី៕