ជាតិ
កម្ពុជា សាងសង់សួននិម្មិតរូបមួយ ដោយប្រើរចនាប័ទ្មខ្មែរ ក្រោយសម័យអង្គរ នៅប្រទេសចិន
× ភ្នំពេញ៖ កម្ពុជា សាងសង់សួននិម្មិតរូបមួយ ដោយប្រើរចនាប័ទ្មខ្មែរ ក្រោយសម័យអង្គរ នៅលើទឹកដីចិន។ សួននិម្មិតរូបនេះ បានសាងសង់ក្នុងមជ្ឈមណ្ឌលតាំងពិព័រណ៌សាកវប្បកម្មអន្តរជាតិ២០១៩ ដែលជាមជ្ឈមណ្ឌលតាំងពិព័រណ៌លំដាប់អន្តរជាតិ ទើបសាងសង់ថ្មី នៅជាយទីក្រុងប៉េកាំង ប្រទេសចិន។ នេះបើតាមហ្វេសប៊ុករបស់សម្ដេចនាយករដ្ឋមន្ត្រី ហ៊ុន សែន។
សម្ដេច ហ៊ុន សែន បានកំពុងទស្សនកិច្ចនៅប្រទេសចិន ក្រោយចូលរួមវេទិកាគំនិតផ្ដួចផ្ដើម«ខ្សែក្រវ៉ាត់ និងវិថី» លើកទី២នោះ បាននិយាយថា មេដឹកនាំចិន បានផ្តល់ដីសម្រាប់ប្រទេសនីមួយៗ ដែលជាដៃគូសហប្រតិបត្តិការខ្សែក្រវាត់ និងវិថី ក្នុងការសាងសង់សួនដែលជានិម្មិតរូបទៅតាមបែបបទរបស់បណ្ដាប្រទេសទាំងនោះ។ ដូច្នេះប្រមុខរដ្ឋាភិបាលកម្ពុជា ក៏សម្រេចសាងសង់សួនកម្ពុជា ក្រោមប្រធានបទ «រស់នៅកាន់តែល្អប្រសើរ រស់នៅជាមួយបរិស្ថានបៃតង»។
តាមរយៈអត្ថន័យប្រធានបទនេះ នាយករដ្ឋមន្ត្រី ហ៊ុន សែន បានអះអាងថា គោលបំណងនៃការចូលរួម គឺដើម្បីជំរុញផ្សព្វផ្សាយពីវប្បធម៌ និងកសាងកេរ្តិ៍ឈ្មោះរបស់កម្ពុជា ឲ្យកាន់តែមានភាពល្បីល្បាញ មានការទទួលស្គាល់លើឆាកអន្តរជាតិ។ ហ្វេសប៊ុកប្រមុខរដ្ឋាភិបាល បានសរសេរដូច្នេះថា៖«ការចូលរួមក្នុងព្រឹត្តិការណ៍នេះ កម្ពុជានឹងមានឱកាស បានចែករំលែកបទពិសោធន៍ ទាក់ទាញនិងការរស់នៅប្រចាំថ្ងៃរបស់ប្រជាជន បង្ហាញពីវប្បធម៌ ប្រពៃណីទំនៀមទំលាប់ និងការប្រតិបត្តិរបស់ប្រជាជន ការរៀបចំបរិស្ថាននៃការរស់នៅ តាមរយៈការរៀបចំសួនដែលមានធម្មជាតិ និងរុក្ខជាតចម្រុះ តំណាងឲ្យអត្តសញ្ញាណជាតិ និងជាការពេញនិយមរបស់ប្រជាជន ដូចជាដើមត្នោត ដើមស្លា និងផ្កាភ្ញីជាដើម»។
បើតាមសម្ដេច ហ៊ុន សែន សួនកម្ពុជា ត្រូវបានសាងសង់ឡើងតាមរចនាប័ទ្មខ្មែរ សម័យក្រោយអង្គរ ដោយផ្សារភ្ជាប់គ្នារវាងធម្មជាតិ និងវប្បធម៌ ប្រពៃណី ទំនៀមទំលាប់របស់ខ្មែរ ការរៀបចំតុបតែងភូមិដ្ឋាន និងការបង្ហាញពីឧបករណ៍ សម្ភារៈ ដែលបម្រើដល់ជីវភាពរស់នៅប្រចាំថ្ងៃរបស់ប្រជាជន។ ក្លោងទ្វារចូលត្រូវបានរៀបចំ តាមរចនាប័ទ្មខ្មែរ យកលំនាំតាមក្លោងទ្វារសារមន្ទីរជាតិ និងមានរបងព័ន្ធជុំវិញបរិវេណសួន។ រូបសំណាក់ដែលមានព្រះភ័ក្ត្រញញឹមស្រទន់ ជាតំណាងឲ្យទសពិធរាជធម៌ របស់អតីតព្រះមហាក្សត្រខ្មែរ នាសម័យបុរាណ មានចិត្តមេត្តា ករុណា មុទិតា និងឧបេក្ខា គ្រប់ដណ្តប់លើផ្ទៃដីកម្ពុរដ្ឋ ក្នុងទិសទាំងបួន និងបានផ្តល់សេចក្តីសុខសន្តិភាពដល់មនុស្ស សត្វ និងរុក្ខជាតិ ដែលរស់នៅក្នុងភាពស្ងប់ស្ងៀមជាមួយនឹងធម្មជាតិ ស្របតាមប្រធានបទ«រស់នៅសុខដុមរមនាជាមួយធម្មជាតិ»។
ចំណែករោងនៅផ្នែកខាងស្តាំ និងខាងឆ្វេង នៃរូបសំណាក់ព្រហ្មមុខបួនវិញ មានរោងអដ្ឋកោណមួយ សម្រាប់ជាទីសម្រាកបណ្តោះអាសន្នរយៈពេលខ្លីរបស់ភ្ញៀវជាតិ និងអន្តរជាតិ បន្ទាប់ពីបានចូលទស្សនាសួន និងពន្លាជាតិកម្ពុជា។ ក្នុងរោងនេះ អ្នកទស្សនាអាចគយគន់ទស្សនីយភាពរបស់សួនកម្ពុជា ហើយក៏អាចសិក្សាស្វែងយល់ពីឧបករណ៍សម្ភារៈប្រើប្រាស់មួយចំនួនរបស់ប្រជាជនខ្មែរ នាសម័យបុរាណ ដែលមានដាក់តាំងលម្អក្បែរនោះ មានដូចជារទេះគោ នង្គ័ល រនាស់ និងឧបករណ៍ផ្សេងៗទៀត ដែលបម្រើឲ្យវិស័យកសិកម្ម។ នៅក្នុងសួននេះដែរ កម្ពុជាបានសាងសង់ពន្លាជាតិជា៣ខ្នង តាមរចនាប័ទ្មខ្មែរនាសម័យចតុមុខ។ នៅអមសងខាងទ្វារចូលពន្លាជាតិ មានដាក់តាំងរូបចម្លាក់តោថ្មចំនួន២ តាមរចនាប័ទ្មតោថ្មសម័យលង្វែក ដើម្បីបង្ហាញពីឫទ្ធានុភាព នៃអំណាចក្នុងការការពារផែនដី និងធម្មជាតិ។ នេះបើតាមហ្វេសប៊ុកសម្ដេច ហ៊ុន សែន។
សូមបញ្ជាក់ដែរថា ពិព័រណ៌សាកវប្បកម្មពិភពលោក ឆ្នាំ២០១៩នេះ មេដឹកនាំចិន ផ្ដល់ផ្ទៃដីឲ្យកម្ពុជាទំហំ១ពាន់ការ៉េ សម្រាប់សាងសង់សួន ដែលមានទីតាំងក្នុងមជ្ឈមណ្ឌលនៃពិព័រណ៌ពិភពលោក ក្នុងស្រុកយ៉ាងជីង ចម្ងាយប្រមាណ៧០គីឡូម៉ែត្រ ពីទីក្រុងប៉េកាំង៕
Tag:
ហ៊ុន សែន
សួនវប្បធម៌
© រក្សាសិទ្ធិដោយ thmeythmey.com