បន្ទាប់ពីចាញ់បឹងកេត និងវិសាខា ទីបំផុតភ្នំពេញក្រោនរកឃើញបីពិន្ទុលើកដំបូងរបស់ខ្លួនហើយនៅសប្តាហ៍ទី៥ ជាមួយនឹងជ័យជម្នះ ១-០ លើអាស៊ីអឺរ៉ុប។ ដោយឡែក ក្រោយការប្រកួតបាន១ថ្ងៃ លោក ប្រាក់ សុវណ្ណារ៉ា គ្រូបង្វឹកក្លិបអគ្គស្នងការដ្ឋាននគរបាលជាតិលោក បានសរសេរលើហ្វេសប៊ុកសំដែងការមិនពេញចិត្តចំពោះការហូតកាតពិន័យរបស់អាជ្ញាកណ្តាលទៅកីឡាកររបស់លោកនាជំនួបស្មើ ២-២ ជាមួយសូលទីឡូអង្គរនៅកីឡដ្ឋានអគ្គិសនីកម្ពុជា។
ខ្សែបម្រើប្រេស៊ីល Paulo Victor បានស៊ុតបាល់បញ្ចូលទីនៅ៦នាទីមុនបញ្ចប់ការប្រកួតដើម្បីជួយឲ្យភ្នំពេញក្រោន ទទួលបាន៣ពិន្ទុលើកដំបូងសម្រាប់ជំនួបដែលរៀបចំនៅកីឡដ្ឋាន RSN របស់ខ្លួន ក្រោមការដឹកនាំរបស់គ្រូបង្វឹកប្រេស៊ីល Leonardo Victorino។
ជ័យជម្នះនេះ នាំឲ្យភ្នំពេញក្រោន បាន៦ពិន្ទុពីការប្រកួត៥លើក ដោយឈរនៅចំណាត់ថ្នាក់លេខ៩ បណ្តោះអាសន្ន បន្ទាប់ពីអាស៊ីអឺរ៉ុប និងអគ្គិសនីកម្ពុជា។
សម្រាប់ការប្រកួតកាលពីថ្ងៃអាទិត្យម្សិលមិញផងដែរ អង្គរថាយហ្គឺរធ្វើឲ្យក្រុមភ្ញៀវវិសាខាស្គាល់ចាញ់លើកដំបូងជាមួយនឹងលទ្ធផល ២-១ រីឯម្ចាស់ការពារជើងឯក ណាហ្គាវើល បន្តបាន៣ពិន្ទុ ក្រោយឈ្នះគិរីវង់សុខសែនជ័យ ៣-១។
ងាកទៅជំនួបរវាងអគ្គស្នងការដ្ឋាននគរបាលជាតិ និងសូលទីឡូអង្គរវិញ ការប្រកួតបញ្ចប់ក្នុងលទ្ធផលស្មើ ២-២ នៅលើទីលានអគ្គិសនីកម្ពុជាដែលពោរពេញទៅដោយទឹកដក់ពេញ ក្រោយភ្លៀងមួយមេដ៏ធំ។
ខ្សែបម្រើនីហ្សេរីយ៉ា Jose Magson និង នួន បូរី ជាអ្នករកគ្រាប់បាល់បញ្ចូលទីឲ្យនគរបាលជាតិ រីឯគ្រាប់បាល់ទាំងពីរគ្រាប់របស់សូលទីឡូអង្គរសម្រេចបានដោយខ្សែបម្រើ Yuta Kikuchi។
លទ្ធផលឈ្នះចាញ់ ឬស្មើ មិនមានអ្វីដែលលោក ប្រាក់ សុវណ្ណារ៉ា ត្រូវប្រកែកតវ៉ានោះឡើយ ប៉ុន្តែគ្រូបង្វឹកក្លិបនគរបាលជាតិរូបនេះ បានរិះគន់ចំពោះការហូតកាតពិន័យរបស់អាជ្ញាកណ្តាល ដោយក្រុមលោកទទួលបានកាតក្រហម២ និងកាតលឿង៥។
អ្នកចាត់ការរូបនេះបន្ថែមថា៖«ការពិតរឿងលទ្ធផលចាញ់ ឬឈ្នះយើងមិនទោមនស្សនោះទេ។ ប៉ុន្តែបំណងដែលខ្ញុំចង់សរសេរ គឺក្លិបនីមួយៗគេព្យាយាមអប់រំខ្លាំងណាស់រឿងចិត្តសាស្ត្រទាក់ទងនឹងអាជ្ញាកណ្តាល ព្រោះក្លិបនីមួយៗមានកីឡាករ មានគុណភាពតិចណាស់។ យើងព្យាយាមរហូតស្នើសុំសហព័ន្ធឲ្យបន្ធូរបន្ថយកាតលឿងបី ឬបួនចាំព្យួរ ព្រោះយើងគ្មានកីឡាករលេង»។
ជាមួយការចំអកនេះ អតីតគ្រូបង្វឹកជួយឲ្យបឹងកេតលើកពានលីគកំពូលឆ្នាំ២០១៥រូបនេះ បានចោទអាជ្ញាកណ្តាលខាងលើថា ជាអាជ្ញាកណ្តាលដែលប្រើអារម្មណ៍ក្នុងកាត់សេចក្តី។ សម្រាប់លោក ប្រាក់ សុវណ្ណារ៉ា ការកាត់ក្តីបែបនេះ នឹងជះឥទ្ធិពលមិនល្អដល់ក្លិប តាមរយៈប្រឈមនឹងអត់កីឡាករប្រើប្រាស់ក្នុងជំនួបបន្ទាប់ ដោយសារការចាយកាតឥតសំចៃរបស់អាជ្ញាកណ្តាលរូបនេះ។
«ក្លិបនីមួយៗបើបាត់កីឡាករល្អៗណាមួយ គឺវាធ្វើឲ្យការប្រកួតមិនសូវល្អមើល។ គាត់នឹង(លោក ឃួន វីរៈ) មិនមែនទើបតែឥឡូវនឹងនោះទេ គឺរាប់ឆ្នាំមកហើយ គឺគាត់សប្បាយនឹងការដកកាត គ្រាន់តែលោតបុកគ្នាធ្ងន់បន្តិចកាត មិនដឹងម៉េចគាត់។ ខ្ញុំខ្លាចគាត់មែនពីម្សិលមិញ អារម្មណ៍នៃការលេងស្ទើរគ្មាន និយាយពីអង្វរ សឹងលត់ជង្គង់មុខកីឡាករថា គាត់កាច តែនៅតែមានកាតក្រហម»។ នេះជាការលើកឡើងរបស់លោក ប្រាក់ សុវណ្ណារ៉ា៕