ជាតិ
សិស្សពូកែថ្នាក់ទី៩៖ កណ្តាលខ្លាំងអក្សរសិល្ប៍ ភ្នំពេញនាំមុខគណិត រីឯព្រៃវែងលេខ១រូបវិទ្យា
× ក្រសួងអប់រំ យុវជន និងកីឡា កាលពីថ្ងៃទី២៨ ខែមេសា បានចេញប្រកាសស្តីពីការទទួលស្គាល់សិស្សពូកែទូទាំងប្រទេសផ្នែកអក្សរសិល្បិ៍ខ្មែរ គណិតវិទ្យា និងរូបវិទ្យា ថ្នាក់ទី៩ និងថ្នាក់ទី១២ ឆ្នាំ២០១៩នេះ។ សិស្សពូកែ ដែលក្នុងមួយមុខវិជ្ជាមាន១០នាក់នោះ ត្រូវបានជ្រើសរើសចេញពីសម័យប្រឡងថ្ងៃទី២២ ខែមេសា នៅខេត្តសៀមរាប។
សម្រាប់ថ្នាក់ទី៩ សិស្សស្រីមានរហូតដល់ទៅ៦នាក់ក្នុងចំណោមសិស្សដែលក្រសួងទទួលស្គាល់សរុប១០នាក់លើមុខវិជ្ជាអក្សរសិល្បិ៍ខ្មែរ។ សិស្សស្រីពីអនុវិទ្យាល័យព្រះសីហនុរាជ ខេត្តកណ្តាល រហូតដល់ទៅ៣នាក់ ទទួលបានចំណាត់ថ្នាក់ខ្ពស់ជាងគេ ដោយ រ៉ុន រ៉ូនីតា បានលេខ១ ឃុន ស៊ូឡា បានលេខ២ និង ឆាយ លិញអ៊ី បានលេខ៣ ។ ជ័យលាភី៧រូបទៀត មានព្រៃវែង (២នាក់) សៀមរាប កំពត ពោធិ៍សាត់ កណ្តាល និងរាជធានីភ្នំពេញ។
ចំពោះមុខវិជ្ជា គណិតវិទ្យា បេក្ខជនពីវិទ្យាល័យប៊ែលធីអន្តរជាតិក្នុងរាជធានីភ្នំពេញ នាំមុខគេ ដោយ តែ ប៊ុនម៉េង ពីសាខាទី៥ បានចំណាត់ថ្នាក់លេខ១ និង ឃន វណ្ណដា ពីសាខាទី១១ បានលេខ២ ។ ក្នុងចំណោម១០នាក់ដែលជាសិស្សពូកែមុខវិជ្ជានេះ មាននារីតែ២នាក់ប៉ុណ្ណោះ គឺ កែវ សុគន្ធធារី ពីខេត្តតាកែវ បានលេខ៣ និង ធូ រ៉ាណេ ពីរាជធានីភ្នំពេញ បានលេខ៦។ ជ័យលាភី៦រូបផ្សេងទៀត មកពីកំពង់ចាម ពោធិ៍សាត់ កំពង់ស្ពឺ តាកែវ កំពត និងកំពង់ឆ្នាំង។
ងាកទៅមុខវិជ្ជា រូបវិទ្យា បេក្ខជន មន់ សីម៉ា ពីវិទ្យាល័យមេសាង ខេត្តព្រៃវែង បានចំណាត់ថ្នាក់លេខ១ ឡុង សុខលី ពីវិទ្យាល័យអន្តរជាតិយូ អេស អេ ខេត្តបាត់ដំបង បានលេខ២ និងអ៊ឹង ហុកឆាយ ពីវិទ្យាល័យក្រុងកំពង់ឆ្នាំង ខេត្តកំពង់ឆ្នាំង បានលេខ៣។ ជ័យលាភី៧រូបទៀត មកពីខេត្តកណ្តាល (២រូប) កំពង់ឆ្នាំង (២រូប) ពោធិ៍សាត់ ភ្នំពេញ និងបាត់ដំបង។
ប្រកាសដែលចុះហត្ថលេខាដោយលោករដ្ឋមន្ត្រី ហង់ ជួន ណារ៉ុន បានបញ្ជាក់ថា សិស្សពូកែទាំងនោះទទួលវិញ្ញាបនបត្របញ្ជាក់សិស្សពូកែទូទាំងប្រទេសម្នាក់១ច្បាប់ ហើយអ្នកបានចំណាត់ថ្នាក់ពីលេខ១ ដល់លេខ៣ ទទួលបានមេដាយម្នាក់មួយគ្រឿង។
សម្រាប់ប្រាក់រង្វាន់ ចំណាត់ថ្នាក់លេខ១ ទទួលបានថវិកាចំនួន៣លាន៥សែនរៀល លេខ២ ទទួលបាន៣លាន២សែនរៀល លេខ៣ បាន២លាន៩សែនរៀល លេខ៤ បាន២លាន៦សែនរៀល លេខ៥ បាន២លាន៣សែនរៀល លេខ៦បាន២លានរៀល លេខ៧ បាន១លាន៧សែនរៀល លេខ៨បាន១លាន៤សែនរៀល លេខ៩ បាន ១លាន១សែនរៀល និងលេខ១០ បាន ៨សែនរៀល រួមទាំងថវិកា ឬវត្ថុផ្សេងៗពីសប្បុរសជន៕
© រក្សាសិទ្ធិដោយ thmeythmey.com