អន្តរជាតិ
រុស្ស៊ីចង់ចាប់ផ្ដើមតុចរចា៦ភាគីឡើងវិញ តែអាមេរិកចង់ចរចាមួយស្មើជាមួយកូរ៉េខាងជើង
× ក្រោយជំនួបសប្ដាហ៍មុនជាមួយមេដឹកនាំកូរ៉េខាងជើង ប្រធានាធិបតីរុស្ស៊ី វ្ល៉ាឌីមៀ ពូទីន បានលើកឡើងពីលទ្ធភាពនៃការចាប់ផ្ដើមតុចរចា៦ភាគីឡើងវិញ។ ការចរចា៦ភាគី មិនមានដំណើរការអ្វីឡើយតាំងពីឆ្នាំ២០០៩ មក។ យ៉ាងណាមិញ អាមេរិកដែលជាភាគីមួយក្នុងចំណោមភាគីទាំង៦ គ្មានបំណងវិលទៅរកក្បួនចរចាចាស់នេះឡើយ តែចង់ចរចាមួយទល់នឹងមួយជាមួយកូរ៉េខាងជើងដើម្បីដោះស្រាយបញ្ហានុយក្លេអ៊ែរ។
តុចរចា៦ភាគី ជាយន្តការពហុភាគីដើម្បីដោះស្រាយបញ្ហានុយក្លេអ៊ែររបស់កូរ៉េខាងជើង។ ចាប់ផ្ដើមនៅឆ្នាំ២០០៣ យន្តការចរចាមួយនេះមានប្រទេសចូលរួមដូចជា អាមេរិក ចិន រុស្ស៊ី កូរ៉េខាងត្បូង កូរ៉េខាងជើង និងជប៉ុន។ ប៉ុន្តែ ការចរចានេះបានដួលរលំទៅវិញក្នុងឆ្នាំ២០០៩ ។ នៅក្នុងការវិវត្តចុងក្រោយ ក្រុងវ៉ាស៊ីនតោន និងក្រុងព្យុងយ៉ាង ក៏បែរជាជួបគ្នាដោយវិញដើម្បីដោះស្រាយកម្មវិធីនុយក្លេអ៊ែររបស់រដ្ឋកុម្មុយនីស្តមួយនេះ តែលទ្ធផលនៅតែគ្មានដដែល។
ប្រធានាធិបតីរុស្ស៊ី វ្ល៉ាឌីមៀ ពូទីន ដែលទើបជួបជាមួយប្រមុខដឹកនាំកូរ៉េខាងជើង គីម ជុងអ៊ុន កាលពីថ្ងៃទី២៥ ខែមេសា ចង់ឲ្យភាគីទាំង៦ ជួបគ្នាឡើងវិញ។ នាសន្និសីទសារព័ត៌មានក្រោយជំនួបទល់មុខលើកដំបូងនៅឯទីក្រុងវ្ល៉ាឌីវ៉ូស្តុក លោក ពូទីន លើកឡើងថា ការចាប់ផ្ដើមយន្តការនេះឡើងវិញ ជាការបំបែកការជាប់គាំងក្នុងការចរចារវាងអាមេរិក និងកូរ៉េខាងជើង។
យ៉ាងណាមិញ អាមេរិកហាក់គ្មានបំណងទៅគាស់រំលើងការចរចាដែលគាំងមិនទៅមុខនេះឡើយ។ ក្នុងកិច្ចសម្ភាសជាមួយទូរទស្សន៍ Fox News លោក ចន ប៊ូលតុន ទីប្រឹក្សាសន្តិសុខជាតិរបស់លោកប្រធានាធិបតី ដូណាល់ ត្រាំ ត្រូវបានសួរសំណួរពាក់ព័ន្ធជំហររបស់ប្រធានាធិបតីជុំវិញការអធិប្បាយរបស់លោក ពូទីន ។ លោក ប៊ូលតុន អះអាងថា មេកើយរបស់លោកមិនចង់មានការចរចាពហុភាគីលើកម្មវិធីនុយក្លេអ៊ែរកូរ៉េខាងជើងឡើយ ដ្បិតវាបរាជ័យទៅហើយ។
បើតាមទីប្រឹក្សាសន្តិសុខជាតិរូបនេះ ការជួបចរចាមួយទល់មួយរវាងអាមេរិក និងកូរ៉េខាងជើង មិនត្រឹមតែជាការចង់បានរបស់អាមេរិកតែម្ខាងឡើយ គឺសូម្បីកូរ៉េខាងជើងចង់បានដូច្នេះដែរ។ លោក ប៊ូលតុន ដែលជារឿយៗក្លាយជាមុខសញ្ញារិះគន់របស់ក្រុងព្យុងយ៉ាង លើកឡើងថា មកទល់បច្ចុប្បន្ននេះ ប្រមុខដឹកនាំកូរ៉េខាងជើង គីម ជុងអ៊ុន មានបំណងជួបជជែកជាមួយលោក ត្រាំ ដោយផ្ទាល់ដូចដែលបានកើតឡើងពីរដងទៅហើយ។
ទោះប្រកាន់ជំហរចរចាមួយស្មើជាមួយកូរ៉េខាងជើងក្ដី លោក ប៊ូលតុន បញ្ជាក់ថា អាមេរិកមិនបានប៉បង់ការជជែកជាមួយដៃគូពាក់ព័ន្ធក្នុងដំណើរការការទូតជាមួយកូរ៉េខាងជើងឡើយ។ លោកថា លោក ត្រាំ ទើបបានជួបជជែកជាមួយនាយករដ្ឋមន្ត្រីជប៉ុន ស៊ិនហ្សូ អាបេ កាលពីថ្ងៃទី២៦ ខែមេសាកន្លងទៅ ហើយបានផ្លាស់ប្ដូរយោបល់ជាមួយសមភាគីរុស្ស៊ី និងចិនផងដែរ។ កាន់តែសំខាន់ លោក ត្រាំ មិនភ្លេចប្រធានាធិបតីកូរ៉េខាងត្បូង មូន ចេអ៊ីន ដែរ៕
Tag:
រុស្ស៊ី
កូរ៉េខាងជើង
អាមេរិក
វ្ល៉ាឌីមៀ ពូទីន
© រក្សាសិទ្ធិដោយ thmeythmey.com