ឥណ្ឌូណេស៊ី ឃាត់ខ្លួន​អ្នកនេសាទ​វៀតណាម​១២​នាក់ ក្រោយ​ប៉ះទង្គិច​គ្នា​
អន្តរជាតិ
ឥណ្ឌូណេស៊ី ឃាត់ខ្លួន​អ្នកនេសាទ​វៀតណាម​១២​នាក់ ក្រោយ​ប៉ះទង្គិច​គ្នា​
29, Apr 2019 , 11:19 pm        
រូបភាព
​កាលពី​ចុង​សប្ដាហ៍​មុន នាវា​ល្បាត​របស់​ឥណ្ឌូណេស៊ី​មួយគ្រឿង ត្រូវបាន​បុក​ដោយ​នាវា​ល្បាត​ឆ្នេរ​វៀតណាម​២​គ្រឿង​។ ហេតុការណ៍​ប៉ះទង្គិច​គ្នា​នេះ បាន​កើតឡើង​ក្រោយពី​នាវា​ល្បាត​ឥណ្ឌូណេស៊ី បាន​ស្ទាក់ចាប់​ទូក​នេសាទ​វៀតណាម​មួយគ្រឿង ដែល​ខ្លួន​អះអាងថា​បានធ្វើ​សកម្មភាព​នេសាទ​ត្រី​ខុសច្បាប់​ក្នុង​ដែន​ទឺ​ក​ឥណ្ឌូណេស៊ី​។

 
​ការប៉ះទង្គិច​រវាង​នាវា​ល្បាត​វៀតណាម និង​ឥណ្ឌូណេស៊ី បាន​កើតឡើង​កាលពី​ថ្ងៃ​សៅរ៍​ទី ២៧ ខែមេសា និង​បាន​បង្ក​ឲ្យ​លិច​ទូក​វៀតណាម​មួយគ្រឿង​។ ក្នុង​ហេតុការណ៍​ប៉ះទង្គិច​គ្នា​នេះ កងកម្លាំង​ជើង​ទឺ​ក​ឥណ្ឌូណេស៊ី បាន​ចាប់ឃុំខ្លួន​អ្នកនេសាទ​វៀតណាម ១២​នាក់ ពី​ទូក​ដែល​លិច​នោះ​។ នេះ​បើតាម​ការបញ្ជាក់​របស់​លោក Yudo Margono មេបញ្ជាការ​កងទ័ពជើងទឹក​តំបន់​ខាងលិច​របស់​ឥណ្ឌូណេស៊ី​។ 
 
​លោក Yudo បានបញ្ជាក់​ឲ្យ​ដឹង​ទៀតថា អ្នក​ទាំង​១២​នាក់​នោះ ត្រូវ​ឃុំខ្លួន​នៅ​មូលដ្ឋាន​ជើង​ទឹក​ឥណ្ឌូណេស៊ី ដើម្បី​ដំណើរការ​នីតិវិធី​ច្បាប់​បន្តទៀត​។ ចំណែក​មនុស្ស​២​នាក់​ផ្សេងទៀត ត្រូវបាន​ជួយ​រំដោះ​ដោយ​កង​ល្បាត​ឆ្នេរ​របស់​វៀតណាម​។ បើតាម​ការចុះផ្សាយ​រប​ស់​ទីភ្នាក់ងារ​ព័ត៌មាន AP  មន្ត្រី​យោធា​ជាន់ខ្ពស់​រូបនេះ លើកឡើងថា ទីតាំង​ចាប់ខ្លួន ពិតជា​កើតឡើង​ក្នុង​ដែនទឹក​ឥណ្ឌូណេស៊ី​មែន​។ ប៉ុន្តែ​ភាគី​វៀតណាម ក៏បាន​អះអាង​ដូចគ្នា​ថា តំបន់​នោះ គឺជា​ដែនទឹក​របស់ខ្លួន​។​
 
​យោងតាម​វីដេអូ​មួយ ដែល​ថត​ចេញពី​នាវា​ឥណ្ឌូណេស៊ី និង​ត្រូវបាន​ចែករំលែក​យ៉ាង​ទូលំទូលាយ​លើ​បណ្តាញ​សង្គម នាវា​ល្បាត​វៀតណាម​មួយគ្រឿង​បាន​បើក​ទៅ​បំ​បុក​ជាមួយ​នាវា​ឥណ្ឌូណេស៊ី ខណៈ​គេ​លឺ​កងកម្លាំងប្រដាប់អាវុធ​ឥណ្ឌូណេស៊ី​បាន​ស្រែកជេរ​ប្រមាថ ដូចជា «​ឆ្កែ​» និង​«​ជ្រូក​» ជាដើម​។ 
 
 
​សូមបញ្ជាក់ថា ឥណ្ឌូណេស៊ី ដែលជា​ប្រជាជាតិ​មាន​ប្រជុំ​កោះ​ច្រើន​បំផុត​របស់​ពិភពលោក បាន​បុក​ពន្លិច​នាវា​នេសាទ​ខុសច្បាប់​រាប់រយ​គ្រឿង​របស់​វៀតណាម ហ្វីលីពីន ចិន និង​បណ្តា​ប្រទេស​ផ្សេងទៀត ចាប់តាំងពី​ឆ្នាំ​២០១៤​មក​។ ប្រតិបត្តិ​ការបុក​ពន្លិច​នេះ ស្ថិត​ជា​ផ្នែក​មួយ​នៃ​កិច្ចប្រឹងប្រែង​របស់​រដ្ឋា​ភិ​បាល​ឥណ្ឌូណេស៊ី ក្នុង​គោលដៅ​ពង្រីក​ការគ្រប់គ្រង​លើ​ដែនទឹក​ដ៏​ធំធេង​របស់ខ្លួន​ឲ្យ​ធំ​បន្ថែមទៀត​៕

Tag:
 វៀតណាម​
  ឥណ្ឌូណេស៊ី​
  សមុទ្រ
© រក្សាសិទ្ធិដោយ thmeythmey.com