ជាតិ
ស្រាសំប៉ាញបារាំងត្រូវបានចុះបញ្ជីម៉ាកសម្គាល់ភូមិសាស្ត្រនៅកម្ពុជា
× ស្រាសំប៉ាញ (Champange)ដែលមានប្រវត្តិជាច្រើនរយឆ្នាំ របស់បារាំងបានក្លាយជាទំនិញបរទេសដំបូងគេបង្អស់ដែលត្រូវចុះបញ្ជីម៉ាកសម្គាល់ភូមិសាស្ត្រនៅក្រសួងពាណិជ្ជកម្មកម្ពុជាដែលនឹងត្រូវការពារកម្មសិទ្ធិបញ្ញារបស់ម៉ាកស្រាសំប៉ាញនៅកម្ពុជា។
រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ បានប្រគល់វិញ្ញាបនបត្រសម្គាល់ភូមិសាស្ត្រលើផលិតផលស្រាសំប៉ាញដល់លោក Vincent Perrin អគ្គនាយកគណៈកម្មាធិការអន្តរអាជីពស្រាសំប៉ាញ នៅចំពោះមុខលោកស្រីអគ្គរដ្ឋទូតបារាំង Eva Nguyen Binh នៅស្ថានទូតបារាំងនាល្ងាចថ្ងៃទី២៩ខែមេសានេះ។ តំណាងក្រុមហ៊ុននាំចូលស្រាសំប៉ាញជាច្រើន តំណាងស្ថាប័នគយ សមាគមចុងភៅ និងអ្នកពាក់ព័ន្ធមួយចំនួនទៀតបានមានវត្តមាននៅក្នុងពិធីប្រកាសការទទួលបានការការពារជាផ្លូវការផ្នែកកម្មសិទ្ធិបញ្ញាលើផលិតផលស្រាសំប៉ាញនៅកម្ពុជា។
បញ្ជាក់នៅក្នុងពិធីនោះ លោករដ្ឋមន្ត្រីពាណិជ្ជកម្មកម្ពុជាបានជាភាសាបារាំងថា ការចុះបញ្ជីម៉ាកសម្គាល់ភូមិសាស្ត្រនេះ បានបង្ហាញអំពីដំណើរការល្អនៃប្រព័ន្ធការពារកម្មសិទ្ធិបញ្ញាដែលជាយន្តការដ៏ស្មុគស្មាញមួយ។
លោករដ្ឋមន្ត្រីបានបន្តយ៉ាងដូច្នេះថា៖«ការចុះបញ្ជីដូចនេះនឹងនាំឱ្យមានការការពារយ៉ាងតឹងរឹង និងមានប្រសិទ្ធភាពចំពោះស្រាសំប៉ាញ ទប់ទល់នឹងការផលិតមិនត្រឹមត្រូវ។ កម្ពុជាគាំទ្រគំនិតនៃការបង្កើតឱ្យមានការសម្គាល់ភូមិសាស្ត្រលើទំនិញ ក៏ដូចជាការគោរពកម្មសិទ្ធិបញ្ញា»។
សម្រាប់លោកស្រីអគ្គរដ្ឋទូតបារាំង ការលើកស្ទួយកម្មសិទ្ធិបញ្ញា ជាពិសេសផលិតផលសម្គាល់ភូមិសាស្ត្រ គឺជាអាទិភាពរួមគ្នាមួយរបស់ប្រទេសបារាំង និងកម្ពុជា។ លោកស្រីបន្តថា ការទទួលស្គាល់ប្រភពដើមទំនិញ វាគឺជាការទទួលស្គាល់ផលិតផលកសិកម្មដ៏ល្បីឈ្មោះមួយដោយភ្ជាប់ជាមួយនិងរបៀបធ្វើ និងគុណភាព ហើយដែលត្រូវបានកំណត់នៅក្នុងសៀវភៅបន្ទុក និងមានប្រភពភូមិសាស្ត្រជាក់លាក់។
«ទន្ទឹមគ្នានេះ ការការពារម៉ាកយីហោផលិតផលបារាំងនៅកម្ពុជា ក៏ទាក់ទាញចំណាប់អារម្មណ៍ផលិតករបារាំងផងដែរ»។ នេះជាការគូសបញ្ជាក់របស់លោកស្រីអគ្គរដ្ឋទូត Eva Nguyen Binh។
គួរបញ្ជាក់ថា ផលិតផលកសិកម្មរបស់កម្ពុជាចំនួន៣ហើយដែលត្រូវបានចុះបញ្ជីម៉ាកសម្គាល់ភូមិសាស្ត្រ គឺម្រេចកំពត ស្ករត្នោតកំពង់ស្ពឺ និងក្រូចថ្លុងកោះទ្រង់ខេត្តក្រចេះ៕
Tag:
champagne
GI
ស្ថានទូតបារាំង
© រក្សាសិទ្ធិដោយ thmeythmey.com