អន្តរជាតិ
នាយករដ្ឋមន្ត្រី មហាធៀ៖ ឲ្យតែខ្ញុំនៅរស់ ខ្ញុំមិនឲ្យម៉ាឡេស៊ីធ្លាក់ចុះឡើយ នាយករដ្ឋមន្រ្តីម៉ាឡេស៊ី មហាធៀ មហាម៉ាត់ ក្នុងពិធីមួយនៅឯរដ្ឋសភា។ រូបភាព AFP
× នាយករដ្ឋមន្ត្រីម៉ាឡេស៊ី មហាធៀ មហាម៉ាត់ នៅថ្ងៃទី២៩ ខែមេសា បានប្រកាសការតាំងចិត្តយ៉ាងមុតម៉ាក្នុងការកាច់ចង្កូតនាវាម៉ាឡេស៊ីឲ្យទៅមុខ។ កាន់តំណែងនាយករដ្ឋមន្ត្រីជាលើកទីពីរក្នុងអាជីពនយោបាយរបស់ខ្លួន លោក មហាធៀ សន្យាថា នឹងមិនបណ្ដោយឲ្យម៉ាឡេស៊ីជួបបញ្ហាមិនរៀបរយឡើយ។ លោកសន្យាបែបនេះ ស្របពេលរដ្ឋបាលរបស់លោកជួបបញ្ហាជាច្រើនដោះស្រាយមិនទាន់ចេញតាំងពីដឹកនាំប្រទេសក្នុងឆ្នាំ២០១៨ មក។
ថ្លែងក្នុងសន្និសីទមួយស្ដីពីការរៀបចំរចនាសម្ព័ន្ធគ្រប់គ្រង នាយករដ្ឋមន្ត្រីម៉ាឡេស៊ី មហាធៀ មហាម៉ាត់ បានទទួលស្គាល់ថា ម៉ាឡេស៊ីជួបបញ្ហាប្រឈមជាច្រើន ហើយដែលមិនអាចជម្នះបានទៅទៀត។ ទោះជាបែបនេះក្ដី លោក មហាធៀ មិនរាថយឡើយ ហើយប្រកាសធ្វើយ៉ាងណាដឹកនាំម៉ាឡេស៊ីទៅមុខ មិនទៅថយក្រោយឡើយ។
ចំពោះមុខអ្នកចូលរួមជាច្រើន ប្រមុខរដ្ឋាភិបាលវ័យចំណាស់ជាងគេលើពិភពលោករូបនេះអះអាងថា ឲ្យតែនៅមានជីវិត លោកនឹងមិនអនុញ្ញាតឲ្យម៉ាឡេស៊ីក្លាយទៅជាប្រទេសគ្មានរបៀបរៀបរយ ធ្លាក់ចុះ បាត់បង់សេចក្ដីថ្លៃថ្នូរ និងគ្មានគោលដៅឡើយ។ នេះបើតាមការផ្សាយរបស់ទីភ្នាក់ងារព័ត៌មានម៉ាឡេស៊ី Bernama ។ លោក មហាធៀ បន្តថា ម៉ាឡេស៊ី ធ្លាប់ពុះពារគ្រប់បញ្ហាកាលពីអតីត ហើយបន្តជម្នះរាល់បញ្ហានៅបច្ចុប្បន្ន និងនៅថ្ងៃខាងមុខទៀត។
លោក មហាធៀ ដែលមានវ័យ៩៣ឆ្នាំទៅហើយ បានវិលមកអង្គុយកៅអីនាយករដ្ឋមន្ត្រីម្ដងទៀត ក្រោមរូបភាពបក្សប្រឆាំង បន្ទាប់ពីផ្ដួលសម្ព័ន្ធភាពកាន់អំណាច Barisan Nasional ដែលលោកធ្លាប់ដឹកនាំកាលពីអតីតក្នុងការបោះឆ្នោតទូទៅឆ្នាំ២០១៨ ។ រយៈពេលជិតមួយឆ្នាំក្នុងអំណាច រដ្ឋាភិបាលសម្ព័ន្ធភាពកាន់អំណាច Pakatan Harapan ជួបបញ្ហាជាច្រើនដូចជាការឡើងថ្លៃទំនិញ និងបញ្ហារើសអើងពូជសាន៍ជាដើម។
ក្នុងពិធីដដែលនោះ ប្រមុខរដ្ឋាភិបាលម៉ាឡេស៊ីដែលធ្លាប់ដឹកនាំប្រទេសចន្លោះឆ្នាំ១៩៨១ ដល់ឆ្នាំ២០០៣ រូបនេះ ក៏បានចែករំលែកបទពិសោធដឹកនាំប្រទេសផង ពិសេសរបៀបដឹកនាំប្រទេសដែលចម្រុះពូជសាសន៍ដូចម៉ាឡេស៊ីនេះ។ លោកថា រឿងដែលសំខាន់សម្រាប់ការគ្រប់គ្រងប្រទេស គឺការស្វែងរកចំណុចរួម និងគោលបំណងរួមដើម្បីប្រមូលផ្ដុំប្រជាជនតែមួយ ហើយលោកក៏គ្មានអាថ៌កំបាំងដឹកនាំប្រទេសអ្វីឡើយ។
សូមបញ្ជាក់ថា បញ្ហាប្រឈមជាច្រើនដែលលេចឡើងនៅម៉ាឡេស៊ី ហើយមិនទាន់ត្រូវបានដោះស្រាយឲ្យស្រេចបាច់ បានប៉ះពាល់ប្រជាប្រិយភាពរដ្ឋាភិបាលលោក មហាធៀ យ៉ាងខ្លាំង។ ក្នុងការស្ទង់មតិដែលធ្វើឡើងក្នុងខែមីនា អ្នកចូលរួមចំនួន៤៦ភាគរយ បានបង្ហាញការយល់ស្របលើការដឹកនាំរបស់លោក មហាធៀ ដែលនេះជាការធ្លាក់យ៉ាងខ្លាំង ព្រោះកាលពីខែសីហា ឆ្នាំ២០១៨ លោកទទួលបានការយល់ព្រមចំនួន៧១ភាគរយឯណោះ៕
Tag:
ម៉ាឡេស៊ី
មហាធៀ មហាម៉ាត់
© រក្សាសិទ្ធិដោយ thmeythmey.com