អធិរាជជប៉ុន អាគីហ៊ីតុ ដាក់រាជ្យផ្លូវការហើយ

អន្តរជាតិ

អធិរាជជប៉ុន អាគីហ៊ីតុ ដាក់រាជ្យផ្លូវការហើយ

30, Apr 2019 , 3:34 pm

រូបភាព

ដោយ: តន ចាន់រិទ្ធារ៉ា

អធិរាជជប៉ុន អាគីហ៊ីតុ នៅថ្ងៃទី៣០ ខែមេសា បានដាក់រាជ្យជាផ្លូវការហើយ។ ព្រះអង្គក្លាយជាអធិរាជជប៉ុនទីមួយក្នុងរយៈពេលជាងពីររយឆ្នាំដែលដាក់រាជ្យបែបនេះ ខណៈច្បាប់ជប៉ុនចែងថា អធិរាជត្រូវសោយរាជ្យអស់មួយព្រះជន្ម។ រជ្ជទាយាទ ណារ៉ូហ៊ីតុ នឹងឡើងគ្រងរាជ្យបន្តពីបិតារបស់ទ្រង់ក្នុងពិធីដែលធ្វើនៅថ្ងៃទី១ ខែឧសភា។

រជ្ជកាល Heisei ដែលមានរយៈពេល៣០ឆ្នាំ ៤ខែ របស់អធិរាជ អាគីហ៊ីតុ បានបញ្ចប់ហើយនៅថ្ងៃទី៣០ ខែមេសានេះ។ អធិរាជ អាគីហ៊ីតុ ដែលជាអធិរាជជំនាន់ទី១២៥ របស់ជប៉ុន ឡើងគ្រងរាជ្យផ្លូវការកាលពីថ្ងៃទី១ ខែមករា ឆ្នាំ១៩៨៩ បន្តពីបិតាអធិរាជ ហ៊ីរ៉ូហ៊ីតុ ដែលដឹកនាំជប៉ុនប្រយុទ្ធក្នុងសម័យសង្គ្រាមលោក។

កម្មវិធីដាក់រាជ្យសម្បត្តិបែបសាសនា បានចាប់ផ្ដើមតាំងពីព្រឹកថ្ងៃទី៣០ ខែមេសានេះក្នុងរាជវាំងនៃទីក្រុងតូក្យូ។ អធិរាជ អាគីហ៊ីតុ ប្រកាសពីការដាក់រាជ្យរបស់ទ្រង់ទៅកាន់ព្រះក្នុងវិហារនៃរាជវាំង រួចបន្តជួបជាមួយនាយករដ្ឋមន្ត្រី ស៊ិនហ្សូ អាបេ និងមន្ត្រីផ្សេងទៀត។ កម្មវិធីសំខាន់ជាងគេនៃការដាក់រាជ្យ បានធ្វើឡើងនៅឯបន្ទប់ Matsu-no-Ma ដែលត្រូវបានចាត់ទុកជាបន្ទប់ល្អឯកប្រចាំរាជវាំង។ ពីបន្ទប់នេះ អធិរាជ អាគីហ៊ីតុ បានប្រកាសដាក់រាជ្យផ្លូវការតែម្ដង។

«ថ្ងៃនេះ ខ្ញុំដាក់រាជ្យហើយ»។ នេះជាបន្ទូលរបស់អធិរាជ អាគីហ៊ីតុ ថ្លែងជាចុងក្រោយក្នុងព្រះនាមជាអធិរាជ។ ទ្រង់មានបន្ទូលថា៖ ទ្រង់ចំណាយពេល៣០នៃរាជ្យរបស់ទ្រង់ដើម្បីបំពេញកាតព្វកិច្ចដោយក្ដីគោរព និងក្ដីស្រឡាញ់សម្រាប់ប្រជាជន ហើយនេះជាការប្រសិទ្ធពរដ៏អស្ចារ្យ។

នេះជាលើកដំបូងក្នុងរយៈពេលជាងពីររយឆ្នាំដែលអធិរាជជប៉ុនដាក់រាជ្យ នៅពេលដែលច្បាប់ប្រទេសមួយនេះកំណត់ឲ្យអធិរាជប្រថាប់លើបល្ល័ង្ក Chrysanthemum មួយព្រះជន្ម។ ព័ត៌មាននៃការដាក់រាជ្យ ត្រូវបានបញ្ចេញដោយអធិរាជ អាគីហ៊ីតុ ផ្ទាល់ក្នុងឆ្នាំ២០១៦ ដោយទ្រង់បានលើកហេតុផលនៃការចុះខ្សោយព្រះសុខភាព។ មានព្រះជន្ម៨៥វស្សា ប្រមុខរដ្ឋជប៉ុនអង្គនេះ ធ្លាប់ទទួលបានការព្យាបាលមហារីកក្រពេញប្រូស្តាត និងឆ្លងការវះកាត់ជំងឺបេះដូងផង។

អធិរាជ អាគីហ៊ីតុ បានផ្លាស់ប្ដូរមាត់រាជវង្ស និងប្រទេសជាតិពេញមួយរជ្ជកាលរបស់ទ្រង់។ ព្រះអង្គបានក្លាយជាអធិរាជទីមួយដែលមិនគោរពតាមប្រពៃណី ដោយរៀបអភិសេកជាមួយមហេសីដែលពុំមែនជាប់ខ្សែរាជវង្ស។ អធិរាជ និងអធិរាជនី បានជួយផ្សះផ្សារបួសផ្លូវចិត្តរបស់ជនរងគ្រោះដោយសារទង្វើទាហានចក្រពត្តិជប៉ុនកាលពីសង្គ្រាមលោកលើកទីពីរតាមរយៈការសុំទោសជាសាធារណៈផង និងទៅគោរពវិញ្ញាណក្ខន្ធដល់ប្រទេសដែលធ្លាប់ជប៉ុនគ្រប់គ្រងផង។

រាជបុត្ររបស់ទ្រង់ គឺរជ្ជទាយាទ ណារ៉ូហ៊ីតុ ដែលមានព្រះជន្ម៥៩វស្សា នឹងឡើងគ្រងបន្តជាអធិរាជទី១២៦ របស់ជប៉ុនក្នុងកម្មវិធីតាមប្រពៃណីមួយក្នុងទីក្រុងតូក្យូនៅថ្ងៃទី១ ខែឧសភា។ រជ្ជកាលថ្មី ត្រូវបានកំណត់ឈ្មោះរួចហើយ គឺ Reiwa ដែលមានន័យថា សុខដុម។ កម្មវិធីគ្រងរាជ្យផ្លូវការដែលចូលរួមភ្ញៀវអន្តរជាតិធំៗ នឹងធ្វើឡើងនៅថ្ងៃទី២២ ខែតុលាឯណោះ៕