អន្តរជាតិ
×![]()
ភាពយន្តចុងក្រោយរបស់ផលិតកម្មចក្រវាល Marvel មានចំណងជើងថា «Avengers: Endgame» ត្រូវអ្នកជំនាញក្នុងវិស័យភាពយន្តរំពឹងថា នឹងអាចរកចំណូលដល់ ៣ពាន់លានដុល្លារ ដោយការលក់សំបុត្រនៅទូទាំងសកលលោក។ 
សម្រាប់ចំណូលដែលរំពឹងទុកនេះ ភាពយន្តដែលដកស្រង់ចេញពីសៀវភៅថ្លក់រូបថ្លុកប្រភេទវីរៈបុរសនេះ មានឱកាសក្លាយភាពខ្សែភាពយន្តរកចំណូលបានច្រើនបំផុត ដោយផ្តួលតំណែងរបស់ ភាពយន្ត «Avatar»។ ភាពយន្ត «Avatar» ត្រូវបានដឹកនាំសម្តែងដោយលោក James Cameron ដែលអ្នកដឹកនាំរឿងដ៏ល្បីឈ្មោះ និងបានចាក់បញ្ចាំងកាលឆ្នាំ២០០៩។ អំឡុងការចាក់បញ្ចាំងភាពយន្តនេះ «Avatar» ដែលជាប្រភេទរឿងប្រឌិតបែបវិទ្យាសាស្ត្រ និងអភីនីហារ រកចំណូលបាន ២,៧៨ពាន់លានដុល្លារ។
យោងតាមការចុះផ្សាយរបស់ទូរទស្សន៍អាមេរិក CNBC អ្នកជំនាញនៅធនាគារអាមេរិក លោក Jessica Reif Ehrlich បញ្ជាក់ឲ្យដឹងនៅថ្ងៃចន្ទទី២៩ មេសា ថា៖«ខណៈមើលឃើញពីភាពជោគជ័យខ្លាំងនៅដើមសប្តាហ៍នៃការបើកបញ្ចាំងរឿង ជាមួយចំណូលដល់ទៅជាង១,២ពាន់លានដុល្លារ យើងជឿជាក់ថា ភាពយន្ត Avengers: Endgame អាចរកចំណូលបានពីចន្លោះពី២,៧ ទៅ ៣,៥ពាន់លានដុល្លារ ជាទូទាំងពិភពលោក»។
ជាធម្មតា ក្រោយចាក់បញ្ចាំងមួយសប្តាហ៍ដំបូងរួច ចំណូលភាពយន្ត នឹងធ្លាក់ប្រមាណ៥០ភាគរយ កាលណាឈានចូលដល់សប្តាហ៍ទីពីរហើយនោះ។ យ៉ាងណាមិញ ជាមួយសន្ទុះយ៉ាងខ្លាំងពីសំណាក់អ្នកទស្សនាចំពោះរឿង «Endgame» អ្នកជំនាញក្នុងឧស្សាហកម្មភាពយន្តជាច្រើន សម្លឹងឃើញថា ការថយចុះមានកម្រិតទាបជាងពេលមុនៗ។ នេះជាដំណឹងដ៏ល្អសម្រាប់ភាពយន្តចុងក្រោយបង្អស់របស់ចក្រវាល Marvel ក្នុងការសម្រេចដល់៣ពាន់លានដុល្លារ។ នេះបើតាមប្រភព CNBC ៕
Tag:
Marvel
Avengers: Endgame
BoxOffice
© រក្សាសិទ្ធិដោយ thmeythmey.com
