សម្តេច ហ៊ុន សែន និង អ្នកស្រី ស៊ូជី ជជែកគ្នាពីទំនាក់ទំនង វប្បធម៌ សាសនា អប់រំ និង សេដ្ឋកិច្ច

ជាតិ

នយោបាយជាតិ

សម្តេច ហ៊ុន សែន និង អ្នកស្រី ស៊ូជី ជជែកគ្នាពីទំនាក់ទំនង វប្បធម៌ សាសនា អប់រំ និង សេដ្ឋកិច្ច

30, Apr 2019 , 4:49 pm

រូបភាព

ដោយ: ថ្មីៗ

ប្រធានបទមួយចំនួន រួមមាន ទំនាក់ទំនង វប្បធម៌ សាសនា អប់រំ និង សេដ្ឋកិច្ច ត្រូវបានលើកឡើងនៅក្នុងជំនួបរវាងសម្តេច ហ៊ុន សែន ប្រមុខរដ្ឋាភិបាលកម្ពុជា និង អ្នកស្រី អ៊ុងសាន ស៊ូជី ទីប្រឹក្សារដ្ឋមីយ៉ាន់ម៉ា នៅព្រឹកថ្ងៃទី៣០ ខែមេសា ឆ្នាំ២០១៩នេះ។

អ្នកស្រី ស៊ូជី និយាយទៅកាន់សម្តេច ហ៊ុន សែន ថា នេះគឺជាលើកទី១ហើយ ដែលអ្នកស្រី បានមកបំពេញទស្សនកិច្ចនៅកម្ពុជា ហើយជាពិសេស គឺដើម្បីពង្រឹងទំនាក់ទំនងទ្វេភាគីរវាងកម្ពុជា-មីយ៉ាន់ម៉ា ឲ្យកាន់តែរីកចម្រើនខ្លាំងឡើង ហើយកាន់តែសកម្មឡើងថែមទៀត។ ក្នុងជំនួបនោះ អ្នកស្រី លើកឡើងពីកិច្ចសហប្រតិបត្តិការលើវិស័យវប្បធម៌ វិស័យសាសនា វិស័យអប់រំ និង វិស័យសេដ្ឋកិច្ច។

សម្តេចនាយករដ្ឋមន្ត្រី តបនឹងអ្នកស្រីថា ទាក់ទងនឹងបញ្ហាវប្បធម៌នៅឆ្នាំ២០២០ខាងមុខនេះ គឺជាខួប៦៥ឆ្នាំ នៃការបង្កើតទំនាក់ទំនងរវាងប្រទេសទាំងពីរ ដូច្នេះប្រទេសទាំងពីរ គប្បីរៀបចំសកម្មភាពឲ្យមានភាពអធិកអធម និងជំរុញវិស័យទេសចរណ៍ រវាងប្រទេសទាំងពីរ។

ពាក់ព័ន្ធនឹងសាសនា ប្រមុខរដ្ឋាភិបាលកម្ពុជា បានអរគុណមីយ៉ាន់ម៉ា ដែលអនុញ្ញាតឲ្យកម្ពុជាសាងសង់ព្រះវិហារនៅមីយ៉ាន់ម៉ា ហើយក៏បានអរគុណផងដែរ ដែលមីយ៉ាន់ម៉ា បានបណ្តុះបណ្តាលសមណសិស្សនិងសមណនិស្សិតខ្មែរ (ព្រះសង្ឃ) ឲ្យទទួលបានការអប់រំនៅទីនោះ រហូតមកដល់បច្ចុប្បន្ននេះ មានព្រះសង្ឃខ្មែរ៩៤អង្គហើយ ដែលបានបញ្ចប់ការសិក្សានៅមីយ៉ាន់ម៉ា ហើយនៅមាន៤អង្គទៀត ដែលកំពុងបន្តការសិក្សានៅទីនោះ។

ចំណែក វិស័យអប់រំ មេដឹកនាំកម្ពុជា បានស្នើឲ្យមីយ៉ាន់ម៉ា អនុវត្តកិច្ចព្រមព្រៀង ដែលបានចុះហត្ថលេខាជាមួយគ្នារួចមក និងស្នើឲ្យមានការផ្លាស់ប្ដូរទំនាក់ទំនងគ្នារវាងនិស្សិតខ្មែរ និងនិស្សិតមីយ៉ាន់ម៉ា។ ក្នុងឱកាសនេះ ប្រមុខរដ្ឋាភិបាលកម្ពុជា បានផ្តល់អាហារូបករណ៍១០ ដល់មីយ៉ាន់ម៉ា ដើម្បីឲ្យនិស្សិតមីយ៉ាន់ម៉ា មកសិក្សានៅកម្ពុជា សម្រាប់ឆ្នាំ២០១៩-២០២០។

រីឯ វិស័យសេដ្ឋកិច្ច សម្តេចនាយករដ្ឋមន្ត្រី បានស្នើឲ្យមានការត្រួតពិនិត្យលើបញ្ហាពន្ធត្រួតគ្នា និងវិស័យដទៃទៀត ដែលប្រទេសយើងទាំងពីរ មានសក្តានុពលជំរុញឲ្យមានការរីកចម្រើន ជាពិសេស បង្កើនទំហំពាណិជ្ជកម្ម ពី១០លានដុល្លារ ឲ្យបានច្រើនជាងមុន។

ទំព័រហ្វេសប៊ុករបស់សម្តេចនាយករដ្ឋមន្ត្រី បញ្ជាក់បែបនេះថា «រាល់កិច្ចការ ដែលបានលើកឡើងខាងលើនេះ អ្នកស្រី និង សម្តេច ហ៊ុន សែន បានឯកភាពគ្នា ជំរុញវិស័យសំខាន់ៗទាំងនេះ ហើយក៏បានផ្ដល់ការទុកចិត្ត និងឲ្យរដ្ឋមន្ត្រីពាក់ព័ន្ធនៃប្រទេសទាំងពីរ ធ្វើការងារនោះជាបន្តបន្ទាប់»។

ក្រៅពីជួបសម្តេច ហ៊ុន សែន អ្នកស្រី ត្រូវចូលជួបសម្តេច ហេង សំរិន ប្រធានរដ្ឋសភា និង សម្តេច សាយ ឈុំ ប្រធានព្រឹទ្ធសភា។ បន្ទាប់មក អ្នកស្រី នឹងទៅទស្សនាប្រាសាទនានានៅខេត្តសៀមរាប។ ទស្សនកិច្ចរបស់អ្នកស្រី នឹងត្រូវបញ្ចប់នៅថ្ងៃទី១ ខែឧសភា៕