ជាតិ
សង្គមជាតិ
របស់លេងដែលផ្ទុកគីមី PBDE ធ្វើឲ្យប៉ះពាល់ការអភិវឌ្ឍសរសៃប្រសាទ និងបញ្ញាកុមារ
×![]()
ភ្នំពេញ៖ សារធាតុគីមីពុល Poly Brominated Diphenyl Ethers (PBDE) ត្រូវបានអ្នកជំនាញសុខភាព-បរិស្ថាន រកឃើញនៅក្នុងសម្ភារក្មេងលេង និងសមា្ភរប្រើប្រាស់ដែលធ្វើពីបា្លស្ទិកឡើងវិញនៅកម្ពុជា។ សារធាតុនេះ បានបញ្ជេញពីសម្ភារប្រើប្រាស់ទាំងនេះជាលក្ខណៈធូលីទៅក្នុងផ្ទះដែលបណ្តាលឲ្យប៉ះពាល់ដល់សុខភាពមនុស្ស ពិសេសកុមារ។ យោងតាមសេចក្តីប្រកាសព័ត៌មានរបស់អង្គការសេដាក កាលពីថ្ងៃទី២៩មេសា PBDEs ជាសារធាតុពុលដែល រំខានដល់ប្រព័ន្ធអ័រម៉ូនមនុស្ស ដែលធ្វើឱ្យប៉ះពាល់យ៉ាងធ្ងន់ធ្ងរដល់ការអភិវឌ្ឍប្រព័ន្ធសរសៃប្រសាទ និងបញ្ញារបស់កុមារ។
ដើមឆ្នាំ២០១៩ អង្គការសេដាក បានសហការជាមួយអង្គការសុខភាពបរិស្ថានសាកល(IPEN) បានយកសម្ភារប្រើប្រាស់មួយចំនួនមកធ្វើតេស្តដោយរកឃើញសារធាតុ PBDEs នៅក្នុងសម្ភារប្លាស្ទិកដែលកែច្នៃឡើងវិញ។ សម្ភារទាំងនេះមាន សម្ភារតុបតែខ្លួន និង សម្ភារការិយាល័យជាដើម។
ការរកឃើញថ្មីនេះ បានអះអាងបន្ថែមទៅលើលទ្ធផលនៃការវិភាគកាលឆ្នាំ២០១៨ ទៅលើសំណាកផលិតផលដែលបានជ្រើសរើសក្នុងប្រទេសចំនួន១៩ នៅអឺរ៉ុប។ ក្នុងនោះមាន «មួយភាគបួននៃសម្ភារ» មានសារធាតុ PBDEs និង Brominated Flame Retardants ដែលជាលទ្ធផលនៃកែច្នៃឡើងវិញ។ កង្វះខាតកែច្នៃឡើងវិញ ធ្វើឱ្យអ្នកតស៊ូមតិផ្នែកសុខភាពបរិស្ថាន ស្នើឱ្យបញ្ចប់ករណីលើកលែងកែច្នៃឡើងវិញដោយប្រើសារធាតុពុលក្នុងការផលិត ដែលរដ្ឋាភិបាលនានាក្នុងពិភពលោកហាមឃាត់ ព្រោះវាបំផ្លាញដល់សុខភាពមនុស្ស និងបរិស្ថាន។
អ្នកស្រី តុង ចាន់ធាង នាយិកាអង្គការសេដាក បាននិយាយថា «យើងព្រួយបារម្ភពីសុខភាពសាធារណៈ ជាពិសេសផលប៉ះពាល់អាក្រក់លើកុមារ។ ហើយសូមអំពាវនាវដល់រាជរដ្ឋាភិបាលកម្ពុជា ដកចេញ «ការលើកលើងពិសេសការកែច្នៃឡើងវិញ» ចំពោះសារធាតុ HexaBDE and HeptaBDE»។
កម្ពុជា ជាប្រទេសមួយក្នុងចំណោមប្រទេសជាច្រើន ដែលបានចុះបញ្ជី «ករណីលើកលែងពិសេស» ចំពោះសារធាតុពុល PBDEs បន្ទាប់ពីសារធាតុនេះត្រូវបានហាមឃាត់ដោយអនុសញ្ញា «ស្តុកខុម» ក្នុងឆ្នាំ២០០៤។ ករណីពិសេសនេះ បានអនុញ្ញាតឱ្យអ្នកកែច្នៃផលិតផលប្លាស្ទិកបានដាក់បញ្ជូលវត្ថុធាតុដើម ដូចជាបា្លស្ទិកពីសំណល់គ្រឿងកំព្យូទ័រ និងផលិតផលផ្សេងទៀតដែលមនផ្ទុកសារធាតុ PBDEs នៅក្នុងដំណើរការកែច្នៃជាង១០ឆ្នាំមកហើយ។ ការអនុវត្តបែបនេះ នឹងបន្តដល់ឆ្នាំ២០៣០។
ជាមួយគ្នានេះ អង្គការសុខភាពបរិស្ថានបានជំរុញឱ្យរដ្ឋាភិបាលប្រទេសទាំងនោះ បញ្ចប់ការអនុវត្ត និងដក «ករណីលើកលែងពិសេសលើការកែច្នៃឡើងវិញ» ព្រោះតែការអនុវត្តនេះបានបន្សល់កាកសំណល់ពីដំណើរការកែច្នៃឡើងវិញនូវសារធាតុគីមី ដែលត្រូវហាមឃាត់ជាសាកល ដែលបង្កការគំរាគកំហែងដល់សុខភាពសាធារណៈ។
អ្នកស្រី Jitka Strakova អ្នកស្រាវជ្រាវរបស់អង្គការ Arnikaនិង IPEN និងជាអ្នកជំនាញខាងសារធាតុពុលសរីរាង្គ ដែលមិនងាយបំបែកធាតុ (Persistent Organic Pollutants_ POPs) បាននិយាយដូច្នេះ៖« ផលវិបាកសំខាន់នៃករណីលើកលែងការកែច្នៃឡើងវិញ គឺបញ្ហាកាកសំណល់សារធាតុពុលដែលមានផ្ទុកនៅក្នុងសម្ភារៈប្រើប្រាស់ធ្វើពីបា្លស្ទិក ឬអេប៉ុង។ អ្នកប្រើប្រាស់គួរតែមានលទ្ធភាពទិញផលិតផលធ្វើពីវត្ថុធាតុដើមកែច្នៃឡើងវិញដោយមិនចាំបាច់ព្រួយបារម្ភឡើយ ថាវាមានផ្ទុកសារធាតុពុលដែលត្រូវបានហាតឃាត់ទូទាំងពិភពលោកទេ។ ការកែច្នៃឡើងវិញគួរតែគាំទ្រដល់សុខភាព បរិស្ថាន មិនមែនធ្វើឱ្យខូចខាតដល់សុខភាព និងបរិស្ថានវិញនោះទេ»៕
Tag:
បរិសា្ថន
សុខភាព
ប្លាស្ទិក
គីមី
© រក្សាសិទ្ធិដោយ thmeythmey.com
