កីឡាអន្តរជាតិ
អន្តរជាតិ
Pochettino ថាប្រើយុទ្ធសាស្ត្រខុសទើបចាញ់ Ajax តែជឿលើ Son នឹងជួយ Spurs ទៅវគ្គផ្តាច់ព្រ័ត្រ
× លោក Mauricio Pochettino សារភាពថាលោកបានប្រើយុទ្ធសាស្ត្រខុសទើបធ្វើឲ្យ Tottenham Hotspur បរាជ័យក្រោមថ្វីជើង Ajax ក្នុងដីខ្លួនឯងដោយលទ្ធផល ១-០ ក្នុងក្របខណ្ឌ Champions League វគ្គពាក់កណ្តាលផ្តាច់ព្រ័ត្រ។ Pochettino នៅតែជឿជាក់ថា Son Heung-min នឹងជួយ Spurs ទៅកាន់វគ្គផ្តាច់ព្រ័ត្របាន។
ក្រុមរបស់លោក Pochettino បានចាប់ផ្តើមការប្រកួតជើងទី១ នៅកីឡដ្ឋាន Tottenham Hotspur ដោយទទួលបានត្រឹមការខកចិត្តបន្ទាប់ពីខ្សែបម្រើ Donny van de Beek រកគ្រាប់បាល់ជ័យជម្នះសម្រាប់ Ajax នៅត្រឹម១៥នាទីដំបូងនៃវគ្គទី១។
ក្រុមពីហូឡង់ដែលដឹកនាំដោយលោក Erik Ten Hag បានគ្រប់គ្រងការប្រកួតទាំងមូលនៅតង់ទី១ រហូតដល់លោក Pochettino សម្រេចផ្លាស់ប្តូរប្រព័ន្ធលេងវិញដោយផ្លាស់ពី ៣-៥-២ ទៅប្រព័ន្ធ ៤-៤-២។ ការប្តូរទម្រង់លេងនេះ ធ្វើឡើងក្រោយខ្សែការពារ Jan Vertonghen មានរបួសហើយត្រូវជំនួស Moussa Sissoko និងទម្លាក់ខ្សែការពារស្លាបពីររូប Kieran Trippier និង Danny Rose ទៅខាងក្រោមវិញ។
Pochettino ពិតជាទទួលស្គាល់កំហុសរបស់ខ្លួនសម្រាប់ប្រព័ន្ធលេងទល់នឹង Ajax ខណៈដែលអ្នកចាត់ការ Spurs រូបនេះក៏មិនពេញចិត្តនឹងទម្រង់លេងបែបស្ពឹកស្រពន់របស់កីឡាករលោកផងដែរ។
អ្នកចាត់ការសញ្ជាតិអាហ្សង់ទីនដែលនាំក្រុមមាន់ខ្នាយមាសឈានដល់វគ្គពាក់កណ្តាលផ្តាច់ព្រ័ត្រក្របខណ្ឌកំពូលអឺរ៉ុបលើកដំបូងក្នុងរយៈពេល៥៧ឆ្នាំ ប្រាប់ BT Sport ថា ៖«សម្រាប់ការប្រកួតនេះពិតណាស់ខ្ញុំទទួលស្គាល់ថាយើងពិតបានប្រើយុទ្ធសាស្ត្រខុស ក៏ប៉ុន្តែយើងមិនមានជម្រើសច្រើននោះទេ។ ខ្ញុំមិនសប្បាយចិត្តទេ ដែលកីឡាកររបស់យើងមើលទៅដូចជាមិនមានកំលាំងពេញលេញ និងធ្វេសប្រហែសដែលនាំឲ្យការប្រកួតរបស់យើងលំបាក។ តែក្នុងនាមជាអ្នកចាត់ការខ្ញុំជាអ្នកទទួលខុសត្រូវបរាជ័យទាំងអស់»។
ក្នុងជំនួបជើងទី១នេះ Spurs មិនមានវត្តមានខ្សែប្រយុទ្ធឆ្នើមពីររូប Harry Kane (របួស) និង Son Heung-min (ពិន័យ)ឡើយ។ ប៉ុន្តែសម្រាប់ជំនួបជើងទី២ នៅទឹកដី Ajax ខណៈដែល Son អាចចូលលេងវិញបាននោះ លោក Pochettino សង្ឃឹមថាខ្សែប្រយុទ្ធកូរ៉េខាងត្បូងរូបនេះនឹងជួយក្រុមបន្តទៅកាន់វគ្គផ្តាច់ព្រ័ត្រមិនខាន៕
Tag:
បាល់ទាត់
UEFA Champions League
Mauricio Pochettino
© រក្សាសិទ្ធិដោយ thmeythmey.com