អន្តរជាតិ
ព្រះខ័នរាជ្យប្រើក្នុងពិធីរាជាភិសេកមហាក្សត្រថៃ ត្រូវបាននាំយកពីកម្ពុជា
ព្រះសែងខ័នជ័យស្រីដែលប្រើក្នុងពិធីរាជាភិសេកមហាក្សត្រថៃ។ រូបភាព The Nation
×![]()
ដោយ: តន ចាន់រិទ្ធារ៉ា
ប្រទេសថៃ នឹងរៀបចំពិធីរាជាភិសេករបស់ព្រះមហាក្សត្រ មហា វជិរាលង្ករណ៍ ចាប់ពីថ្ងៃទី០៤ ដល់ថ្ងៃទី០៦ ខែ ឧសភានេះ។ អំឡុងពិធីដ៏អធិកអធមនេះ ក្សត្រាអង្គទី១០ នៃរាជវង្សចក្រី នឹងត្រូវថ្វាយគ្រឿងកេតនភណ្ឌសំខាន់ៗចំនួន២៨មុខ ដើម្បីពេញយសជាមហាក្សត្រ។ ក្នុងចំណោមគ្រឿងសម្គាល់សញ្ញាជាព្រះរាជានេះ គ្រឿងបញ្ចកកុធភណ្ឌ ជាវត្ថុសំខាន់ជាងគេ។ ព្រះខ័នរាជ្យដែលជាគ្រឿងបញ្ចកកុធភណ្ឌមួយដែរ ត្រូវបាននាំយកពីកម្ពុជា។ 
គ្រឿងបញ្ចកកុធភណ្ឌដែលជាវត្ថុតំណាងឲ្យចេស្ដាស្ដេចថៃ មានដូចជា ព្រះមហាពិជ័យម្កុដ, ព្រះសែងខ័នជ័យស្រី, ព្រះទណ្ឌៈ (ដំបង), វាលវីជនី (ផ្លិត) និងព្រះសុពណ៌បាទ។ គ្រឿងទាំងនេះ ជាវត្ថុចាំបាច់បំផុតសម្រាប់ក្សត្រគ្រងរាជ្យដែលថ្វាយពីសំណាក់មហាព្រាហ្មណ៍រាជគ្រូប្រចាំព្រះបរមរាជវាំងដើម្បីគ្រងរាជសម្បត្តិពេញបរិបូណ៌ជាមហាក្សត្ររបស់ថៃ។
អ្វីគួរឲ្យចាប់អារម្មណ៍នោះ គឺព្រះសែងខ័នជ័យស្រី។ គ្រឿងសាស្ត្រាវុធនេះ ត្រូវបាននាំយកពីកម្ពុជា។ នេះបើតាមការផ្សាយរបស់វេបសាយកាសែតបាងកកប៉ុស្តិ៍ត្រង់មាតិកាពិសេសស្ដីពីពិធីរាជាភិសេកមហាក្សត្រ មហា វជិរាលង្ករណ៍ ។ ព្រះខ័នរាជ្យនេះ តំណាងឲ្យតួនាទីរបស់មហាក្សត្រជាអ្នកការពារប្រទេស និងជាសេចក្ដីក្លាហាន និងអំណាចកំពូលជាក្សត្រ។
ប្រភពព័ត៌មានខាងលើបន្តថា ព្រះខ័នរាជ្យមុខពីរនេះ ត្រូវបានរកឃើញក្នុងបឹងទន្លេសាបដោយអ្នកនេសាទ ដែលក្រោយមកក៏យកឲ្យចៅហ្វាយខេត្តបាត់ដំបង ចៅហ៊្វា បែន ។ បន្ទាប់មក មន្ត្រីសៀមក៏យកអាវុធនេះថ្វាយស្ដេចរាមាទី១ តែម្ដង។ មហាក្សត្រថៃអង្គនេះ ក៏បញ្ជាឲ្យកសាងដង និងស្រោមពីមាស និងត្បូងសម្រាប់ព្រះខ័នរាជ្យនេះ ដែលត្រូវបានប្រើប្រាស់ក្នុងពិធីរាជាភិសេកមហាក្សត្រថៃនាសម័យក្រោយៗមកទៀត។
ទាំងដង ទាំងផ្លែមានប្រវែង៨៩,៨សង់ទីម៉ែត្រ និងមានទម្ងន់១,៣គីឡូក្រាម។ នៅពេលដាក់ក្នុងស្រោម អាវុធក្សត្រមួយនេះមានប្រវែង១០១សង់ទីម៉ែត្រ និងមានទម្ងន់១,៩គីឡូក្រាម៕
Tag:
ថៃ
មហា វជិរាលង្ករណ៍
© រក្សាសិទ្ធិដោយ thmeythmey.com
