កាឡៃបទចម្រៀង៖ ក្រសួងវប្បធម៌នឹងចាត់វិធានការផ្លូវច្បាប់ បើផលិតកម្មសាន់ដេមិនចូលខ្លួនដោះស្រាយ

ជាតិ

សិល្បះ

កាឡៃបទចម្រៀង៖ ក្រសួងវប្បធម៌នឹងចាត់វិធានការផ្លូវច្បាប់ បើផលិតកម្មសាន់ដេមិនចូលខ្លួនដោះស្រាយ

02, May 2019 , 8:19 pm

រូបភាព

រូបពីហ្វេសប៊ុក លោក ស៊ឹម សត្តា រូបកណ្ដាល

ដោយ: ប៉ូ សាគុន

ភ្នំពេញ៖ គិតត្រឹមថ្ងៃទី២ឧសភានេះ គឺជាង១០ថ្ងៃហើយ ដែលផលិតកម្មសាន់ដេ មិនព្រមចូលខ្លួនដោះស្រាយជាមួយខាងក្រសួងវប្បធម៌និងវិចិត្រសិល្បៈ តាមការសន្យា ជុំវិញករណីកាឡៃបទចម្រៀង ដោយគ្មានការអនុញ្ញាត។ ក្រសួងវប្បធម៌ ព្រមានចាត់វិធានការផ្លូវច្បាប់ បើផលិតកម្មសាន់ដេ នៅមិនព្រមចូលខ្លួនដោះស្រាយ។

លោក ស៊ឹម សត្តា ប្រធាននាយកដ្ឋានសិទ្ធិអ្នកនិពន្ធនិងសិទ្ធិប្រហាក់ប្រហែល បាននិយាយថា ក្រសួងបានពន្យាពេលឲ្យក្រុមហ៊ុនសាន់ដេ យូរថ្ងៃហើយ ក្នុងការដោះស្រាយបញ្ហាចម្រូងចម្រាសនៃការផលិតបទចម្រៀងរបស់ផលិតកម្មមួយនេះ។ ប៉ុន្តែផលិតកម្មសាន់ដេ បែជាបង្ហាញការមិនឱ្យតម្លៃក្រសួងវប្បធម៌ទៅវិញ តាមរយៈការមិនចូលទៅដោះស្រាយតាមពាក្យសន្យា។ ត្រង់ចំណុចនេះ លោក ស៊ឹម សត្តា បានបន្ថែមថា បើសាន់ដេនៅតែមិនព្រមមកប្រជុំជាមួយក្រសួងនៅក្នុងអំឡុងសប្ដាហ៍នេះ នាយកដ្ឋានរបស់លោក និងធ្វើរបាយការណ៍ទៅថ្នាក់ដឹកនាំក្រសួង ដើម្បីចាត់ការទៅតាមផ្លូវច្បាប់ លើករណីកាឡៃបទចម្រៀងយកទៅធ្វើអាជីវកម្មដោយមិនមានច្បាប់អនុញ្ញាតនេះ។

ប្រធាននាយកដ្ឋានសិទ្ធិអ្នកនិពន្ធនិងសិទ្ធិប្រហាក់ប្រហែលរូបនេះ បានប្រាប់សារព័ត៌មានថ្មីៗ ដូច្នេះថា ៖«បើសិនជាសាន់ដេមិនចូលរួមសហការជាមួយក្រសួងទេ យើងនឹងចាត់វិធានការទៅតាមផ្លូវច្បាប់ហើយ។ យើងទាក់ទងទៅគាត់ គាត់ថាមិនមានពេល ថាបែបនេះ បែបនោះ នេះជាការងារមួយដែលសាន់ដេកំពុងតែមិនឱ្យតម្លៃស្ថាប័នរដ្ឋ។ យើងនៅទុកឱកាសឱ្យសាន់ដេទេ យើងនឹងព្យាយាមទាក់ទងទៅគាត់ទៀត បើក្នុងសប្ដាហ៍នេះគាត់នៅតែមិនមកទៀត ពួកយើងនឹងធ្វើរបាយការណ៍ដាក់ទៅក្រសួង ដើម្បីសម្រេចចាត់ការទៅតាមផ្លូវច្បាប់»។

លោក ស៊ឹម សត្តា មិនទាន់អាចបញ្ជាក់ពីវិធានការក្រសួងថា តើនឹងប្ដឹងទៅតុលាការ ឬយ៉ាងណា ? ក្នុងករណីផលិតកម្មសាន់ដេ មិនព្រមបង្ហាញខ្លួននេះ ពោលគឺត្រូវរង់ចាំការប្រជុំសម្រេចពីថ្នាក់ដឹកនាំក្រសួងវប្បធម៌ និងវិចិត្រសិល្បៈ។

អត្ថបទទាក់ទង

សាន់ដេព្រមទទួលស្គាល់កំហុសខ្លួន តែភរិយាលោក គង្គ ប៊ុនឈឿន ចង់ឲ្យសាន់ដេ សងជំងឺចិត្តសមរម្យ

ក្រសួងវប្បធម៌នឹងប្រគល់សិទ្ធិគ្រប់គ្រងបទ«ថ្ងៃដែលអូនចុកឈាម»ដល់ភរិយាកវី គង្គ ប៊ុនឈឿន

ក្រសួងវប្បធម៌ ហៅផលិតកម្មសាន់ដេទៅអប់រំ នៅថ្ងៃ៨មេសា

លោក សុឹម សត្តា៖ ម្ចាស់ផលិតកម្មខ្លះ មិនឲ្យតម្លៃសិក្ខាសាលាស្ដីពីកម្មសិទ្ធិបញ្ញា ទើបខ្វះការយល់ដឹងពីការនិពន្ធ

កាលពីថ្ងៃទី៨ខែមេសាឆ្នាំ២០១៩ ក្រសួងវប្បធម៌និងវិចិត្រសិល្បៈ បានចេញលិខិតកោះហៅផលិតកម្មសាន់ដេ មកអប់រំណែនាំករណីផលិតបទចម្រៀងដែលមិនមានការអនុញ្ញាត។ តែនៅថ្ងៃទី៨កន្លងទៅនោះ ចាងហ្វាងផលិតកម្មសាន់ដេមិនបានទៅដោយខ្លួនឯងឡើយ បានត្រឹមឱ្យតំណាងដែលមិនមានសិទ្ធិសម្រេចអ្វីបាន ទៅជួបក្រសួងតែប៉ុណ្ណោះ។ ក្នុងការជួបពិភាក្សាគ្នានេះ ខាងតំណាងសាន់ដេបានទទួលស្គាល់កំហុសខ្លួន ប៉ុន្តែមិនទាន់មានការសម្រេចអ្វីជាផ្លូវការទេ ដោយរង់ចាំជំនួបចុងក្រោយរវាងម្ចាស់ផលិតកម្ម និងភាគីក្រសួងផ្ទាល់តែម្ដង។

ហើយមកដល់ពេលនេះ ម្ចាស់ផលិតកម្មសាន់ដេ នៅតែមិនទាន់ជួបភាគីខាងក្រសួងដដែល បើទោះក្រសួងសាមីបានហៅទូរសព្ទទៅភាគីសាន់ដេចំនួន៣ដងរួចមកហើយ ដើម្បីបញ្ជាក់ពេលវេលាប្រជុំ ។តែសាន់ដេបានត្រឹមឆ្លើយថា ជាប់រវល់មិនមានពេលមកជួប។ នេះបើតាមការបញ្ជាក់របស់លោក ស៊ឹម សត្តា ប្រធាននាយកដ្ឋានសិទ្ធិអ្នកនិពន្ធនិងសិទ្ធិប្រហាក់ប្រហែល។

សូមបញ្ជាក់ផងដែរថា ក្រសួងបានរកឃើញចម្រៀង៤បទដែលសាន់ដេយកទៅធ្វើអាជីវកម្មដោយមិនបានសុំច្បាប់អនុញ្ញាត និងកែទំនុកច្រៀងដែលធ្វើឱ្យប៉ះពាល់ធ្ងន់ធ្ងរដល់កេរ្តិ៍ឈ្មោះអ្នកនិពន្ធ។ បទទាំង៤នោះមានបទ “ថ្ងៃដែលអូនចុកឈាម” យកទៅកាឡៃជាបទ "អូនជាអ្នកមាន សមនឹងអ្នកមានដូចគ្នា" ។ បទ “ស្រឡាញ់គ្នាដល់ចាស់កាន់ឈើច្រត់" កាឡៃពីបទ "ចិត្តប្រឹងស្រឡាញ់”។ បទ”នរក១៨ជាន់” កាឡៃពីបទ “ស្ដាយចិត្តដែលខំរក្សា” និងបទ” ជើងមេឃពណ៌ខ្មៅ” កាឡៃពីបទ “ជើងមេឃពណ៌ខ្មៅ” ដោយបទនេះកែទំនុកច្រៀងខ្លះ។ បទទាំងនេះសុទ្ធសឹងស្ថិតនៅក្រោមការគ្រប់គ្រងរបស់ក្រសួងវប្បធម៌និងវិចិត្រសិល្បៈ៕