អន្តរជាតិ
រដ្ឋមន្ត្រីការបរទេសអាមេរិកថា អាមេរិកប្រុងប្រៀបអន្តរាគមន៍ខាងយោធានៅវ៉េណេស៊ុយអេឡា
×![]()
ដោយ: VOA
រដ្ឋមន្ត្រីការបរទេសសហរដ្ឋអាមេរិកលោក Mike Pompeo និយាយថា សហរដ្ឋអាមេរិក ប្រុងប្រៀបធ្វើអន្តរាគមន៍ខាងយោធាដើម្បីទប់ស្កាត់ភាពចលាចលដែលបន្តមានឡើងក្នុងប្រទេសវ៉េណេស៊ុយអេឡា។
អ្នកការទូតកំពូលអាមេរិករូបនោះបានប្រាប់បណ្តាញទូរទស្សន៍ Fox Bussiness Network ថា «ចំណាត់ការខាងយោធា អាចកើតមាន ប្រសិនបើនេះជាអ្វីដែលត្រូវតម្រូវ។ នេះជាអ្វីដែលសហរដ្ឋអាមេរិកនឹងធ្វើនោះ»។
ទោះយ៉ាងណាក៏ដោយ រដ្ឋមន្ត្រីការបរទេសអាមេរិកលោក Pompeo បាននិយាយម្តងហើយម្តងទៀតថា សហរដ្ឋអាមេរិក ចង់បានអន្តរកាលនៃការផ្ទេរអំណាចដោយសន្តិវិធីក្នុងរដ្ឋធានីការ៉ាកាសពីប្រធានាធិបតីសង្គមនិយមលោក Nicolas Maduro ទៅលោក Juan Guaido ប្រធានាធិបតីអន្តរកាលដែលប្រកាសខ្លួនឯងដែលត្រូវបានទទួលស្គាល់ដោយសហរដ្ឋអាមេរិកនិងប្រទេសប្រហែល៥០ផ្សេងទៀតជា មេដឹកនាំស្របច្បាប់របស់ប្រទេសនៅតំបន់អាមេរិកខាងត្បូងនេះ។
ការផ្តល់សញ្ញារបស់លោករដ្ឋមន្ត្រីការបរទេសអាមេរិក Pompeo ថា សហរដ្ឋអាមេរិក អាចបញ្ជូនកងទ័ពទៅកាន់ប្រទេសវ៉េណេស៊ុយអេឡានោះ បានធ្វើឲ្យមានការស្តីបន្ទោសភ្លាមៗមកពីប្រទេសរុស្ស៊ីដែលជាអ្នកគាំទ្រប្រធានាធិបតី Maduro យ៉ាងខ្លាំងនោះ។
រដ្ឋាភិបាលក្រុងម៉ូស្គូនិយាយថា លោករដ្ឋមន្ត្រីការបរទេសរុស្ស៊ី Sergei Lavrov បានព្រមានលោកPompeo នៅក្នុងការនិយាយតាមទូរសព្ទថា វិធានការគឃ្លើនដោយសហរដ្ឋអាមេរិកក្នុងប្រទេសវ៉េណេស៊ុយអេឡា អាចធ្វើឲ្យមានផលវិបាកយ៉ាងធ្ងន់ធ្ងបំផុត។ អ្នកការទូតរុស្ស៊ីរូបនេះបានរិះគន់អ្វីដែលលោកបាននិយាយថា ជាការជ្រៀតជ្រែករបស់សហរដ្ឋអាមេរិកក្នុងកិច្ចការផ្ទៃក្នុងរបស់វ៉េណេស៊ុយអេឡា ដោយលោកបានហៅថា ជាការរំលោភយ៉ាងធ្ងន់ធ្ងរដល់ច្បាប់អន្តរជាតិ៕
© រក្សាសិទ្ធិដោយ thmeythmey.com
