សេរីភាពសារព័ត៌មាន៖ ន័រវេសលេខ១ កម្ពុជាលេខ១៤៣ រីឯតួកមេនីស្ថានយ៉ាប់ជាងគេ

អន្តរជាតិ

សេរីភាពសារព័ត៌មាន៖ ន័រវេសលេខ១ កម្ពុជាលេខ១៤៣ រីឯតួកមេនីស្ថានយ៉ាប់ជាងគេ

03, May 2019 , 7:59 am

រូបភាព

ដោយ: ធីតា

របាយការណ៍ World Press Freedom Index របស់អង្គការអ្នកកាសែតគ្មានព្រំដែន (Reporters Without Borders) ដែលចេញផ្សាយកាលពីពេលថ្មីៗកន្លងមកនេះ បានបង្ហាញថា កម្ពុជាស្ថិតនៅចំណាត់ថ្នាក់លេខ១៤៣ក្នុងចំណោម១៨០ប្រទេស។ ន័រវេសស្ថិតនៅលើកំពូលតារាងដែលប្រសើរដាច់គ្នា ខណៈតួកមេនីស្ថាន ជាកន្លែងដែលគ្រោះថ្នាក់ខ្លាំងជាងគេសម្រាប់សេរីភាពសារព័ត៌មាន។

នៅតំបន់អាស៊ីប៉ាស៊ីហ្វិក ដែលមាន៣៤ប្រទេស ចំនួនអ្នកកាសែត ជាពិសេស Bloggers ទទួលរងគំនាមច្រើនជាងគេ ពោលគឺនៅចិន វៀតណាម អាហ្វហ្គានីស្ថាន ប៉ាគីស្ថាន ហ្វីលីពីន និងបង់ក្លាដែស។ ស្ថានភាពនៅក្នុងតំបន់នេះ កំពុងធ្លាក់កម្រិតខ្មៅ ដែលមានន័យថាគ្រោះថ្នាក់បំផុត ដូចជាកូរ៉េខាងជើង និងឡាវ ជាដើម។

ន័រវេសជាប្រទេសដែលមានសេរីភាពសារព័ត៌មានល្អប្រសើរជាងគេ ហើយប្រទេសផ្សេងទៀតដែលស្ថិតក្នុងចំណោម Top 15 រួមមាន ហ្វាំងឡង់, ស៊ុយអែត, ហូឡង់, ដាណឺម៉ាក, ស្វីស, នូវែលសេឡង់, ហ្សាម៉ាអ៊ីក, បែលហ្ស៊ិក, កូស្តារីកា, អេស្តូនី, ព័រទុយហ្គាល់, អាល្លឺម៉ង់, អ៊ីស្លង់ និងអៀរឡង់។

ផ្ទុយទៅវិញ ប្រទេសចំនួន១៨ ជាប្រទេសដែលមានគ្រោះថ្នាក់ខ្លាំងបំផុតចំពោះសេរីភាពសារព័ត៌មាន ដែលក្នុងនោះមាន តួកមេនីស្ថាន កូរ៉េខាងជើង អេរីត្រេ ចិន វៀតណាម ស៊ូដង់ ស៊ីរី ឌីជីប៊ូទី អារ៉ាប៊ីសាអូឌីត ឡាវ អ៊ីរ៉ង់ គុយបា យេម៉ែន បារ៉ែន អាស៊ែរបៃហ្សង់ ហ្គីណេអេក្វាទ័រ សូម៉ាលី អេហ្ស៊ីប និងលីប៊ី។

ដោយឡែកកម្ពុជា ស្ថិតនៅចំណាត់ថ្នាក់លេខ១៤៣។ បើប្រៀបធៀបទៅនឹងបណ្តាសមាជិកអាស៊ាន កម្ពុជា ស្ថិតនៅបន្ទាប់ពី ម៉ាឡេស៊ី (១២៣), ឥណ្ឌូណេស៊ី (១២៤), ហ្វីលីពីន (១៣៤), ថៃ (១៣៦), មីយ៉ាន់ម៉ា (១៣៨) ប៉ុន្តែនៅពីលើ សិង្ហបុរី (១៥១), ព្រុយណេ (១៥២), ឡាវ (១៧១), វៀតណាម (១៧៦)៕