ជាតិ
ក្រសួងសុខាភិបាល ចាត់ទុកឆ្មបគឺជាអ្នកការពារសិទ្ធិស្រី្ត រូបភាពពីសកលវិទ្យាល័យអង្គរ
× ភ្នំពេញ៖ «ឆ្មបគឺជាអ្នកការពារសិទ្ធិស្ត្រី»។ នេះជាការប្រធានបទ ដែលក្រសួងសុខាភិបាល បានប្រារព្ធអបអរសាទរទិវាឆ្មបជាតិ ក្នុងថ្ងៃទី២ឧសភា ឆ្នាំ២០១៩។
ក្រសួងសុខាភិបាល បានជ្រើសរើសយកប្រធានបទនេះ ដើម្បីបញ្ជាក់អំពីតួនាទីសំខាន់របស់ឆ្មបក្នុងការធានាឲ្យស្រី្ត និងទារកទើបនឹងកើត អាចមានមាតុភាព និងសម្រាលកូនដោយសុខសុវត្តិភាព។ ក្រសួងសុខាភិបាល បានបញ្ជាក់ដូច្នេះថា៖«គោលបំណងសំខាន់ក្នុងទិវាឆ្មបឆ្នាំនេះ គឺបង្ហាញពីតួនាទីដ៏សំខាន់របស់ឆ្មប ដែលធ្វើឲ្យសិទ្ធិស្ត្រីប្រសើរឡើងក្នុងថែទាំសុភាព។ ផ្ដល់ចំណេះដឹងពីការទទួលខុសត្រូវរបស់ឆ្មបក្នុងនាមជាអ្នកការពារសិទ្ធិស្រី្ត។ ការលើកម្ពស់ភាពស្មើគ្នានៃសិទ្ធិ និងឱកាសសម្រាប់ឆ្មបគ្រប់រូប និងការចែករំលែកចំណេះដឹងគ្នា»។
ឆ្លងទន្លេ គឺជាឃ្លាដែលប្រជាជនខ្មែរប្រើ ដើម្បីពណ៌នាការផ្ដល់កំណើតដល់ទារក ដែលឆ្លុះបញ្ចាំងពីការប្រឈមនឹងហានិភ័យជាច្រើននៅពេលផ្ដល់កំណើត។ សិទ្ធិរស់រានមានជីវិត គឺជាសិទ្ធិមនុស្ស។ ឆ្មបជា អ្នកធានាឲ្យស្រី្ត និងទារកមានសុវត្តិភាព។ នេះជាការលើកឡើងរបស់ក្រសួងសុខាភិបាល ដែលចាត់ទុកថា ឆ្មបគឺជាអ្នកការពារសិទ្ធិស្ត្រី។ ក្រសួងសុខាភិបាលបានបញ្ជាក់បន្ថែមថា ឆ្មបក៏ដើរតួសំខាន់ក្នុងការធានាថាកុមារអាចមានសុខភាពល្អពេញមួយជីវីតផងដែរ។
«ឆ្មបជាអ្នកថែទាំប្រកបដោយគុណភាព ដោយមិនគិតពីអត្តសញ្ញាណរបស់អ្នកជំងឺ ឬឋានៈសង្គម។ ឆ្មបបានកាត់បន្ថយអត្រាមរណៈមាតា និងទារកនៅកម្ពុជា ហើយសម្រេចបាននូវគោលដៅអភិវឌ្ឍន៍សហសវត្សរ៍ទី៤និងទី៥»។នេះជាការបញ្ជាក់របស់ក្រសួងសុខាភិបាល។
សម្ដេច ហ៊ុន សែន នាយករដ្ឋមន្ត្រី ក្នុងឆ្នាំ២០០៨ បានកំណត់ថ្ងៃទី៥ឧសភា ជាទិវាឆ្មបជាតិ ដើម្បីបង្ហាញពីការដឹងគុណចំពោះឆ្មប និងបញ្ជាក់ពីតួនាទីដ៏សំខាន់ក្នុងការពារ និងលើកម្ពស់សុខភាព៕
Tag:
ភ្នំពេញ
ទិវាឆ្មបជាតិ
© រក្សាសិទ្ធិដោយ thmeythmey.com