ទោះចាញ់ឬឈ្នះ នៅ ស្រីពៅ ប្តេជ្ញាប្រឹងប្រែងប្រកួត ដើម្បីបង្ហាញពីក្បាច់គុនខ្មែរ

ONE Championship

កីឡាជាតិ

ជាតិ

ទោះចាញ់ឬឈ្នះ នៅ ស្រីពៅ ប្តេជ្ញាប្រឹងប្រែងប្រកួត ដើម្បីបង្ហាញពីក្បាច់គុនខ្មែរ

03, May 2019 , 8:59 am

រូបភាព

កីឡាការិនី នៅ ស្រីពៅ (ឆ្វេង) និងកីឡាករ ចាន់ រតនា

ដោយ:

អ្នកលេងគុនចម្រុះកម្ពុជា នៅ ស្រីពៅ ត្រូវប្រឈមមុខជាមួយកីឡាការិនីម្ចាស់ផ្ទះ Priscilla Hertati Lumban Gaol ក្នុងព្រឹត្តិការណ៍ ONE For Honor នៅទីក្រុងហ្សាការតាប្រទេសឥណ្ឌូណេស៊ីនៅថ្ងៃទី៣ ខែឧសភា ឆ្នាំ២០១៩។ ស្រីពៅ ដែលដាក់ក្តីរំពឹងត្រឹម៥០ភាគរយក្នុងការឈ្នះ បានប្តេជ្ញាថា នាងប្រឹងប្រែងប្រកួតឲ្យអស់ពីសមត្ថភាព ដើម្បីបង្ហាញ ក៏ដូចជាផ្សព្វផ្សាយពីភាពអស្ចារ្យរបស់គុនខ្មែរ។ កីឡាករ ចាន់ រតនា ក៏ប៉ះកីឡាករម្ចាស់ផ្ទះក្នុងព្រឹត្តិការណ៍នេះផងដែរ។

កីឡាការិនី នៅ ស្រីពៅ បានព្យាយាមហ្វឹកហាត់យ៉ាងខ្លាំង ដើម្បីពង្រឹងលើការចាប់ ឃ្លេ និងដោះឃ្លេគូប្រកួត។ ព្រោះនាងត្រូវតទល់ជាមួយកីឡាការិនីម្ចាស់ផ្ទះឥណ្ឌណេស៊ីក្នុងព្រឹត្តិការណ៍ ONE Championship ដែលល្បីពូកែខាងចាប់ផ្តួល និងឃ្លេគូប្រកួត។ ជាមួយការលើកឡើងពីចំណុចខ្លាំងរបស់ដៃគូ ស្រីពៅ ហាក់មិនញញើតពីសមត្ថភាពដៃគូឡើយ ហើយប្តេជ្ញាវាយឲ្យអស់ពីសមត្ថភាពក្នុងការស្វែងរកជ័យជម្នះជូនជាតិ។

តាមរយៈព្រឹត្តិការណ៍ ONE For Honor នៅឥណ្ឌូណេស៊ីនេះ កីឡាការិនី នៅ ស្រីពៅ រំពឹងបង្ហាញឲ្យពិភពលោកបានស្គាល់ពីភាពអស្ចារ្យរបស់ក្បាច់គុនខ្មែរកាន់តែច្បាស់ថែមទៀត។ ទោះបីបង្ហាញពីការតាំងចិត្ត និងភាពក្លាហានយ៉ាងណាក៏ដោយ តែ ស្រីពៅ ហាក់មិនហ៊ានដាក់ក្តីរំពឹងខ្ពស់ក្នុងការយកឈ្នះនោះទេ ដោយសង្ឃឹមត្រឹម៥០ភាគរយប៉ុណ្ណោះ។

«ខ្ញុំមិនមានពាក្យអ្វីនោះទេ មានតែពាក្យខំប្រឹងឲ្យអស់ពីសមត្ថភាព។ ទោះចាញ់ឬឈ្នះក៏ដោយ ខ្ញុំនឹងបង្ហាញក្បាច់គុនខ្មែរឲ្យគេឃើញ»។ កីឡាការិនី នៅ ស្រីពៅ បង្ហាញការតាំងចិត្តដូច្នេះ ហើយបន្ថែមថា នាងនឹងប្រើកែវបុកកាណូត ជង្គង់ និងវាយចេញឲ្យចេញឲ្យលឿនៗតាមតែអាចធ្វើទៅបានក្នុងការផ្តួលដៃគូ ដែលល្បីផ្តួលប្រកួតដោយក្បាច់ឃ្លេនេះ។

កីឡាការិនី នៅ ស្រីពៅ ត្រូវតទល់ជាមួយកីឡាការិនីម្ចាស់ផ្ទះ Priscilla Hertati Lumban Gaol ក្នុងព្រឹត្តិការណ៍ ONE For Honor នៅទីក្រុងហ្សាការតាប្រទេសឥណ្ឌូណេស៊ីនៅថ្ងៃទី៣ ខែឧសភា ឆ្នាំ២០១៩។ ក្នុងព្រឹត្តិការណ៍នេះដែរកីឡាករ ចាន់ រតនា ប៉ះកីឡាករម្ចាស់ផ្ទះ Rudy Agustian៕