អន្តរជាតិ
អាមេរិកថា ចិននឹងបង្កើនមូលដ្ឋាននៅបរទេសដើម្បីការពារគម្រោងផ្លូវសូត្រ មូលដ្ឋានយោធាចិននៅជីប៊ូទី។ រូបភាព AFP
× មន្ទីរបញ្ចកោណ នៅថ្ងៃទី២ ខែឧសភា បានចេញផ្សាយរបាយការណ៍ប្រចាំឆ្នាំមួយស្ដីពីការអភិវឌ្ឍវិស័យយោធារបស់ចិន។ បើតាមរបាយការណ៍នេះ អាមេរិករំពឹងថា ចិននឹងបង្កើនចំនួនមូលដ្ឋានយោធានៅបរទេសរបស់ខ្លួនកាន់តែច្រើន សំដៅការពារគម្រោងខ្សែក្រវាត់ និងវិថី ដែលគេស្គាល់ជាទូទៅថា គម្រោងផ្លូវសូត្រននោះ។ អាមេរិកក៏រំពឹងដែរថា គម្រោងបង្កើតមូលដ្ឋាននេះអាចជួបបញ្ហាខ្លះ ព្រោះប្រទេសមួយចំនួនទំនងបារម្ភពីវត្តមានយោធាចិនក្នុងទឹកដីរបស់ខ្លួន។
ខណៈគំនិតផ្ដួចផ្ដើមខ្សែក្រវាត់ និងវិថីកាន់តែរីកដុះដាលនោះ ចិននឹងកសាងមូលដ្ឋានយោធានៅបរទេសកាន់តែច្រើនដែរដើម្បីធ្វើជាខែលការពារគម្រោងមហាសាលរបស់ខ្លួន។ នេះជាការសន្និដ្ឋានរបស់ក្រសួងការពារជាតិអាមេរិកក្នុងរបាយការណ៍ទៅកាន់សភា។ របាយការណ៍ដែលផ្ដោតលើការអភិវឌ្ឍយោធា និងសន្តិសុខរបស់ចិននេះ បញ្ជាក់ថា ការរក្សាសន្តិសុខសម្រាប់គម្រោងវិនិយោគចិននៅបរទេស ជារឿងចាំបាច់។
បច្ចុប្បន្ននេះ ចិនមានមូលដ្ឋាននៅបរទេសតែមួយគត់ គឺនៅរដ្ឋអាហ្វ្រិកជីប៊ូទី។ រដ្ឋនៅជាប់តំបន់កុយរមាសអាហ្វ្រិកនេះ ក៏មានផងដែរមូលដ្ឋានយោធាអាមេរិក បារាំង និងជប៉ុនជាដើម។ សព្វថ្ងៃមានមួយមែន គេជឿថា ចិនកំពុងរៀបចំផែនការពង្រាយទ័ពរបស់ខ្លួនជាអចិន្ត្រៃយ៍នៅប្រទេសជាច្រើនទៀត ដើម្បីឲ្យស្របនឹងមហិច្ឆតាពង្រីកឥទ្ធិពលរបស់ខ្លួន។ របាយការណ៍មន្ទីរបញ្ចកោណ បានបញ្ជាក់ចំៗឈ្មោះប៉ាគីស្ថានដែលអាចមានមូលដ្ឋានចិននៅពេលខាងមុខ។
បើតាមរបាយការណ៍ចេញថ្ងៃទី២ ខែឧសភា ចិននឹងដាក់មូលដ្ឋានយោធារបស់ខ្លួនក្នុងប្រទេសដែលមានទំនាក់ទំនងជិតស្និទ្ធយូរអង្វែង និងមានផលប្រយោជន៍យុទ្ធសាស្ត្រដូចគ្នាដូចជាប៉ាគីស្ថានជាដើម និងនៅប្រទេសផ្សេងទៀតដែលមានប្រវត្តិធ្វើជាមូលដ្ឋានសម្រាប់យោធាបរទេស។ យ៉ាងណាមិញ មន្ទីរបញ្ចកោណអះអាងថា ផែនការពង្រាយទ័ពនៅបរទេសរបស់ចិន អាចជួបបញ្ហាព្រោះប្រទេសមួយចំនួននឹងប្រយ័ត្នប្រយែងក្នុងការទទួលយកយោធាចិនសម្រាប់រយៈពេលយូរនោះ។
មិនមែនតែប៉ាគីស្ថាន របាយការណ៍អាមេរិកដដែលបានលើកឡើងពីតំបន់ជាច្រើនទៀតដែលអាចមានវត្តមានមូលដ្ឋានយោធាចិនដូចជាអាស៊ីអាគ្នេយ៍ មជ្ឈិមបូព៌ា និងតំបន់កោះនៅមហាសមុទ្រប៉ាស៊ីហ្វិកខាងលិចមួយចំនួនទៀត។ តាមពិតទៅ នៅក្បែរអាស៊ីអាគ្នេយ៍ ចិនកំពុងតែពង្រឹងវត្តមានយោធារបស់ខ្លួនយ៉ាងខ្លាំងនៅសមុទ្រចិនខាងត្បូង ជាទីដែលចិនដណ្ដើមគ្នាជាមួយវៀតណាម និងហ្វីលីពីនជាដើម។ ប៉ុន្តែ ចិនមិនទាន់ស្ថាបនាទីតាំងយោធាទាំងនោះជាមូលដ្ឋានយោធាពេញលេញនៅឡើយទេ។
កាលពីឆ្នាំមុន មានការជជែកជុំវិញការតាំងមូលដ្ឋានចិននៅច្រក Wakhan ភាពឦសានអាហ្វហ្កានីស្ថាន។ លើសពីនោះ កាសែតអាមេរិក Washington Post ផ្សាយថា ចិនបានបង្កើតទីតាំងយោធានៅភាគខាងកើតប្រទេសតាហ្ស៊ីគីស្ថានដែលនៅក្បែរច្រក Wakhan ផងដែរ។ Wakhan នេះជាចំណុចយុទ្ធសាស្ត្រសំខាន់មួយដែលបើកផ្លូវរវាងចិន និងប៉ាគីស្ថាន៕
© រក្សាសិទ្ធិដោយ thmeythmey.com